ନୂଆଦିଲ୍ଲୀ: କୋରୋନା ଭାଇରସର ପ୍ରକୋପ ବଢିବାରେ ଲାଗିଛି । ବର୍ତ୍ତମାନ କୋରୋନା ରୋଗୀଙ୍କୁ ଯେତିକି ଚିନ୍ତା ବଢିବାରେ ଲାଗିଛି ତାଠାରୁ ଦୁଇ ଗୁଣିତ ଚିନ୍ତା ବଢିଛି କୋରୋନାରେ ପ୍ରାଣ ହରାଇଥିବା ବ୍ୟକ୍ତିର ମୃତଦେହକୁ ନେଇ । ମୃତଦେହର ଅନ୍ତିମ ସଂସ୍କାର କରିବା ପାଇଁ ନିଜ ପରିବାର ଲୋକେ ମଧ୍ୟ ଆସିବାକୁ ନାରାଜ । ଏଭଳି ଘଟଣା ଯେତିକି ସମ୍ବେଦନଶୀଳ ସେତିକି ଗୁରୁତ୍ବପୂର୍ଣ୍ଣ ପ୍ରସଙ୍ଗ ମଧ୍ୟ । ଏପରି କ୍ଷେତ୍ରରେ ଜଣେ କୋରୋନା ଯୋଦ୍ଧା ଭାବେ ସେବା କରିବାକୁ ଆଗ ଧାଡିରେ ଠିଆ ହୋଇଛନ୍ତି । ସେ ହେଉଛନ୍ତି ଶହୀଦ ଭଗତ ସିଂହ ସେବା ଦଳର ସଂସ୍ଥାପକ ଜିତେନ୍ଦ୍ର ସିଂହ ଶଣ୍ଟୀ ।
ଜିତେନ୍ଦ୍ର ସିଂହ ଦିଲ୍ଲୀରେ ଏକ ବିଶେଷ 'ସେବା' ଆରମ୍ଭ କରିଛନ୍ତି । ଏହି ସ୍ବତନ୍ତ୍ର 'ସେବା' ଅଧୀନରେ ଏପର୍ଯ୍ୟନ୍ତ 165 ମୃତଦେହ ସଂସ୍କାର କରିଛି ଏହି ଦଳ । ସେଥିମଧ୍ୟରୁ 35 ଟି ମୃତଦେହ ଏପରି ଥିଲା ଯେ ପରିବାରର କୌଣସି ସଦସ୍ୟ ଅନ୍ତିମ ସଂସ୍କାରରେ ଜଡିତ ନଥିଲେ ବୋଲି କହିଛନ୍ତି ଜିତେନ୍ଦ୍ର ସିଂହ ।
ଏନେଇ ଜିତେନ୍ଦ୍ର କହିଛନ୍ତି, 'ଏହା ବ୍ୟତୀତ ଆମେ 7ଟି ଅଚିହ୍ନା ମୃତଦେହ ମଧ୍ୟ ଦାହ କରିଛୁ ।' ସୂଚନା ଥାଉକି କୋରୋନା ଭାଇରସ୍ ଯୋଗୁଁ ଏପରି ଅନେକ ମୃତଦେହ ଅଛି ଯାହାକୁ ସେମାନଙ୍କ ପରିବାର ନେବାକୁ ଆସନ୍ତି ନାହିଁ । ଶେଷରେ ଡାକ୍ତରଖାନା ସାହାଯ୍ୟରେ ସେମାନଙ୍କୁ ଦାହ କରାଯାଇଥାଏ ।
ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ଜିତେନ୍ଦ୍ର ସିଂ ଶନ୍ତୀଙ୍କ ସମେତ ସମଗ୍ର ପରିବାର ନିକଟରେ କୋରୋନା ଭାଇରସ୍ ମହାମାରୀରେ ସଂକ୍ରମିତ ହୋଇଥିଲେ । ଏହି ସମୟରେ ମଧ୍ୟ ଜିତେନ୍ଦ୍ର ସିଂଙ୍କର ଆତ୍ମ ବିଶ୍ବାସ ଆଦୌ କମି ନଥିଲା । ସେ ଏହି ସଂକ୍ରମଣରୁ ସୁସ୍ଥ ହେବା ମାତ୍ରେ ନିଜ କାମକୁ ଫେରି ଯାଇଥିଲେ ଏବଂ ବର୍ତ୍ତମାନ ସେ ସମ୍ପୂର୍ଣ୍ଣ ଭଲ ଅଛନ୍ତି । ଜିତେନ୍ଦ୍ର ସିଂଙ୍କ ଏହି କାର୍ଯ୍ୟ ସୋସିଆଲ ମିଡିଆରେ ବହୁ ପ୍ରଶଂସା ପାଇବାରେ ଲାଗିଛି ।
