ହାଇଦ୍ରାବାଦ: ବର୍ତ୍ତମାନ ଲକଡାଉନ ସମୟରେ ଟ୍ରେଣ୍ଡ କରୁଛି ଭିଡିଓ କନଫରେନ୍ସିଂ ଆପ୍ ‘ଜୁମ’ । ଏହି ଆପର ଲୋକପ୍ରିୟତା ରାତାରାତି ଆକାଶଛୁଆଁ ହୋଇଥିବା ବେଳେ ଏହାକୁ ଟକ୍କର ଦେବା ପାଇଁ ଆଗେଇ ଆସିଛନ୍ତି ଅନେକ କମ୍ପାନୀ । ଯେଉଁଥିରୁ ଗୋଟିଏ ହେଉଛି ଫେସବୁକ । ଗତ ମାସ ଜୁମକୁ ଚ୍ୟାଲେଞ୍ଜ ଦେଇ ଫେସବୁକ ଲଞ୍ଚ କରିଥିଲା ଭିଡିଓ କଲିଂ ପାଇଁ ମେସେଞ୍ଜର ରୁମ୍ସ । ବର୍ତ୍ତମାନ ଏହି ଆପ୍ର ସର୍ଟକଟ୍କୁ ଫେସବୁକ ଅଧିକୃତ ହ୍ବାଟ୍ସଆପ୍ର ୱେବ ଭର୍ସନରେ ଲଞ୍ଚ କରିବାକୁ ଯାଉଛି ଫେସବୁକ ।
ନିକଟରେ ହୋଇଥିବା ଅନୁଧ୍ୟାନରୁ ଜଣାପଡିଛି କି ହ୍ବାଟ୍ସଆପ୍ ୱେବର ଭର୍ସନ 2.2029.6ରେ WABetaInfo ନାମକ ଏକ ମେସେଞ୍ଜର ରୁମ୍ସ ସର୍ଟକଟ ଠାବ କରାଯାଇଛି । ଏହା ୟୁଜର୍ସଙ୍କୁ ନିଜ ଲାପଟପ୍ ଓ ପିସି ଦ୍ବାରା ବନ୍ଧୁ ଓ ପରିବାର ସହ ମେସେଞ୍ଜର ରୁମ୍ସ ଜରିଆରେ ଭିଡିଓ କଲ କରିବାର ସୁବିଧା ଯୋଗାଇବ । ଏହି ଅପ୍ସନକୁ ୟୁଜର୍ସ ଆଟାଚ ବଟନ ତଳେ ଅନ୍ୟ ଅପ୍ସନ ସହ ଦେଖିପାରିବେ । ହେଲେ ଏହି ଫିଚର ବର୍ତ୍ତମାନ ସମସ୍ତ ୟୁଜର୍ସଙ୍କୁ ଯୋଗାଇ ଦିଆଯାଇନାହିଁ । କାରଣ ଏହି ଫିଚରର ଏବେ ବି ଡେଭଲପମେଣ୍ଟ ଜାରି ରହିଛି ।
ତେବେ ଆଗାମୀ ଅପଡେଟ ଜରିଆରେ ହ୍ବାଟ୍ସଆପ୍ ୟୁଜର୍ସଙ୍କୁ ଏହି ଫିଚର ମିଳିପାରିବ । ସୂଚନା ଅନୁଯାୟୀ ଗତମାସ ଫେସବୁକ ଲଞ୍ଚ କରିଥିବା ମେସେଞ୍ଜର ରୁମ୍ସରେ 50ରୁ ଅଧିକ ଲୋକେ ଏକକାଳୀନ କନଫରେନ୍ସ କରିବାର ସୁବିଧା ରହିଛି । ଲୋକେ ସିଧାସଳଖ ମେସେଞ୍ଜର ଓ ଫେସବୁକରୁ ନିଜ ଆକାଉଣ୍ଟ ତିଆରି କରିପାରିବେ ଓ ଅନ୍ୟ ବନ୍ଧୁ ଓ ପରିବାରବର୍ଗଙ୍କୁ ରିକ୍ବେଷ୍ଟ ପଠାଇପାରିବେ ।
@IANS
