ଲକ୍ଷ୍ନୌ: ଉତ୍ତର ପ୍ରଦେଶର ଆଗ୍ରାସ୍ଥିତ ବିଶ୍ବ ପ୍ରସିଦ୍ଧ ସ୍ମାରକ ତାଜମହଲରେ ପୂଜା ଏବଂ ଆଳତୀ କରିବାର ଧମକ ଦେଇଛି ଶିବସେନା । ତାଜମହଲ ଅସଲରେ ତେଜୋ ମହାଳୟ ଏବଂ ଏହା ହିନ୍ଦୁଙ୍କ ଆସ୍ଥାର ପ୍ରତୀକ ଅଟେ । ତେଣୁ ଶ୍ରାବଣ ମାସର 4 ସୋମବାରରେ ଏଠାରେ ଆଳତୀ କରାଯିବ ବୋଲି ଶିବସେନା ନେତା ବୀନୁ ଲବାନିଆ କହିଛନ୍ତି ।
ତେବେ ଶିବସେନାର ଏହି ଧମକ ପରେ ପ୍ରତ୍ନତତ୍ବ ବିଭାଗ ପକ୍ଷରୁ ଏହାର ସୁରକ୍ଷା ଦାବି କରାଯାଇଛି । ଏଠାରେ ପୂର୍ବରୁ କୌଣସି ପ୍ରକାର ପୂଜାର୍ଚ୍ଚନା କିମ୍ବା ଆରତୀ ହୋଇନାହିଁ । ତାଜମହଲ ଭଳି ସଂରକ୍ଷିତ ସ୍ମାରକରେ କୌଣସି ପ୍ରକାର ଧାର୍ମିକ ଆୟୋଜନ କରିବା ଆଇନ ବିରୋଧୀ । ତେଣୁ ଏହାର ସୁରକ୍ଷା ଦାବି କରି ଜିଲ୍ଲା ପ୍ରଶାସନକୁ ଚିଠି ଲେଖିଛି ବିଭାଗ ।
ସୂଚନାଯୋଗ୍ୟ ଯେ, ଏହା ପୂର୍ବରୁ ମଧ୍ୟ ତାଜମହଲରେ ପୂଜାର୍ଚ୍ଚନା କରିବା ନେଇ ଦକ୍ଷିଣ ପନ୍ଥୀ ସଂଗଠନ ପକ୍ଷରୁ ଦାବି କରାଯାଇଥିଲା । ଏହା ବ୍ୟତୀତ 2008ରେ ଶିବସେନା ତାଜମହଲରେ ଧାର୍ମିକ ଅନୁଷ୍ଠାନ କରିଥିଲେ । ଯାହାପରେ ସେମାନଙ୍କୁ ଗିରଫ କରାଯାଇଥିଲା ।
