ଲକ୍ଷ୍ନୌ: ଆଗକୁ ସାଧାରଣ ନିର୍ବାଚନ । ଏନେଇ ସରଗରମ ରାଜନୀତି। ରାଜନେତାମାନେ ବିଭିନ୍ନ ପ୍ରକାର ରାଜନୈତିକ ପ୍ରଚାରରେ ବ୍ୟସ୍ତ । କଂଗ୍ରେସ ମହାସଚ୍ଚିବ ପ୍ରିୟଙ୍କା ଗାନ୍ଧୀ ଭଦ୍ରା ପ୍ରଚାର ପାଇଁ ଆଜି ଗଙ୍ଗା ଯାତ୍ରା ଆରମ୍ଭ କରି ରବିବାର ପାର୍ଟି କାର୍ଯ୍ୟାଳୟରେ ପହଞ୍ଚିଛନ୍ତି ।
ଜନତାଙ୍କ ନିକଟରେ ପହଞ୍ଚିବା ପାଇଁ ପ୍ରିୟଙ୍କା ଗଙ୍ଗା ବାଛିଛନ୍ତି । ଆଜି ପ୍ରୟାଗରାଜର ଛଟନାଗରୁ ବାରାଣାସୀର ଅଶି ଘାଟ ଯାଏଁ 140 କିଲୋମିଟର ଯାତ୍ରା କରିବେ ପ୍ରିୟଙ୍କା।
ତେବେ ପ୍ରିୟଙ୍କାଙ୍କ କହିବା ଅନୁସାରେ, 'ଗଙ୍ଗା ସତ୍ୟତା ଓ ସମତାର ପ୍ରତୀକ, ଏଠାରେ ନାହିଁ ଭେଦଭାବ। ଉତ୍ତରପ୍ରଦେଶର ସାହାରା ଗଙ୍ଗା। ମୁଁ ଗଙ୍ଗାର ସାହାର ନେଇ ମୋ ଜନତାଙ୍କ ନିକଟରେ ପହଞ୍ଚିବି ।'
ଏହାସହ ପ୍ରିୟଙ୍କା ଜନତାଙ୍କୁ ସାକ୍ଷାତ କରିବା ପାଇଁ ଜଳପଥ, ବସ , ଟ୍ରେନ ଏବଂ ପଦଯାତ୍ରା କରିବେ ବୋଲି କହିଛନ୍ତି। ପ୍ରିୟଙ୍କା କ୍ରମାଗତ ଭାବେ ଲକ୍ଷ୍ନୌ ଗସ୍ତରେ ରହିଛନ୍ତି। ଗଣମାଧ୍ୟମ, କୃଷକ,ଅଙ୍ଗନୱାଡି କର୍ମୀ,ପ୍ରାଥମିକ ବିଦ୍ୟାଳୟ ଶିକ୍ଷକ, ଦଳର କାର୍ଯ୍ୟକର୍ତ୍ତା ଏବଂ ନେତାଙ୍କ ସହ ସାକ୍ଷାତ କରିଛନ୍ତି ।
