ବିଳାସପୁର: ଭାରତୀୟ ରେଳ ସେବାରେ ନୂତନ ଅଧ୍ୟାୟ ଯୋଡିଛି ଦକ୍ଷିଣ-ପୂର୍ବ ମଧ୍ୟ ରେଳବାଇର ବିଳାସପୁର ଡିଭିଜନ । ପ୍ରଥମ ଥର ତିନୋଟି ମାଲବାହୀକୁ ଯୋଡି ଗୋଟିଏ ମାଲବାହୀ ଟ୍ରେନ ଆକାରରେ ବିଳାସପୁର ଡିଭିଜନର ଲଜକୁରା ଷ୍ଟେସନରୁ ଚକ୍ରଧରପୁର ଯାଏଁ ଗଡିଛି ଟ୍ରିପଲ ଲଙ୍ଗ ହଲ୍ ରେକ ବା ସୁପର ଆନାକୋଣ୍ଡା । ଏହି ପ୍ରକ୍ରିୟାରେ 15000 ଟନ୍ରୁ ଉର୍ଦ୍ଧ୍ବ ଲୋଡ ନେଇ 174ଟି ବଗିକୁ ଏକକାଳୀନ ରେଳଲାଇନରେ ଗଡାଯାଇଥିଲା ।
ସୂଚନା ମୁତାବକ ଏହି ଟ୍ରିପଲ ଲଙ୍ଗ ହଲ୍ ରେକକୁ ଜଣେ ଲୋକୋ ପାଇଲଟ୍, ଜଣେ ସହାୟକ ଲୋକୋ ପାଇଲଟ୍ ଓ ଗୋଟିଏ ଇଞ୍ଜିନ ସହାୟତାରେ ପରିଚାଳିତ କରାଯାଇଥିଲା । ଭାରତୀୟ ରେଳ ବିଭାଗରେ ଏହି ଘଟଣା ଇତିହାସ ସୃଷ୍ଟି କରିଛି କହିଲେ କିଛି ଭୁଲ ହେବ ନାହିଁ । ପୂର୍ବରୁ ମାଲଗାଡି ଗୁଡିକୁ ଅଲଗା ଅଲଗା ପରିଚାଳିତ କରାଯାଉଥିବା ବେଳେ ପ୍ରଥମ ଥର ପାଇଁ ତିନୋଟି ମାଲଗାଡି ଏକକାଳୀନ ଚଲାଯାଇଥିଲା ।
ସେପଟେ ପୂର୍ବରୁ ଏପରି ଉଦ୍ୟମ ହୋଇଥିଲେ ମଧ୍ୟ ଏଥିରେ ତିନି ଜଣ ଲୋକୋ ପାଇଲଟ ଓ 3 ଜଣ ସହାୟକ ଲୋକୋ ପାଇଲଟ ରହିଥିଲେ । ହେଲେ ପ୍ରଥମ ଥର ପାଇଁ ମାତ୍ର ଜଣେ ଲୋକୋ ପାଇଲଟ ଓ ଜଣେ ସହାୟକ ଲୋକୋ ପାଇଲଟଙ୍କ ଦ୍ବାରା ତିନୋଟି ମାଲଗାଡିକୁ ଯୋଡା ଯାଇ ଏକକାଳୀନ ପରିଚାଳିତ କରାଯାଇଥିଲା । ତେବେ ଏହା କରିବା ପଛରେ ମୂଳ ଉଦ୍ଦେଶ୍ୟ ହେଉଛି ବର୍ତ୍ତମାନ ସମୟରେ ଅଳ୍ପ ସଂଖ୍ୟାକ କର୍ମଚାରୀଙ୍କ ଦ୍ବାରା କାର୍ଯ୍ୟ ସମ୍ପାଦନ କରିବା ।
ତେବେ ମଙ୍ଗଳବାର ଏକକାଳୀନ ତିନୋଟି ମାଲଗାଡି ଗଡାଇ ପ୍ରମାଣିତ କରାଯାଇଛି କି ଅଳ୍ପ ସଂଖ୍ୟକ କର୍ମଚାରୀଙ୍କ ଦ୍ବାରା ମଧ୍ୟ କାର୍ଯ୍ୟ ହୋଇପାରିବା ସହ ରେଳ ଲାଇନର ମଧ୍ୟ ସୁପରିଚାଳନା ହୋଇପାରୁଛି । ଏଥିରେ ସମୟ ମଧ୍ୟ ବଞ୍ଚିପାରିବା ସହ ଗ୍ରାହକଙ୍କ ପାଖରେ ଅଳ୍ପ ସମୟ ମଧ୍ୟରେ ଆବଶ୍ୟକୀୟ ସାମଗ୍ରୀ ପହଞ୍ଚା ଯାଇପାରିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
