ନୂଆଦିଲ୍ଲୀ: ଦ୍ବିତୀୟ ଥର ପାଇଁ ପ୍ରଧାନମନ୍ତ୍ରୀ ଭାବରେ ଆଜି(ଗୁରୁବାର) ନରେନ୍ଦ୍ର ମୋଦି ଶପଥ ଗ୍ରହଣ କରିବେ । ଶପଥ ଗ୍ରହଣ ପର୍ବ ପୂର୍ବରୁ ବିଜେପିର ସହଯୋଗୀ ଦଳ ଶିବସେନା ଏହାର ମୁଖପତ୍ର 'ସାମନା'ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭୂୟସୀ ପ୍ରଶଂସା କରିଛି । ମୋଦିଙ୍କ ହାତରେ ଦେଶ ଭାର ପ୍ରଦାନ କରିବା ଭଗବାନଙ୍କ ଇଚ୍ଛାନୁଯାୟୀ ହୋଇଛି ବୋଲି ପତ୍ରିକାରେ କୁହାଯାଇଛି ।
'ସାମନା'ରେ 'ମୋଦି ଇଶ୍ବରଙ୍କ ପୂର୍ବ ଯୋଜନା ଅନୁସାରେ ପୂନର୍ବାର ଦେଶର ପ୍ରଧାନମନ୍ତ୍ରୀ ପଦରେ ଆସୁଛନ୍ତି ବୋଲି ଲେଖାଯାଇଛି । ଏହାସହ ସେଥିରେ ଲେଖାଯାଇଛି ଯେ, କିଛି ଦିନ ପୂର୍ବରୁ ମୋଦି ଚୌକିଦାର ଓ ପ୍ରଧାନସେବକ ଥିଲେ, ମାତ୍ର ଏବେ ସେ ଦେଶର ରକ୍ଷକ ଓ ଅଭିଭାବକ ଭୂମିକା ସମ୍ପାଦନ କରିବାକୁ ଯାଉଛନ୍ତି ।
ଶିବସେନା ମୋଦିଙ୍କ ଗୁଣକୀର୍ତ୍ତନ କରି କହିଛି ଯେ ସମ୍ପ୍ରତି ଦେଶର ଅନେକ ଗମ୍ଭୀର ସମସ୍ୟା ରହିଛି । ଏ ସମସ୍ତ ସମସ୍ୟାକୁ ହଟାଇବା ପାଇଁ ମୋଦି ଦୃଢ ସଙ୍କଳ୍ପ ନେଇଛନ୍ତି । ଏହାସହ ମୋଦିଙ୍କୁ 'ପ୍ରମୁଖ ବିଭାଜକ' ଦର୍ଶାଇଥିବା ଆମେରିକାର ଲୋକପ୍ରିୟ ପତ୍ରିକା ଟାଇମ ମାଗାଜିନ ବାବଦରେ ସାମନାର ସମ୍ପାଦକୀୟରେ ଉଲ୍ଲେଖ କରାଯାଇଛି । ଡିଭାଇଡର ଇନ୍ ଚିଫ ଲେଖିଥିବା ମାଗାଜିନ ଏବେ ୟୁ-ଟର୍ଣ୍ଣ ନେଇ ମୋଦି ଦେଶକୁ ଯୋଡୁଥିବା ସବୁଠୁ ବଡ଼ ନେତା ବୋଲି ଲେଖିଛି ।
