ଡେରାଡୁନ: ସାରା ଦେଶରେ ଏବେ ଶୀତ ଲହରୀ ଜାରି ରହିଥିବା ବେଳେ ଉତ୍ତର ଭାରତରେ ସ୍ଥିତି ଅସମ୍ଭାଳ। ଏହି ତାପମାତ୍ରାରେ ଶୀତବସ୍ତ୍ର ବିନା ଘରୁ ବାହାରିବା ଏକ ପ୍ରକାରର ଅସମ୍ଭବ । କିନ୍ତୁ ଏଠାକାର ଜଣେ ସାଧୁଙ୍କ ଜୀବନଶୈଳୀ ସମସ୍ତଙ୍କୁ ଆଶ୍ଚର୍ଯ୍ୟ କରିଦେବ । କେବଳ ଗୋଟିଏ ପୋଷାକରେ ଏହି ସାଧୁ 12 ମାସ ଯମୁନୋତ୍ରୀ ଧାମରେ ସାଧନା କରୁଛନ୍ତି ।
ମାଇନସ 13 ଡିଗ୍ରୀ ମଧ୍ୟରେ ଯମୁନୋତ୍ରୀ ଧାମର ସାଧୁ ଯାନକୀ ଦାସ ବର୍ଷବର୍ଷ ଧରି ଏହି କାଠୁଆ ଶୀତରେ ବସି ତପସ୍ୟା କରୁଛନ୍ତି । 4 ରୁ 5 ଫୁଟର ବରଫ ମଧ୍ୟ ସାଧୁଙ୍କୁ ଢାଙ୍କି ଦେଇଛି । ତଥାପି ଖଣ୍ଡିଏ ପୋଷାକରେ ହନୁମାନ ମନ୍ଦିର ସାମ୍ନାରେ ସେ ସାଧନା କରୁଛନ୍ତି । ଏହି ଉତ୍କଟ ଜୀବନ ଜୀଇଁବା ପାଇଁ ଯେମିତି ସେମାନଙ୍କୁ ମନ୍ଦିରର ଘଣ୍ଟି ଶକ୍ତି ପ୍ରଦାନ କରୁଥାଏ ବୋଲି କୁହନ୍ତି ସାଧୁସନ୍ଥ ।
ପ୍ରବଳ ତୁଷାରପାତ ଯୋଗୁଁ ଧଳା ବରଫ ଚାଦରରେ ଘୋଡ଼େଇ ହୋଇଛି ଉତ୍ତରାଖଣ୍ଡର ଚାରି ଧାମ । କେତେକ ସ୍ଥାନରେ 7ରୁ 8 ଫୁଟ ବରଫ ଜମା ହୋଇଥିବା ବେଳେ ଗଙ୍ଗୋତ୍ରୀ ଏବଂ ଯମୁନୋତ୍ରୀ ଧାମରେ ପ୍ରାୟ 4-5 ଫୁଟ ବରଫ ଜମା ହୋଇଛି । ତେବେ ଗଙ୍ଗା ଏବଂ ଯମୁନାର ବରଫ ପାହାଡ ମଧ୍ୟରେ ବହୁଥିବା ସାମାନ୍ୟ ଜଳଧାରା ପ୍ରକୃତିର ସୌନ୍ଦର୍ଯ୍ୟକୁ ଦ୍ବିଗୁଣିତ କରୁଛି ।
ଗଙ୍ଗୋତ୍ରୀ ଏବଂ ଯମୁନୋତ୍ରୀରେ ବର୍ତ୍ତମାନ -13 ଡିଗ୍ରୀ ସେଲସିୟସରୁ କମ ତାପମାତ୍ରା ରହିଛି । ଏହି ତାପମାତ୍ରାରେ ସାଧାରଣ ଜୀବନଯାପନ କିପରି କଟୁଥିବ ତାହା ଆକଳନ କରାଯାଇପାରିବ ।
