ମୁମ୍ବାଇ:ମହାରାଷ୍ଟ୍ରର ରାୟଗଡରେ ଥିବା ପାଞ୍ଚ ମହଲା କୋଠା ଭୁଶୁଡ଼ିବାର 36 ଘଣ୍ଟାରୁ ଅଧିକ ସମୟ ବିତିଗଲାଣି, କିନ୍ତୁ ଉଦ୍ଧାର କାର୍ଯ୍ୟ ଏବେ ବି ଜାରି ରହିଛି। ମଙ୍ଗଳବାର ବିଳମ୍ବିତ ରାତିରେ ଜଣେ ମହିଳାଙ୍କୁ ଜୀବନ୍ତ ଉଦ୍ଧାର କରାଯାଇଛି । ଏହି ମହିଳା 26 ଘଣ୍ଟା ଧରି ଆବର୍ଜନା ତଳେ ଫସି ରହିଥିଲେ । କୁହାଯାଉଛି ଯେ ମଙ୍ଗଳବାର ରାତି 10 ଟାରେ ଏନଡିଆରଏଫ ଟିମ୍ ମହିଳାଙ୍କୁ ବାହାରକୁ ଆଣିଥିଲେ ।
ସୂଚନାନୁସାରେ, ମହିଳାଙ୍କ ନାମ ମେହେରୁନିଶାନ ଅବଦୁଲ ହାମଦ କାଜୀ। ରାତି 10ଟାରେ ତାଙ୍କୁ ଏନଡିଆରଏଫ ଉଦ୍ଧାରକାରୀ ଦଳ ଜୀବନ୍ତ ବାହାରକୁ ଆଣିଥିଲେ। ଏହା ପରେ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ତାଙ୍କ ଅବସ୍ଥା ବର୍ତ୍ତମାନ ସ୍ଥିର ରହିଛି। ବର୍ତ୍ତମାନ ସୁଦ୍ଧା ଏହି ଦୁର୍ଘଟଣାରେ 8 ଜଣ ମହିଳାଙ୍କ ସମେତ 15 ଜଣଙ୍କର ମୃତ୍ୟୁ ହୋଇଛି। ଏଥିରେ 7 ପୁରୁଷ ଏବଂ 8 ଜଣ ମହିଳା ଅଛନ୍ତି । ଏହି ବିଲ୍ଡିଂରେ 40 ଟି ଫ୍ଲାଟ ଥିଲା । ଯେଉଁଥିରେ 84 ଜଣ ଲୋକ ବାସ କରୁଥିବା କୁହାଯାଇଛି ।
ସୂଚନାଥାଉକି, ମହାରାଷ୍ଟ୍ର ରାୟଗଡ ମହଦ ସହରର କାଜଲପୁର ଅଞ୍ଚଳରେ 5 ମହଲା କୋଠା ଭୁଶୁଡି ପଡିଥିଲା। ଦୁର୍ଘଟଣାରେ ଅନେକ ଲୋକ ଚାପି ହୋଇରହିଥିଲେ । ସେମାନଙ୍କ ମଧ୍ୟରୁ 16 ଜଣଙ୍କର ମୃତ୍ୟୁ ଘଟିଛି । ତେବେ ଘଟଣାକୁ ନେଇ ରାଷ୍ଟ୍ରପତିଙ୍କ ସମେତ ପ୍ରଧାନମନ୍ତ୍ରୀ ଦୁଃଖ ପ୍ରକାଶ କରିବା ସହ ଆହତଙ୍କର ଆଶୁ ଆରୋଗ୍ୟ କାମନା କରିଛନ୍ତି । ସେପଟେ ଘଟଣାରେ ପୋଲିସ 5 ଜଣଙ୍କ ନାମରେ ମାମଲା ରୁଜୁ କରିଛି । ତେବେ ବିଲଡିଂ ବିଲଡର ଫାରୁଖ କାଜୀ, ଆର୍କିଟେକ୍ଟ ଗୌରବ ଶାହା, ଆରସିସି ଉପଦେଷ୍ଟା ବାହୁବଲୀ ଧମାନେ, ମହଦ ପୌରପାଳିକାର କାର୍ଯ୍ୟନିର୍ବାହୀ ଦୀପକ ଝିଞ୍ଝର ଏବଂ ବିଲଡିଂ ଇନ୍ସପେକ୍ଟର ଶଶିକାନ୍ତ ଦିଘେଙ୍କ ବିରୋଧରେ ଅଭିଯୋଗ ହୋଇଛି।
