କୋଲକାତା: ପଶ୍ଚିମବଙ୍ଗର ଶାସକ ଦଳ ତୃଣମୂଳ କଂଗ୍ରେସ(ଟିଏମସି) ରବିବାର ଏହାର ଜାତୀୟ ସାଧାରଣ ସଚିବ ସୁବ୍ରତ ବକ୍ସି, ଥିଏଟର କଳାକାର ଅର୍ପିତା ଘୋଷ, ପୂର୍ବତନ କେନ୍ଦ୍ର ମନ୍ତ୍ରୀ ଦୀନେଶ ତ୍ରିବେଦୀ ଏବଂ ମୌସୁମ ନୁରଙ୍କୁ ଆଗାମୀ ରାଜ୍ୟସଭା ନିର୍ବାଚନରେ ପ୍ରାର୍ଥୀ ଘୋଷଣା କରିଛି ।
ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ଦଳର ସୁପ୍ରିମୋ ମମତା ବାନାର୍ଜୀ ଅନ୍ତର୍ଜାତୀୟ ମହିଳା ଦିବସ ଅବସରରେ ଏକ ଟ୍ବିଟ କରି ଏହି ଚାରିଜଣ ପ୍ରାର୍ଥୀଙ୍କ ନାମ ଘୋଷଣା କରିଛନ୍ତି । ଏହାସହ ମହିଳା ସଶକ୍ତିକରଣ ପ୍ରତି ମୋର ନିରନ୍ତର ଉଦ୍ୟମ ଜାରି ରହିଛି, ମୁଁ ଗର୍ବିତ ଯେ ଆମର ନାମାଙ୍କନ ଅଧା ଭାଗ ମହିଳାଙ୍କର ରହିଛି ବୋଲି ସେ କହିଛନ୍ତି ।
ଏହି ସମସ୍ତ ମନୋନୀତ ପ୍ରାର୍ଥୀ ପୂର୍ବତନ ଲୋକସଭା ସଦସ୍ୟ ରହିଛନ୍ତି । ବକ୍ସିଙ୍କୁ ବାଦ ଦେଇ କ ଅନ୍ୟ ତିନିଜଣ ଗତ ଲୋକସଭା ନିର୍ବାଚନରେ ବିଜେପି ପ୍ରାର୍ଥୀଙ୍କ ଠାରୁ ହାରିଯାଇଥିଲେ । ସୁବ୍ରତ ବକ୍ସି ଦୁଇଥର ସାଂସଦ ରହିଛନ୍ତି ।
ସୂଚନାଯୋଗ୍ୟ, ଆସନ୍ତା ୨୬ ତାରିଖରେ ରାଜ୍ୟସଭା ନିର୍ବାଚନ ଅନୁଷ୍ଠିତ ହେବ। ୧୭ ରାଜ୍ୟରେ ଖାଲିପଡ଼ିଥିବା ୫୫ ଆସନରେ ଏହି ନିର୍ବାଚନ ହେବ ।
@IANSଇନପୁଟ
