ନୂଆଦିଲ୍ଲୀ: ବିଜେପି ନେତାଙ୍କ ମଧ୍ୟରେ ଏବେ ଚାଲିଛି ଚୌକିଦାର ଟ୍ରେଣ୍ଡ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱାରା ଆରମ୍ଭ ହୋଇଥିବା ‘ମୁଁ ଦେଶର ଚୌକିଦାର’ ନାରାକୁ ବିଜେପି ଚତ୍ମକାର ଢଙ୍ଗରେ ଆପଣାଇଛି । ଦଳର ସମସ୍ତ ପ୍ରମୁଖ ନେତା ନିଜ ଟ୍ବିଟର ଆକାଉଣ୍ଟ ନାମ ଆଗରେ ଚୌକିଦାର ଯୋଡିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହି ଧାରା ଆରମ୍ଭ କରିଥିବାବେଳେ ଏହାକୁ ସମସ୍ତେ ଅନୁସରଣ କରୁଛନ୍ତି ।
ଏହି କ୍ରମରେ ବୈଦେଶିକ ମନ୍ତ୍ରୀ ସୁଷମା ସ୍ୱରାଜ ନିଜ ଟ୍ୱିଟର ଆକାଉଣ୍ଟରେ ନାମ ଆଗରେ ‘ଚୌକିଦାର’ ଲଗାଇ ଦେଇଛନ୍ତି । ପୂର୍ବରୁ ଏହା ସୁଷମା ସ୍ବରାଜ ଥିବାବେଳେ ଏବେ ଏହା ‘ଚୌକିଦାର ସୁଷମା ସ୍ୱରାଜ’ ହୋଇଛି । ତେବେ ଏହାକୁ ନେଇ ସୁଷମାଙ୍କ ସ୍ୱାମୀ ଏକ ମଜାଦାର ପ୍ରତିକ୍ରିୟା ଦେଇଛନ୍ତି । ସୁଷମାଙ୍କ ସ୍ୱାମୀ ସ୍ୱରାଜ କୌଶଳ ନିଜେ ଏକ ଟ୍ବିଟ କରି ମଜାଳିଆ ଅନ୍ଦାଜରେ ଲେଖିଛନ୍ତି ଯେ ତାଙ୍କ ସ୍ତ୍ରୀ ରାତିରେ ମନ୍ତ୍ରୀ ଥିବାବେଳେ ସକାଳେ ଚୌକିଦାର ହୋଇଯାଇଛନ୍ତି ।
ସେ ଲେଖିଛନ୍ତି ଯେ "ମୁଁ ଯେତେବେଳେ ଆଜି ସକାଳେ ଉଠିଲି, ମୋର ପତ୍ନୀ ଚୌକିଦାର ବନି ଯାଇଥିଲେ ।" ସ୍ୱରାଜଙ୍କ ଏହି ଟ୍ୱିଟକୁ ନେଇ ସୋସିଆଲ ମିଡିଆରେ ମଜାଦାର ପ୍ରତିକ୍ରିୟା ଆସୁଥିବା ଦେଖିବାକୁ ମିଳୁଛି । ଏହାକୁ ଅନେକ ଲୋକ ପସନ୍ଦ ମଧ୍ୟ କରୁଛନ୍ତି । ସୋମବାର ସକାଳ 8ଟା 36 ମିନିଟରେ ସେ ଏହି ଟ୍ୱିଟ କରିଛନ୍ତି । ତେବେ ଆଇଫୋନରୁ ସେ ଏହି ଟ୍ୱିଟ କରିଛନ୍ତି । ତେଣୁ ଅଧିକାଂଶ ଲୋକ ଏହାକୁ ଦେଖିପାରୁନାହାନ୍ତି ।
