ଅଗରତାଲା: ଟଙ୍କା ରୋଜଗାର କରିବାର ସହଜ ପନ୍ଥା ହେଉଛି ବେଆଇନ ବ୍ୟବସାୟ । ଦିନକୁ ଦିନ ଦୃତ ଗତିରେ ବଢିଚାଲିଛି ବେଧଡକ ନିଶା କାରବାର । ତ୍ରିପୁରା ପୋଲିସ 40,560 ବୋତଲ କଫ୍ ସିରଫ (ଫେନ୍ସିଡିଲ) ଜବତ କରିଛି । ଯାହାକି ନିଶା କାରବାରରେ ବ୍ୟବହାର ହୁଏ । ଜବତ ହୋଇଥିବା ଫେନ୍ସିଡିଲର ଆନୁମାନିକ ମୂଲ୍ୟ 22.5 ଲକ୍ଷ ଟଙ୍କା ହୋଇଥିବା ପୋଲିସ ସୂଚନା ଦେଇଛି ।
ତ୍ରିପୁରାର ବାଧାରଘାଟ ସହରରେ ଥିବା ଏକ ଗୋଦାମରେ ଏହି ବେଆଇନ ବ୍ୟବସାୟ ହେଉଥିବାବେଳେ ପୋଲିସ ଚଢାଉ କରିଥିଲା । ସେପଟେ ପୋଲିସ କହିବା ଅନୁସାରେ ଉକ୍ତ ଗୋଦାମର ମାଲିକ ଏବଂ ମ୍ୟାନେଜରକୁ ଗିରଫ କରାଯାଇଛି । ସୂଚନା ଅନୁସାରେ ବାଦାରଘାଟ ତ୍ରିପୁରାର ଏକ ବିଧାନସଭା ନିର୍ବାଚନ ମଣ୍ଡଳୀ । ଆସନ୍ତା ସେପ୍ଟେମ୍ବର 23 ରେ ଏଠାରେ ନିର୍ବାଚନ ଅନୁଷ୍ଠିତ ହେବାକୁ ଯାଉଛି । କଫ୍ ସିରଫକୁ ଡ୍ରଗ୍ସ ଆକାରରେ ବ୍ୟବହାର କରାଯାଏ । ତେଣୁ ବିପୁଳ ପରିମାଣରେ ବେଆଇନ ଭାବେ ଏହାର ବ୍ୟବସାୟ ଚାଲିଛି । ପୋଲିସ ସମସ୍ତ କଫ ସିରଫକୁ ଜବତ କରିବା ପରେ ତଦନ୍ତ ଜାରି ରଖିଛି ।
