କୋଲକାତା: ଟିଏମସି ବିଧାୟକ ସତ୍ୟଜିତ୍ ବିଶ୍ବାସ ହତ୍ୟା ଘଟଣାରେ ଗିରଫ ହେଲେ 2 ଜଣ । ଦୁଇ ଅଭିଯୁକ୍ତ ହେଲେ କାର୍ତ୍ତିକ ମଣ୍ଡଳ ଏବଂ ସୁଜିତ ମଣ୍ଡଳ । ପଶ୍ଚିମବଙ୍ଗ ନଦିଆ ଜିଲ୍ଲା ପୋଲିସ ଗିରଫ ନେଇ ସୂଚନା ଦେଇଛି । ଏହାକୁ ନେଇ ବିଜେପି-ଟିଏମସି ବାକ୍ ଯୁଦ୍ଧ ମଧ୍ୟ ଆରମ୍ଭ ହୋଇଛି । ପୋଲିସ ଏହି ଦୁଇ ଜଣଙ୍କ ପାଖରୁ ଅନେକ କିଛି ତଥ୍ୟ ବାହାର କରିବ ବୋଲି ଆଶା ରଖିଛି । ଗୁଳି ମାରିବା ପଛରେ ଉଦ୍ଦେଶ୍ୟ କଣ ଏବଂ କାହା ଇଙ୍ଗିତରେ ହତ୍ୟା କରାଯାଇଛି ବୋଲି ପୋଲିସ ଜାଣିବାକୁ ଚେଷ୍ଟା କରିବ ।
କ୍ରିଷ୍ଣାଗଞ୍ଜ ନିର୍ବାଚନମଣ୍ଡଳୀର ବିଧାୟକ ଅଟନ୍ତି ସତ୍ୟଜିତ୍ ବିଶ୍ବାସ । ସୂଚନା ଅନୁଯାୟୀ, ସରସ୍ବତୀ ପୂଜାରେ ସାମିଲ ହେବା ପାଇଁ ବିଧାୟକ ସତ୍ୟଜିତ ନିଜ ଅଞ୍ଚଳକୁ ଆସିଥିଲେ । ସମାରୋହ ଶେଷକରି ଯାଉଥିବାବେଳେ ଭିଡ଼ ମଧ୍ୟରୁ କେହି ସତ୍ୟଜିତଙ୍କୁ ଗୁଳି କରିଥିଲେ । ଫଳରେ ସେହିଠାରେ ହିଁ ସତ୍ୟଜିତ ତଳେ ପଡ଼ିଯାଇଥିଲେ । ଏହି ହତ୍ୟା ପଛରେ ବିଜେପିର ହାତ ଅଛି ବୋଲି ଦିବଂଗତ ବିଧାୟକଙ୍କ ଦଳ ଟିଏମସି ଦାବି କରିଛି । ଏ ନେଇ ପୂର୍ବତନ ଟିଏମସି ନେତା ତଥା ଏବେର ବିଜେପି ନେତା ମୁକୁଲ ରୟଙ୍କ ବିରୋଧରେ ଏତଲା ଦିଆଯାଇଛି ।
ତେବେ ବିଜେପି ଅଭିଯୋଗକୁ ଖଣ୍ଡନ କରିସାରିଛି । ଟିଏମସି ସବୁବେଳେ ଏମିତି ଅଭିଯୋଗ କରେ କିନ୍ତୁ ପ୍ରମାଣ କରିପାରେ ନାହିଁ ବୋଲି ଯୁକ୍ତି ବାଢିବା ସହ ସିବିଆଇ ତଦନ୍ତ ପାଇଁ ଦାବି କରିଛି ।
