ନୂଆଦିଲ୍ଲୀ: 1984 ଶିଖ ବିରୋଧୀ ଦଙ୍ଗାର ଦୋଷୀ ମହେନ୍ଦ୍ର ସିଂହ ଯାଦବଙ୍କ ଯାମିନ ଆବେଦନ ଖାରଜ କଲେ ସୁପ୍ରିମକୋର୍ଟ । ଯାଦବ କୋରୋନା ଭାଇରସରେ ସଂକ୍ରମିତ ଥିବା ହେତୁ ମଧ୍ୟବର୍ତ୍ତୀକାଳୀନ ଜାମିନ ପାଇଁ ଆବେଦନ କରିଥିଲେ । ହେଲେ କୋର୍ଟ ବୁଧବାର ତାଙ୍କ ଜାମିନ ଆବେଦନ ଖାରଜ କରିଛନ୍ତି ।
ସେ ବର୍ତ୍ତମାନ ଆଇସିୟୁରେ ଚିକିତ୍ସିତ ହେଉଥିବା ତାଙ୍କ ଓକିଲ ବସନ୍ତ ଫୁଲକା କୋର୍ଟଙ୍କୁ କହିଥିଲେ । ଯାଦବଙ୍କ ୱାର୍ଡ ବାହାରେ ଦୁଇଜଣ କନଷ୍ଟେବଳ ନିୟୋଜିତ ଥିବା ବେଳେ ତାଙ୍କ ସମ୍ପର୍କୀୟମାନେ ତାଙ୍କୁ ଦେଖା କରିବାକୁ ଚାହୁଁଛନ୍ତି ବୋଲି ଓକିଲ କହିଥିଲେ ।
ନିୟମ ଅନୁଯାୟୀ କୋରୋନା ରୋଗୀଙ୍କୁ ଭେଟିବାର ଅନୁମତି ଦିଆଯାଇନଥାଏ ବୋଲି ଜଷ୍ଟିସ ଇନ୍ଦିରା ବାନାର୍ଜୀ କହିଛନ୍ତି । ଏହା ବ୍ୟତୀତ ଯାଦବଙ୍କ ଆବେଦନ ଚିକିତ୍ସା ସମ୍ବନ୍ଧୀୟ କୌଣସି ଅଭିଯୋଗକୁ ସୂଚିତ କରୁନାହିଁ । ତେଣୁ ତାଙ୍କୁ ଜାମିନ ଦେବାକୁ ମନା କରିଦେଇଛନ୍ତି ସୁପ୍ରିମକୋର୍ଟ ।
