ମୁମ୍ବାଇ: ସୋସିଆଲ ମିଡିଆ ନିଶା ଏବେ ସମସ୍ତଙ୍କୁ ପାଗଳ କରିଛି। ବିଭିନ୍ନ ପ୍ରକାର ଷ୍ଟଣ୍ଟ, ଡ୍ୟାନ୍ସ ଭିଡିଓ କରି ଏହାକୁ ଫେସବୁକରେ ପୋଷ୍ଟ କରି ଲାଇକ୍, କମେଣ୍ଟ ଓ ସେୟାର ସାଉଁଟିବାରେ ଲାଗି ପଢିଛନ୍ତି ଯୁବପିଢି। ହେଲେ ଏହି କାର୍ଯ୍ୟ କରିବାବେଳେ ଅନେକ ଅଘଟଣ ଘଟିବାର ନଜିର ରହିଛି। ଏହାକୁ ନେଇ ସଚେତନା କରାଯାଉଥିଲେ ବି ଯଥା ପୂର୍ବଂ ତଥା ପରଂ।
ବର୍ତ୍ତମାନ ସେହିପରି ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ଯେଉଁଠି ଜଣେ ଯୁବକକୁ ଚଳନ୍ତା ଟ୍ରେନରେ ଷ୍ଟଣ୍ଟ କରିବା ମହଙ୍ଗା ପଡିଛି। ଘଟଣାସ୍ଥଳରେ ଯୁବକଟିର ମୃତ୍ୟୁ ହୋଇଛି। ମୃତ ଯୁବକ ଜଣକ ହେଲେ ମହାରାଷ୍ଟ୍ର ଥାନେର ଦିଲସାନ ।
ସୂଚନା ଅନୁସାରେ, 20 ବର୍ଷୀୟ ଏହି ଯୁବକଟି ଲୋକାଲ ଟ୍ରେନରେ ତାର ସାଙ୍ଗମାନଙ୍କ ସହ ଭାଇର ବିବାହ ପାଇଁ ଡ୍ରେସ କିଣିବାକୁ ଗୋଭାନ୍ଦୀ ଯାଉଥିଲେ। ଏହି ସମୟରେ ସେ ସାଙ୍ଗମାନଙ୍କ ସହ ଟ୍ରେନରେ ମଜ୍ଜା ମସ୍ତି କରିବା ସହ ବାହାରେ ଷ୍ଟଣ୍ଟ ପ୍ରଦର୍ଶନ କରୁଥିଲେ। ହେଲେ ଏକ ଖୁଣ୍ଟରେ ପିଟି ହୋଇଯିବାରୁ ଯୁବକଟିର ମୃତ୍ୟୁ ଘଟିଛି।
ଷ୍ଟଣ୍ଟର ଭିଡିଓ ଦିଶାନ୍ତଙ୍କ ସାଙ୍ଗମାନଙ୍କ ଦ୍ବାରା ରେକର୍ଡ ହେଉଥିବାର ଦେଖିବାକୁ ମିଳୁଛି। ଏହାସହ ଯୁବକଟି ଖୁଣ୍ଟରେ ପିଟି ହୋଇ ଟ୍ରେନର କମ୍ପାର୍ଟମେଣ୍ଟ ଭିତରେ ପଡିଯାଇଥିଲେ। ଖବର ଥାଉକି, ଯୁବକଟି ଏହି କିଛିଦିନ ହେବ ଏକ ଆମ୍ବୁଲାନ୍ସ ଡ୍ରାଇଭର ଭାବେ କାର୍ଯ୍ୟ ଆରମ୍ଭ କରିଥିଲେ। କିନ୍ତୁ ବିଧିର ବିଧାନ ହିଁ କିଛି ଅଲଗା। ନିଜର ଭୁଲ ପାଇଁ ଅକାରଣରେ ଚାଲିଗଲା ଜୀବନ।
