ନୂଆଦିଲ୍ଲୀ: ବର୍ତ୍ତମାନ ଦିଲ୍ଲୀରେ ପ୍ରାୟ 7 ହଜାରରୁ ଲୋକ କୋରୋନାରେ ଆକ୍ରାନ୍ତ ହୋଇଥିବା ଜଣାପଡିଛି। 70 ରୁ ଅଧିକ ଲୋକଙ୍କର ମୃତ୍ୟୁ ହୋଇଥିବାବେଳେ, ବର୍ତ୍ତମାନ ଏହି ଆକଳନ ଉପରେ ରାଜନୀତି ଆରମ୍ଭ ହୋଇଛି। ବିଜେପି ଅଭିଯୋଗ କରିଛି ଯେ, ଦିଲ୍ଲୀ ସରକାର କୋରୋନାରେ ମୃତ୍ୟୁ ସଂଖ୍ୟା ଲୁଚାଉଛି । ଏହାକୁ ଭୁଲ ବୋଲି କହି ଦିଲ୍ଲୀ ସରକାର ଅବହେଳା ପାଇଁ ଡାକ୍ତରଖାନାକୁ ଦାୟୀ କରିଛନ୍ତି।
ବିଜେପି ଅଭିଯୋଗ କରିଛି ଯେ, କେଜ୍ରିୱାଲ ସରକାର କୋରୋନରେ ମୃତ୍ୟୁ ବରଣ କରିଥିବା ଆକ୍ରାନ୍ତଙ୍କ ସଂଖ୍ୟା ଲୁଚାଉଛନ୍ତି। ଡାକ୍ତରଖାନା ସଂଖ୍ୟା ଏବଂ ରାଜ୍ୟ ସରକାରଙ୍କ ସଂଖ୍ୟାରେ ପାର୍ଥକ୍ୟ ଥିବା ଦାବି କରୁଛି ବିଜେପି। ପୂର୍ବ ଦିଲ୍ଲୀର ସାଂସଦ ଗୌତମ ଗମ୍ଭୀର ଟ୍ୱିଟ୍ କରି କହିଛନ୍ତି ଯେ, ଆପଣ ମୃତ ଶରୀରକୁ ଲୁଚାଇ ପାରିବେ କିନ୍ତୁ ସତ୍ୟକୁ ଲୁଚାଇ ପାରିବେ ନାହିଁ।
ସମଗ୍ର ବିବାଦ ଉପରେ ଦିଲ୍ଲୀ ସରକାରଙ୍କର ନିଜସ୍ୱ ଯୁକ୍ତି ରହିଛି। ଦିଲ୍ଲୀର ସ୍ୱାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର ଜେନା କହିଛନ୍ତି ଯେ, ଅନେକ ଡାକ୍ତରଖାନା ମୃତ ବ୍ୟକ୍ତିଙ୍କ ବିଷୟରେ ସମ୍ପୂର୍ଣ୍ଣ ସୂଚନା ଦେଉନାହିଁ। ଯାହା ପରେ ସମସ୍ତ ଡାକ୍ତରଖାନା ପାଇଁ ଏକ ନୂତନ ନିର୍ଦ୍ଦେଶ ଜାରି କରାଯାଇଛି।
ଦିଲ୍ଲୀ ସରକାରଙ୍କ ନୂଆ ଆଦେଶ
ମୃତ୍ୟୁର କାରଣ ବିଷୟରେ ସମ୍ପୂର୍ଣ୍ଣ ସୂଚନା ସରକାରଙ୍କ ନିକଟକୁ ପଠାଯିବା ଉଚିତ୍ । ଏହାସହ ମୃତ୍ୟୁ ପରିସଂଖ୍ୟାନ ଉପରେ SOP ଅନୁସରଣ କରାଯିବ । ରିପୋର୍ଟ ପଠାଇବାରେ ବିଳମ୍ବ କରାଯିବ ନାହିଁ ।ପ୍ରତିଦିନ ଅପରାହ୍ନ 5 ଟାରେ ସରକାରଙ୍କୁ ଡାକ୍ତରଖାନା ପକ୍ଷରୁ ରିପୋର୍ଟ ପଠାଯିବାକୁ କୁହାଯାଇଛି।
ଏହି ସମୟରେ ଦିଲ୍ଲୀ ସରକାର ଆଉ 3ଟି ଘରୋଇ ଡାକ୍ତରଖାନାକୁ କୋରୋନା ଡାକ୍ତରଖାନାରେ ପରିବର୍ତ୍ତନ କରିଥିବା ଘୋଷଣା କରିଛନ୍ତି। କୋରୋନା ଆକ୍ରାନ୍ତ ମାନେ ବର୍ତ୍ତମାନ ଦିଲ୍ଲୀର 10ଟି ଡାକ୍ତରଖାନାରେ ଚିକିତ୍ସିତ ହେବେ। ଏଥି ସହିତ, କୋରୋନାର ସାମାନ୍ୟ ଲକ୍ଷଣ ଥିବା ରୋଗୀମାନେ ବର୍ତ୍ତମାନ ଘରେ ଚିକିତ୍ସିତ ହୋଇପାରିବେ ।
