ବେଙ୍ଗାଲୁରୁ: ବେଆଇନ ଭାବେ ବାଇକ ଚଲାଇବା ପଡିଲା ମହଙ୍ଗା । ଟ୍ୟାକ୍ସି ସେବା ପ୍ରଦାନକାରୀ ସଂସ୍ଥା ଓଲାକୁ ବେଙ୍ଗାଲୁରୁରେ 6 ମାସ ପାଇଁ ବ୍ୟାନ କରାଯାଇଛି । କର୍ଣ୍ଣାଟକ ପରିବହନ ବିଭାଗ ପକ୍ଷରୁ ସଂସ୍ଥାକୁ ଏହି ସୂଚନା ଦିଆଯାଇଛି ।
ମାର୍ଚ୍ଚ 18ରେ ପ୍ରକାଶ ପାଇଥିବା ଏହି ବିଜ୍ଞପ୍ତି ଅନୁସାରେ ଓଲା ବେଙ୍ଗାଲୁରୁରେ ମୋଟର କ୍ୟାବ ଚଲାଇବାରେ ଅନୁମତି ପାଇଥିଲା । ଏଥିପାଇଁ ପରିବହନ ବିଭାଗ ପକ୍ଷରୁ ସଂସ୍ଥାକୁ ଲାଇସେନ୍ସ ଦିଆଯାଇଥିଲା । କିନ୍ତୁ ବିଭାଗର ବିନା ଅନୁମତିରେ ଓଲା ବାଇକ ଟ୍ୟାକ୍ସି ସର୍ଭିସ ଆରମ୍ଭ କରିଥିଲା । ଯାହା ପୂର୍ବରୁ ଥିବା ନିୟମ ଭଙ୍ଗ କରିଥିଲା । ଏଥିପାଇଁ ବିଭାଗ ପକ୍ଷରୁ ଏହାକୁ ବ୍ୟାନ କରାଯିବା ସହ ଏହାର ଲାଇସେନ୍ସ ରଦ୍ଦ କରାଯାଇଛି।
ପରିବହନ କମିଶନର ଭି ପି ଇକ୍କେରି କହିଛନ୍ତି ଯେ ବେଙ୍ଗାଲୁରୁରେ ଓଲା ଟ୍ୟାକ୍ସି ଚଲାଉଥିବା ଅନୀଲ ଟେକ୍ନୋଲୋଜି ପ୍ରାଇଭେଟ ଲିମିଟେଡକୁ 6 ମାସ ପାଇଁ ବାସନ୍ଦ କରାଯାଇଛି । କମ୍ପାନୀକୁ ଏହି ନୋଟିସ ଦିଆଯାଇଥିବାବେଳେ ଏହା ପାଇବାର 3 ଦିନ ମଧ୍ୟରେ ଲାଇସେନ୍ସ ଦାଖଲ କରିବାକୁ ଓଲାକୁ ନିର୍ଦ୍ଦେଶ ଦିଆଯାଇଛି । 2016 ଟ୍ରାନ୍ସପୋର୍ଟ ଟେକ୍ନୋଲୋଜି ସଂଶୋଧନ ନିୟମାନୁସାରେ ଓଲାକୁ ଏହି ବାସନ୍ଦାଦେଶ ହୋଇଛି ବୋଲି ସେ କହିଛନ୍ତି ।
ଏହା ଅନୁସାରେ ସହରରେ ମୋଟର କ୍ୟାବ ଚଲାଇବାକୁ ଅନୁମତି ପାଇଥିବା ଓଲା ଗତ ଏକ ମାସ ମଧ୍ୟରେ 260ଟି ବାଇକରେ ସର୍ଭିସ ଆରମ୍ଭ କରିଛି । ମୋଟର କ୍ୟାବ ଚଲାଇବା ପାଇଁ ଓଲାକୁ ଜୁନ 2016ରୁ ଜୁନ 19, 2021 ଯାଏଁ ଅନୁମତି ମିଳିଥିଲା । ତେବେ ବାସନ୍ଦାଦେଶ ପରେ ଓଲା ନିୟମ ପାଳୁଛି ନା ଉଲ୍ଲଙ୍ଘନ କରୁଛି ତାହା ଉପରେ ନଜର ରଖିବାକୁ ପରିବହନ ବିଭାଗ ଆରଟିଓକୁ ନିର୍ଦ୍ଦେଶ ଦେଇଛି ।
