ଇସଲାମାବାଦ: ଭାରତର ଆକ୍ରମଣ ପରେ ଚେଇଁ ଉଠିଛି ପାକିସ୍ତାନ । ଦେଶରେ ଏକପ୍ରକାର ହଇଚଇ ସୃଷ୍ଟି ହୋଇଛି । ପାକ୍ ସୀମା ଡେଇଁ ଏହା ଉପରେ ଆକ୍ରମଣ କରିବା ପରେ ପାକିସ୍ତାନ ଭୟଭୀତ ହୋଇପଡିଛି । ପ୍ରଧାନମନ୍ତ୍ରୀ ଇମ୍ରାନ ଖାନ ଜରୁରୀକାଳୀନ ବୈଠକ ଡକାଇ ଦେଶର ବରିଷ୍ଠ ସେନା ଅଧିକାରୀଙ୍କ ସହ ଆଲୋଚନା କରିଛନ୍ତି ।
ତେବେ ପାକିସ୍ତାନର ଜାତୀୟ ସୁରକ୍ଷା କମିଟି(ଏନଏସସି) ଇମ୍ରାନଙ୍କ ସହ ବୈଠକ ପରେ ଭାରତକୁ ଚେତାବନୀ ଦେଇଛି । ଭାରତ ଏକ ଭୁଲ କରିଛି । ଏହା ଅକାରଣେ ଉତ୍ତେଜନା ସୃଷ୍ଟି କରିଛି । ଉଭୟ ଦେଶ ମଧ୍ୟରେ ଶାନ୍ତିପୂର୍ଣ୍ଣ ବାତାବରଣ ଥିବାବେଳେ ଭାରତ ଏଥିରେ ବ୍ୟାଘାତ ଆଣିଛି ବୋଲି ଏନଏସସି କହିଛି ।
ସାମ୍ୱାଦିକଙ୍କୁ ସୂଚନା ଦେଇ ଏହା କହିଛି ଯେ ଭାରତର ଏହି ପଦକ୍ଷେପ ବିରୋଧରେ ପାକ୍ ଜବାବ ଦେବ । ଏଥିପାଇଁ ଉପଯୁକ୍ତ ସମୟକୁ ଅପେକ୍ଷା କରାଯାଇଛି । ନିଜ ଇଚ୍ଛାରେ ସମୟ ଓ ସ୍ଥାନ ବାଛି ଏହା ଭାରତକୁ ସଠିକ ଜବାବ ଦେବ ବୋଲି ଏନଏସସି କହିଛି ।
ତେବେ ପ୍ରଥମେ ପାକିସ୍ତାନ ଏହି ଆକ୍ରମଣକୁ ସ୍ୱୀକାର କରୁନଥିଲା । ଭାରତର ବାୟୁସେନାର କିଛି ବିମାନ ପିଓକେ ମଧ୍ୟକୁ ପଶି ଆସିଥିଲା । ଯାହାକୁ ପାକିସ୍ତାନ ଘଉଡାଇ ଦେଇଥିଲା ବୋଲି କହିଥିଲା । କିନ୍ତୁ ପରେ ଏହି ଆକ୍ରମଣର ଭିଡିଓ ଆସିବା ପରେ ଏହାକୁ ମାନିଥିଲା । ଏବେ ଏହି ଆକ୍ରମଣର ଜବାବ ଦେବ ବୋଲି ଏହା ଭାରତକୁ ଧମକ ଦେଇଛି ।
ରିପୋର୍ଟ ଅନୁସାରେ ଫେବୃୟାରୀ 14ରେ ହୋଇଥିବା ପୁଲୱାମା ଆକ୍ରମଣର ପ୍ରତିଶୋଧ ନେଇଛି ଭାରତୀୟ ବାୟୁସେନା । ମଙ୍ଗଳବାର ଭୋର 3ଟା 30 ସମୟରେ ନିୟନ୍ତ୍ରଣ ରେଖା ପାର କରି ପିଓକେରେ ଥିବା ଆତଙ୍କବାଦୀ ଆଡ୍ଡା ଉପରେ ଭାରତୀୟ ବାୟୁସେନା ଆକ୍ରମଣ କରିଛି । ଏଥିରେ ପାଖାପାଖି ୨୫୦ରୁ ୩୦୦ ଆତଙ୍କବାଦୀ ନିହତ ହୋଇଥିବା ରିପୋର୍ଟ ମିଳିଛି ।
