ଲକ୍ଷ୍ନୌ: କଥାରେ ଅଛି ମଣିଷ ଠାରୁ ଅଧିକ ବିଶ୍ବସ୍ତ କୁକୁର। ଏମାନେ ପଶୁ ସିନା, ହେଲେ କେବେ କାହା ବିଶ୍ବାସକୁ ଭାଙ୍ଗିନଥାନ୍ତି। ଏମିତି ଏକ ଉଦାହରଣ ଦେଖିବାକୁ ମିଳିଛି ଉତ୍ତର ପ୍ରଦେଶର ବଣ୍ଡା ଅଞ୍ଚଳରେ। ଗୋଟିଏ ପୋଷା କୁକୁର ଜଣେ କି ଦୁଇ ଜଣ ନୁହେଁ ପ୍ରାୟ 30 ଜଣଙ୍କ ଜୀବନ ବଞ୍ଚାଇଛି।
ଏହି ଅଞ୍ଚଳରେ ଗୋଟିଏ ଚାରି ମହଲା ବିଶିଷ୍ଟ ବିଲ୍ଡିଂର ତଳ ମହଲାରେ ପ୍ରଥମେ ସର୍ଟ ସର୍କିଟରୁ ନିଆଁ ଲାଗିଥିଲା। ପରେ ଏକ ପୋଷା କୁକୁର ଏହି ନିଆଁ ଦେଖି ଜୋରରେ ଭୁକିବାକୁ ଲାଗିଥିଲା। ଯାହା ଫଳରେ ଦ୍ବିତୀୟ, ତୃତୀୟ ଓ ଚତୁର୍ଥ ମହଲାରେ ଥିବା ସମସ୍ତ ଲୋକ ନିଆଁ ଦେଖି ଘରୁ ବାହାରି ଆସିଥିଲେ।
ମାତ୍ର ତଳ ମହଲାରେ ଏକ ସିଲିଣ୍ଡର ବିସ୍ଫୋରଣ ହେବାରୁ କୁକୁରଟିର ସେଠାରେ ମୃତ୍ୟୁ ହୋଇଥିଲା। ମାତ୍ର ଏହି ଭୟାବହ ଅଗ୍ନିକାଣ୍ଡରୁ 30 ଜଣଙ୍କ ଜୀବନ ବଞ୍ଚିଯାଇଥିଲା। ପରେ ଖବର ପାଇ ଅଗ୍ନିଶମ ଟିମ ପହଞ୍ଚି ନିଆଁକୁ ଆୟତ୍ତ କରିଥିଲେ।
ତେବେ କୁକୁରକୁ ନେଇ ଏବେ ଚର୍ଚ୍ଚା ଜୋରଦାର। କାରଣ ବାରମ୍ବାର ଭୁକି ଲୋକମାନଙ୍କୁ ସଚେତନ କରି ଜୀବନ ବଞ୍ଚାଇଲା ସିନା ହେଲେ ନିଜ ଜୀବନ ଦେଲା ।
