ନୂଆଦିଲ୍ଲୀ: ରାକ୍ଷୀ ପୂର୍ଣ୍ଣିମାରେ ଶହୀଦଙ୍କ ପତ୍ନୀଙ୍କୁ ଗାଁ ଲୋକଙ୍କ ଉପହାର । ଆଉ ଉପହାରଟି ହେଉଛି ଏକ ସୁନ୍ଦର କୋଠାଘର । ଏପରି ଦୃଶ୍ୟ ଦେଖିବାକୁ ମିଳିଛି ମଧ୍ୟପ୍ରଦେଶର ପିର ପିଲଲିଆ ଗାଁରେ। ଗାଁର କିଛି ଯୁବକ ମିଶି ଶହୀଦ ହାବିଲଦାର ମୋହନ ସିଂ ସୁନେରଙ୍କ ପତ୍ନୀଙ୍କୁ ଦେଇଛନ୍ତି 11 ଲକ୍ଷ ଟଙ୍କାର ଘର ।
1992 ଆତଙ୍କବାଦୀ ଆକ୍ରମଣରେ ଶହୀଦ ହୋଇଥିଲେ ମୋହନ ସିଂ ସୁନେର। ତାଙ୍କର ମୃତ୍ୟୁ ପରେ ଏକ ଛୋଟ ମାଟି କୁଡିଆରେ ରହୁଥିଲେ ତାଙ୍କ ପତ୍ନୀ ରାଜୁବାଈ ଓ ପରିବାର । ଆଉ ସରକାର ମାସକୁ 700 ଟଙ୍କା ଦେଇ ସାରିଦେଇଥିଲେ ଦାୟିତ୍ବ । ଗତ ବର୍ଷରୁ ରାଜୁ ଭାଇ ଗାଁର କିଛି ଯୁବକଙ୍କ ହାତରେ ପ୍ରତି ରାକ୍ଷୀ ପୂର୍ଣ୍ଣିମାରେ ରାକ୍ଷୀ ବାନ୍ଧୁଥିଲେ । ଆଉ ସେହି ଯୁବକମାନେ ଘର ଟିଏ ପାଇଁ ପ୍ରଶାସନ ନିକଟରେ ଅନେକ ଗୁହାରି କରିଛନ୍ତି । ହେଲେ କିଛି ସୁଫଳ ମିଳିନଥିଲା ।
ତେଣୁ ନିଜେ ଟଙ୍କା ସଂଗ୍ରହ କରି 11 ଲକ୍ଷ ମୂଲ୍ୟର ଏକ କୋଠାଘର ତିଆରି କରି ରାଜୁ ବାଈଙ୍କୁ ଏବର୍ଷ ରାକ୍ଷୀ ଉପହାର ଦେଇଛନ୍ତି । ଆଉ ଗୃହ ପ୍ରବେଶର ଦୃଶ୍ୟ ଦେଖିଲେ ଆପଣଙ୍କ ଆଖିରେ ବି ଲୁହ ଆସିଯିବ । ଗାଁର ସବୁ ଯୁବକମାନେ ନୂଆ ଘର ଆଗରେ ହାତ ରଖି ବସିଥିଲେ । ସେମାନଙ୍କ ହାତରେ ଚାଲିଚାଲି ଗୃହ ପ୍ରବେଶ କରିଥିଲେ ରାଜୁ ବାଈ ।
ଆଗାମୀ ଦିନରେ ଗାଁ ମୁଖ୍ୟ ରାସ୍ତାରେ ଶହୀଦ ମୋହନ ସିଂ ସୁନେରଙ୍କ ପ୍ରତିମୂର୍ତ୍ତି ତିଆରି କରିବା ପାଇଁ ଗାଁ ଲୋକଙ୍କର ଲକ୍ଷ୍ୟ ରହିଛି। ଏହାସହ ସେ ପାଠ ପଢ଼ିଥିବା ଗାଁ ସ୍କୁଲର ନାମ ତାଙ୍କ ନାମରେ ନାମିତ କରିବାକୁ ପ୍ରଶାସନକୁ ନିବେଦନ କରାଯିବ ବୋଲି ଗାଁ ଲୋକ ଚିନ୍ତା କରିଛନ୍ତି । ଗାଁ ଯୁବକଙ୍କ ଏହି ମହାନ କାମକୁ ପ୍ରଂଶସା କରିଛନ୍ତି ମଧ୍ୟପ୍ରଦେଶ ମୁଖ୍ୟମନ୍ତ୍ରୀ କମଲ ନାଥ । ସ୍ବାଧୀନତା ଦିବସ ଓ ରକ୍ଷା ବନ୍ଧନ ଅବସରରେ ଏହି କାମକୁ ମୁଁ ସାଲ୍ୟୁଟ କରୁଛି ବୋଲି କହିଛନ୍ତି ମୁଖ୍ୟମନ୍ତ୍ରୀ ।
