ନୂଆଦିଲ୍ଲୀ: ନାଗରିକତା ସଂଶୋଧନ ଆଇନ୍(ସିଏଏ) ଏବଂ ଜମ୍ମୁ-କାଶ୍ମୀରର ଗୃହବନ୍ଦୀ ନେତାଙ୍କୁ ନେଇ ବଡ ବୟାନ ଦେଇଛନ୍ତି ଆମେରିକାର ରାଷ୍ଟ୍ରଦୂତ ଏଲିସ ୱେଲସ୍ । ଆଇନ୍ ଅଧିନରେ ସମସ୍ତଙ୍କୁ ସମାନ ସଂରକ୍ଷଣ ଦିଆଯାଉ ବୋଲି ସେ କହିଛନ୍ତି । ଏହା ସହିତ ସେ ବିନା କୌଣସି ଅଭିଯୋଗରେ କାଶ୍ମୀରରେ ଗୃହବନ୍ଦୀ ଭାବରେ ରଖାଯାଇଥିବା ରାଜନେତାଙ୍କୁ ତତ୍କାଳ ମୁକ୍ତ କରିବାକୁ ଭାରତକୁ ଅପିଲ କରିଛନ୍ତି ।
ନିକଟରେ ରାଇସିନ ଡାଇଲଗରେ ଯୋଗ ଦେବାକୁ ଭାରତ ଆସିଥିବା ଏଲିସ ଆମେରିକା ଫେରିବା ପରେ ଏଭଳି ମନ୍ତବ୍ୟ ରଖିଛନ୍ତି । ସେ କହିଛନ୍ତି, ଭାରତ ଯାତ୍ରା ସମୟରେ ସିଏଏକୁ ନେଇ ଦେଶରେ ଚାଲିଥିବା ଅନେକ ଘଟଣାକ୍ରମ ସମ୍ବନ୍ଧରେ ଅଧିକ ଜାଣିବାକୁ ମିଳିଲା । ସେଠାରେ ଯାହା ବି ଚାଲିଛି ତାକୁ ଗଣତାନ୍ତ୍ରିକ ପ୍ରକ୍ରିୟା କୁହାଯାଇପାରେ । ସିଏଏ ବିରୋଧରେ ସେଠାରେ ଲୋକମାନେ ରାଜରାସ୍ତାକୁ ଓହ୍ଲାଇଥିଲେ । ଏହାକୁ ନେଇ ରାଜନୈତିକ, ଗଣମାଧ୍ୟମ ଏବଂ ଅଦାଲତରେ ଚର୍ଚ୍ଚା ମଧ୍ୟ ଜାରି ରହିଥିଲା । ଏହାକୁ ଗଣତାନ୍ତ୍ରିକ ପ୍ରକ୍ରିୟା କୁହାଯାଇପାରେ ବୋଲି ସେ କହିଛନ୍ତି ।
ଏହା ବ୍ୟତୀତ ଏଲିସ ଜମ୍ମୁ-କାଶ୍ମୀରକୁ ନେଇ କେନ୍ଦ୍ର ସରକାରଙ୍କ ପକ୍ଷରୁ ନିଆଯାଇଥିବା ପଦକ୍ଷେପରେ ଖୁସି ବ୍ୟକ୍ତ କରିଛନ୍ତି । ଯେଉଁଥିରେ ଇଣ୍ଟରନେଟକୁ ଆଂଶିକ ରୂପରେ କୋହଳ କରାଯାଇଥିବା ନିଷ୍ପତ୍ତି ରହିଛି । ଅନ୍ୟପକ୍ଷରେ ବିନା କୌଣସି ଅଭିଯୋଗରେ କାଶ୍ମୀରରେ ଗୃହବନ୍ଦୀ ଭାବରେ ରଖାଯାଇଥିବା ରାଜନେତାଙ୍କୁ ତତ୍କାଳ ମୁକ୍ତ କରିବାକୁ ଭାରତକୁ ଅପିଲ୍ କରିଛନ୍ତି ସେ ।
ସୂଚନାଯୋଗ୍ୟ ଯେ, ଗତ ବର୍ଷ ଜମ୍ମୁ-କାଶ୍ମୀରରୁ ଧାରା 370 ଉଚ୍ଛେଦ ପରେ ସୁରକ୍ଷାକୁ ଦୃଷ୍ଟିରେ ରଖି ଅନେକ ନେତାଙ୍କୁ ଗୃହବନ୍ଦୀ ରଖିବାର ନିଷ୍ପତ୍ତି ନେଇଥିଲେ ସରକାର । ହେଲେ ସ୍ଥିତି ସାମାନ୍ୟ ହେଉଥିବା ଦେଖି ଧୀରେ ଧୀରେ ସେମାନଙ୍କୁ ମୁକ୍ତ କରାଯାଉଛି ।
