ଡେରାଡୁନ୍: ତିବ୍ଦତୀୟ ଆଧ୍ୟାତ୍ମିକ ଗୁରୁ ଦଲାଇ ଲାମା ଶନିବାର କୋଭିଡ-19 ସମୟରେ 'କୋରୋନା ଯୋଦ୍ଧା'ଙ୍କ ପ୍ରୟାସକୁ ପ୍ରଶଂସା କରିବା ସହିତ ଭବିଷ୍ୟତରେ ଏଭଳି ମହାମାରୀ ଠାରୁ ବିଶ୍ବକୁ ରକ୍ଷା କରିବା ପାଇଁ ସମସ୍ତେ କିଛି ପଦକ୍ଷେପ ନେବା ଉଚିତ ବୋଲି ବିଶ୍ବ ମାନସିକ ସ୍ବାସ୍ଥ୍ୟ ଦିବସ ଅବସରରେ ସମସ୍ତଙ୍କୁ ବାର୍ତ୍ତା ଦେଇଛନ୍ତି ।
ବିଶ୍ବ ମାନସିକ ସ୍ବାସ୍ଥ୍ୟ ଦିବସ ଅବସରରେ ଦଲାଇ ଲାମା ବିଶ୍ବବାସୀଙ୍କୁ ବାର୍ତ୍ତା ଦେଇ କହିଛନ୍ତି," କୋରୋନା ମହାମାରୀ ପାଇଁ ବର୍ତ୍ତମାନ ଆମେ ସମସ୍ତେ ଯେଉଁ ସମୟ ଦେଇ ଗତି କରୁଛେ ତାହା ଅତ୍ୟନ୍ତ ଦୁଃଖଦାୟକ । ଅତୀତରେ ଘଟି ଯାଇଥିବା ଆମର କର୍ମଫଳ ସ୍ବରୂପ ଏହି ସମୟ ବର୍ତ୍ତମାନ ଆସିଛି । କିନ୍ତୁ ଭବିଷ୍ୟତରେ ଏଭଳି ମହାମାରୀକୁ ଆମେ ସମସ୍ତେ ପ୍ରତିରୋଧ କରିବା ଉଚିତ ।"
କୋରୋନା ମହାମାରୀ ସମୟରେ ସ୍ବାସ୍ଥ୍ୟସେବାରେ ଜଡିତ ଲୋକଙ୍କ ନିଜ କାମ ପ୍ରତି ଥିବା ଉଦ୍ୟମ ଓ ଉତ୍ସର୍ଗକୁ ଆଧ୍ୟାତ୍ମିକ ନେତା ଦଲାଇ ଲାମା ଭୂୟସୀ ପ୍ରଶଂସା କରିଛନ୍ତି । କୋରୋନା ମହାମାରୀକୁ ଯଥାଶୀଘ୍ର ବିଶ୍ବରୁ ଲୋପ କରିବା ପାଇଁ ପ୍ରତିଦିନ ସକାଳେ ସେ ମନ୍ତ୍ର ଓ ପ୍ରାର୍ଥନା କରୁଥିବାର କହିଛନ୍ତି ଏବଂ ଏହାକୁ ସେ ସମଗ୍ର ବିଶ୍ବ ବିଶେଷକରି ଭାରତ ପାଇଁ ଉତ୍ସର୍ଗ କରିଥିବାର କହିଛନ୍ତି ।
@PTI
