ନୂଆଦିଲ୍ଲୀ: ଦେଶରେ 15 ଲକ୍ଷ ପାର କରିଛି କୋରୋନା ସଂକ୍ରମଣ ସଂଖ୍ୟା । ଯେଉଁଥିରେ ବର୍ତ୍ତମାନ ସୁଦ୍ଧା 34 ହଜାର 193 ଜଣଙ୍କର ମୃତ୍ୟୁ ହୋଇଛି । ଯାହାକୁ ନେଇ ଦେଶବାସୀ ଭୟଭୀତ ଥିବାବେଳେ, ଚିନ୍ତାରେ ଉଭୟ କେନ୍ଦ୍ର ଓ ରାଜ୍ୟ ସରକାର । ଆଉ ଏପରି ସ୍ଥିତିରେ ସ୍ବାସ୍ଥ୍ୟ ମନ୍ତ୍ରାଳୟ ପକ୍ଷରୁ କୋଭିଡ ଟେଷ୍ଟକୁ ବଢାଇ ଦିଆଯାଇଛି ।
ଇଣ୍ଡିଆନ କାଉନସିଲ ଅଫ ମେଡିକାଲ ରିସର୍ଚ୍ଚ (ଆସିଏମଆର) ମୁତାବକ, ଗତ 24 ଘଣ୍ଟା ମଧ୍ୟରେ ଦେଶରେ କୋଭିଡ ଟେଷ୍ଟ କରାଯାଉଥିବା ଲ୍ୟାବରେ 4 ଲକ୍ଷ 8 ହଜାର 855ଟି କୋରୋନା ସାମ୍ପଲ ଟେଷ୍ଟ କରାଯାଇଛି। ଯାହାକୁ ମିଶାଇ ବୁଧବାର ସକାଳ ସୁଦ୍ଧା 1 କୋଟି 77 ଲକ୍ଷ 43 ହଜାର 740ରେ କୋଭିଡ ଟେଷ୍ଟ କରାଯାଇଛି ।
ତେବେ ଦେଶରେ ବୃଦ୍ଧି ପାଉଥିବା ଏହି ସଂକ୍ରମଣ ସଂଖ୍ୟାକୁ ନଜରରେ ରଖି ଅନେକ ରାଜ୍ୟରେ ସଚେତନତାକୁ ନେଇ କଟକଣା ବଢାଇ ଦିଆଯାଉଛି । ଆଉ କୋରୋନା ସାମ୍ପଲ ଟେଷ୍ଟକୁ ବହୁଳ ମାତ୍ରାରେ ବୃଦ୍ଧି କରିବା ଫଳରେ ସଂକ୍ରମିତଙ୍କୁ ଚିହ୍ନଟ କରି ସେମାନଙ୍କର ଚିକିତ୍ସା କରି ଦେଶରେ ଏହାର ବିସ୍ତାରକୁ କମ କରିବା ମୂଳ ଲକ୍ଷ୍ୟ ରହିଛି ।
