ନ୍ୟୁୟର୍କ: ବର୍ତ୍ତମାନ ସମୟରେ ସ୍ମାର୍ଟଫୋନ ଆମମାନଙ୍କ ଦୈନନ୍ଦିନ ଜୀବନର ଏକ ଅବିଚ୍ଛେଦ୍ୟ ଅଂଶ ପାଲଟିଛି । ପ୍ରତ୍ୟେକ ସମୟରେ ଆମେ ଆମ ପାଖରେ ସ୍ମାର୍ଟଫୋନକୁ ଚାହିଁଥାଉ । ଦୈନନ୍ଦିନ ଜୀବନରେ ଆମ ସହିତ କ’ଣ ଘଟୁଛି, କିଛି ଭଲ କଥା କି କିଛି ଖରାପ ଘଟଣା ସମ୍ପର୍କରେ ଏହି ସ୍ମାର୍ଟଫୋନ ଜରିଆରେ ସାରା ବିଶ୍ବକୁ ଆମେ ଜଣାଉଛୁ । ତେବେ ଏଠାରେ ଗୋଟିଏ ମିନିଟ ନେଇ ଭାବନ୍ତୁ, କି ସ୍ମାର୍ଟଫୋନ ଜରିଆରେ ନିଜକୁ ପରିପ୍ରକାଶ କରିବା କେତେ ଦୂର ସୁରକ୍ଷିତ ?
ଏହି ବିଷୟକୁ ନେଇ ନିକଟରେ ହୋଇଥିବା ଏକ ଅଧ୍ୟୟନରି ଜଣା ପଡିଛି କି ବର୍ତ୍ତମାନ ସମୟରେ ଲୋକେ ଡେସ୍କଟପ ବା ଲାପଟପ ଅପେକ୍ଷା ସ୍ମାର୍ଟଫୋନ ଉପରେ ଅଧିକ ନିର୍ଭରଶୀଳ । ଏମିତିରେ ବ୍ୟକ୍ତି ନିଜ ସମ୍ବନ୍ଧୀୟ ଛୋଟ ବଡ ସମସ୍ତ ଘଟଣାରେ ସ୍ମାର୍ଟଫୋନ ଜରିଆରେ ବିଭିନ୍ନ ସୋସିଆଲ ମିଡିଆ ଆକାଉଣ୍ଟରେ ପ୍ରକାଶ କରିବାକୁ କେବେ କୁଣ୍ଠାବୋଧ ଅନୁଭବ କରେ ନାହିଁ । ବରଂ ସାମ୍ନା ସାମ୍ନା କଥା ହେବାରେ ଅସୁବିଧା ଅନୁଭବ କରୁଥିବା ଆଜିର ପୀଢି ପାଇଁ ସ୍ମାର୍ଟଫୋନ ପାଲଟିଛି ନୂଆ କମ୍ପର୍ଟ ଜୋନ । ସେ ଫୋନରେ ଘଣ୍ଟା ଘଣ୍ଟା ଧରି କଥା ହେବା ହେଉ କି ଫୋନରେ କିଛି ବ୍ୟକ୍ତିଗତ ତଥ୍ୟ ପ୍ରକାଶ କରିବା । ଏସମସ୍ତ କ୍ଷେତ୍ରରେ ସ୍ମାର୍ଟଫୋନ ଲୋକଙ୍କ ବିଶ୍ବାସର ପାତ୍ର ପାଲଟିଛି ।
ପ୍ରାୟ 3,69,161ଟି ଟ୍ବିଟ ଓ 10,185 ରେସ୍ତୋରାଁ ରିଭ୍ୟୁ ଦେଖି ଜଣା ପଡିଛି କି ଲୋକେ ଡେସ୍କଟପ ବା ଲାପଟପ ଅପେକ୍ଷା ସ୍ମାର୍ଟଫୋନ ଜରିଆରେ ନିଜକୁ ଅଧିକ ପରିପ୍ରକାଶ କରିବାକୁ ଚେଷ୍ଟା କରନ୍ତି । ଏମିତିରେ ଅଜାଣତରେ ବ୍ୟକ୍ତି ସ୍ମାର୍ଟଫୋନ ଜରିଆରେ ଅନେକ ବ୍ୟକ୍ତିଗତ ତଥ୍ୟ ପ୍ରକାଶ କରିଥାଏ । ଯାହା ଡେସ୍କଟପରେ ନିଜ ଭାବନ ପରିପ୍ରକାଶର ମାତ୍ରାଠରୁ ଢେର ଅଧିକ । ଅଧ୍ୟୟନରୁ ଏହା ମଧ୍ୟ ଜଣା ପଡିଛି କି ଡେସ୍କଟପ ବା ଲାପଟପ ବ୍ୟବହାର ସମୟରେ ବିଭିନ୍ନ ପପ୍-ଅପ୍ ଆଡକୁ ଲୋକେ ଅଣଦେଖା କରନ୍ତି । ହେଲେ ସ୍ମାର୍ଟଫୋନରେ ବିଭିନ୍ନ ଆଡକୁ ଲୋକେ କ୍ଲିକ କରି ଦେଖନ୍ତି ଓ ଅଜାଣତରେ ଲିକ କରନ୍ତି ବ୍ୟକ୍ତିଗତ ତଥ୍ୟ ।
ତେଣୁ ଏହା କୁହାଯାଇପାରେ କି ସ୍ମାର୍ଟଫୋନ ହେଉ କିମ୍ବା ଡେସ୍କଟପ, ପ୍ରତ୍ୟେକ ଗ୍ୟାଜେଟ ବ୍ୟବହାରର ଏକ ସୀମା ରହିବା ଉଚିତ୍ । ଏହା ଆପଣଙ୍କ ବ୍ୟକ୍ତିତ୍ବକୁ ଭିନ୍ନ ଆକରରେ ପରିପ୍ରକାଶ କରୁ , ଏହା ପୂର୍ବରୁ ଆପଣ ସାବଧାନ ହୁଅନ୍ତୁ ଓ ଏସବୁ କରିବାକୁ ନିଜକୁ ଦୂରେଇ ରଖନ୍ତୁ । ସ୍ମାର୍ଟଫୋନର ଭର୍ଚୁଆଲ ଦୁନିଆ ନୁହେଁ ବାସ୍ତବ ଦୁନିଆରେ ବଞ୍ଚିବାକୁ ଚେଷ୍ଟା କରନ୍ତୁ ।
