ଡେରାଡୁନ: ମାନବ ସମ୍ବଳ ବ୍ୟବହାର ଓ ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତିକୁ ନିୟନ୍ତ୍ରଣ କରିବା ଭିତ୍ତିରେ ଉତ୍ତରାଖଣ୍ଡ ପୋଲିସ ସମଗ୍ର ଦେଶରେ ଦ୍ବିତୀୟ ସ୍ଥାନ ହାସଲ କରିଛି । ସେହିପରି ପ୍ରଥମ ସ୍ଥାନରେ ତାମିଲନାଡ଼ୁ ରହିଥିବା ବେଳେ ତୃତୀୟରେ ପଞ୍ଜାବ ରହିଛି ।
ଟାଟା ଟ୍ରଷ୍ଟ ପକ୍ଷରୁ ନିକଟରେ ପ୍ରକାଶ ପାଇଥିବା ଇଣ୍ଡିଆନ ଜଷ୍ଟିସ ରିପୋର୍ଟରୁ ଏହା ଜଣାପଡ଼ିଛି । ପ୍ରକାଶିତ ରିପୋର୍ଟ ମୁତାବକ ପୋଲିସର ମାନବ ସମ୍ବଳକୁ ବ୍ୟବହାର କରିବାରେ ସମଗ୍ର ଦେଶରେ ପ୍ରଥମେ ତାମିଲନାଡ଼ୁ ଓ ପରେ ଉତ୍ତରାଖଣ୍ଡ ରହିଛି ।
ଟାଟା ଟ୍ରଷ୍ଟ ପକ୍ଷରୁ ବିଭିନ୍ନ ଆଧାରରେ ଦେଶର ପ୍ରମୁଖ ରାଜ୍ୟ ଗୁଡ଼ିକର ପୋଲିସ ପ୍ରଶାସନ ଉପରେ ସର୍ଭେ କରାଯାଇଥିଲା । ରାଜ୍ୟରେ ମୋଟ ପୋଲିସଙ୍କ ସଂଖ୍ୟା, ମହିଳା ପୋଲିସଙ୍କ ସଂଖ୍ୟା, ସମାଜରେ ବିଭିନ୍ନ ବର୍ଗର ଲୋକଙ୍କ ପୋଲିସ ପ୍ରଶାସନର କାର୍ଯ୍ୟର ଉପଲବ୍ଧତା ଆଦିକୁ ଆଧାର କରି ଏହି ସର୍ଭେ କରାଯାଇଥିଲା ।
ରିପୋର୍ଟ ମୁତାବକ ମହାରାଷ୍ଟ୍ର ଚତୁର୍ଥରେ ଥିବା ବେଳେ ପଞ୍ଚମରେ ଆନ୍ଧ୍ରପ୍ରଦେଶ, ଷଷ୍ଠରେ କର୍ଣ୍ଣାଟକ, ସପ୍ତମ ସ୍ଥାନରେ ଓଡ଼ିଶା, ଅଷ୍ଟମରେ ହରିଆଣା, ନବମରେ ଝାଡ଼ଖଣ୍ଡ ଏବଂ ଛତିଶଗଡ଼ ରହିଛନ୍ତି । ସେହିପରି ପଛକୁ ପଛ ତେଲେଙ୍ଗାନା, କେରଳ, ବିହାର, ମଧ୍ୟପ୍ରଦେଶ, ପଶ୍ଚିମବଙ୍ଗ, ରାଜସ୍ଥାନ ଏବଂ ଉତ୍ତରପ୍ରଦେଶ ରହିଥିବା ଜଣାପଡ଼ିଛି ।
