ନୂଆଦିଲ୍ଲୀ: ଦୁବାଇରେ ଚାକିରି ଛାଡି ଅସୁସ୍ଥ ମାଆଙ୍କ ସହ ସମୟ ବିତାଇବା ପାଇଁ ଭାରତକୁ ଫେରିଥିଲେ । କିନ୍ତୁ ବିଧିର ବିଧାନ ଥିଲା କିଛି ଭିନ୍ନ । ପୁଅକୁ ଦେଖିବା ଆଗରୁ ଆଖିବୁଜି ଦେଲେ ମା' । କ୍ବାରେନଣ୍ଟାଇନ ସେଣ୍ଟରରେ 14 ଦିନ ଶେଷ ହୋଇନଥିବାରୁ ବାହାରକୁ ଯିବାକୁ ମିଳିଲାନି ଅନୁମତି ।
ଶେଷ ଥର ପାଇଁ ଅନ୍ତିମ ସଂସ୍କାରରେ ବି ସାମିଲ ହୋଇପାରିଲେନି ଦିଲ୍ଲୀର ଅମୀର ଖାନ ନାମକ ଜଣେ 30 ବର୍ଷୀୟ ଯୁବକ । ମେ 13 ରେ ଭାରତ ଫେରିଥିଲେ ଅମୀର । ହେଲେ ବିମାନରୁ ଓହ୍ଲାଇବା ପରେ କ୍ବାରେନଣ୍ଟାଇନରେ ହିଁ ତାଙ୍କୁ ରହିବାକୁ ପଡିଥିଲା । ଏଭଳି ଖବର ପାଇବା ପରେ ସେ ନିୟମ ମାନି ମାଆଙ୍କୁ ଶେଷଥର ପାଇଁ ଦେଖିବା ପରେ ପୁଣି ଫେରି ଆସିବା ନେଇ ପ୍ରଶାସନକୁ ଅବଗତ କରାଇଥିଲେ । ହେଲେ କିଛି ଲାଭ ହୋଇନଥିଲା ।
ଗତବର୍ଷ ନଭେମ୍ବରରେ ଯକୃତ ସିରୋସିସ୍ ରୋଗରେ ଆକ୍ରାନ୍ତ ଥିଲେ ଅମୀରଙ୍କ ମାଆ । ଅସୁସ୍ଥ ମାଆଙ୍କ ସହ କିଛି ସମୟ ବିତାଇବାକୁ ଚାହୁଁଥିଲେ ଅମୀର । କିନ୍ତୁ ଇଚ୍ଛା ଅଧାରେ ହିଁ ରହିଗଲା । କୋରୋନା ଭୂତାଣୁ ସହ ଆମେ ଲଢିପାରିବା କିନ୍ତୁ ଭାବପ୍ରବଣତାକୁ ରୋକି ହେବନାହିଁ। ଶେଷ ସମୟରେ ମାଆକୁ ଦେଖିବା ପାରିନଥିବା ଅମୀର ଦୁଃଖ ପ୍ରକାଶ କରି କହିଛନ୍ତି ।
