ନୂଆଦିଲ୍ଲୀ: ଗୁରୁବାର ବହୁ ଚର୍ଚ୍ଚିତ ଅଯୋଧ୍ୟା ରାମ ଜନ୍ମଭୂମି-ବାବ୍ରି ମସଜିଦ ବିବାଦର ଶୁଣାଣି ସୁପ୍ରିମକୋର୍ଟରେ ହେବ । ମୁଖ୍ୟ ବିଚାରପତି ରଞ୍ଜନ ଗୋଗାଇଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଏହାର ଶୁଣାଣି କରିବେ । ତେବେ ଖଣ୍ଡପୀଠ ମାମଲାର ଶୁଣାଣି ଶୀଘ୍ର କରନ୍ତୁ ବୋଲି ହିନ୍ଦୁ ପକ୍ଷଧର ଗୋପାଳ ସିଂହ ବିଶାରଦ ସୁପ୍ରିମକୋର୍ଟରେ ଆବେଦନ କରିଥିଲେ । ତେବେ ଏହି ଆବେଦନର ଶୁଣାଣି ଆସନ୍ତାକାଲି 10 ଟା 30 ରେ ହେବ ବୋଲି କୋର୍ଟ ନିର୍ଦ୍ଧାରଣ କରିଛନ୍ତି ।
ମାମଲାର ଶୀଘ୍ର ଶୁଣାଣି କରିବା ପାଇଁ ମଙ୍ଗଳବାର ଗୋପାଳ ସିଂହ ସୁପ୍ରିମକୋର୍ଟରେ ଆବେଦନ କରିଥିଲେ । ରାମ ଜନ୍ମଭୂମି ବାବ୍ରୀ ମସଜିଦ ମାମଲାର ସମାଧାନ ଦିଗରେ ପ୍ରଥମ ପର୍ଯ୍ୟାୟରେ ମଧ୍ୟସ୍ଥି ମାନଙ୍କ ଦ୍ବାରା କୌଣସି ପ୍ରକାରର ପ୍ରଗତି ହୋଇ ନାହିଁ । ତେଣୁ ସୁପ୍ରିମକୋର୍ଟ ଏହି ମାମଲାର ଶୁଣାଣି ଶୀଘ୍ର କରନ୍ତୁ ବୋଲି ସେ ନିଜ ଆବେଦନରେ କହିଥିଲେ । ତେବେ କୋର୍ଟ ଏହି ଆବେଦନ ଉପରେ ବିଚାର କରିବେ ବୋଲି ତାଙ୍କୁ ଆଶ୍ବାସନା ଦେଇଥିଲେ ।
