ଅମରାବତୀ: ବୃଦ୍ଧାବସ୍ଥାରେ ମାଆ ହେଲେ ମହିଳା । ଆପଣଙ୍କୁ ଆଶ୍ଚର୍ଯ୍ୟ ଲାଗିଲେ ବି ଘଟଣାଟି ନିରାଟ ସତ୍ୟ । ଆନ୍ଧ୍ରପ୍ରଦେଶ ଗୁଣ୍ଟୁରୁ ଅଞ୍ଚଳରେ ଘଟିଛି ଏହି ଘଟଣା ।
ପୂର୍ବ ଗୋଦାବରୀ ଜିଲ୍ଲାର ମଙ୍ଗୟଆମ୍ମା ନାମକ ବୃଦ୍ଧାଙ୍କ ବିବାହକୁ 57 ବର୍ଷ ପୁରିଲାଣି । ହେଲେ କୋଳକୁ ଆସିନଥିଲା ଗୋଟିଏ ବି ସନ୍ତାନ । ଆଜି ଏକ ଘରୋଇ ନର୍ସିଂହୋମରେ ସେ ଦୁଇ ଯମଜ ଶିଶୁଙ୍କୁ ପ୍ରସବ କରି ରେକର୍ଡ କରିଛନ୍ତି ।
1962 ମସିହାରେ ମଙ୍ଗୟାଆମ୍ମା ୟାରାମତି ରାମାରାରାଓଙ୍କୁ ବିବାହ କରିଥିଲେ । ହେଲେ ପରିବାରକୁ ଆସିନଥିଲା ସନ୍ତାନଟିଏ । ଅନେକ ଓଷାବ୍ରତ ପରେ ବି କିଛି ଲାଭ ହୋଇନଥିଲା । ଗତ ବର୍ଷ ସେ ଅହଲ୍ୟା ହସ୍ପିଟାଲ ସମ୍ପର୍କରେ ଜାଣିବା ପରେ ଚିକିତ୍ସା ପାଇଁ ଯାଇଥିଲେ । ସ୍ବାସ୍ଥ୍ୟପରୀକ୍ଷା ପରେ ସେ ସନ୍ତାନ ପ୍ରସବ ପାଇଁ ପ୍ରସ୍ତୁତ ବୋଲି ଡାକ୍ତର କହିଥିଲେ।
କିଛି ଦିନ ସେଠାରେ ଚିକିତ୍ସା ପରେ ସେ ଆଜି ସକାଳ 10.30ରେ ସେ ଅସ୍ତ୍ରୋପ୍ରଚାର ଦ୍ବାରା ଯମଜ ସନ୍ତାନ ଜନ୍ମ ଦେବାରେ ସଫଳ ହୋଇଥିଲେ । ଦୁଇ ସନ୍ତାନ ପାଇବା ପରେ ଏହି ବୃଦ୍ଧ ଦମ୍ପତିଙ୍କ ଖୁସି କହିଲେ ନସରେ । ଡାକ୍ତର ଉମା ଶଙ୍କର ତାଙ୍କର ଚିକିତ୍ସା କରୁଛନ୍ତି ।
