ହାଇଦ୍ରାବାଦ: ହ୍ବାଟ୍ସଆପର ବ୍ୟବହାର ଆଜିକାଲି କାହାକୁ ବା ଅଛପା । ସମସ୍ତେ ଏହା ବି ଜାଣନ୍ତି କି ଗୋଟିଏ ନମ୍ବରରେ ଗୋଟିଏ ହିଁ ହ୍ବାଟ୍ସଆପ୍ ଆକାଉଣ୍ଟ ଅପରେଟ କରାଯାଇପାରେ । ହେଲେ ଏବେ ଏହି ଚିନ୍ତାରୁ ୟୁଜର୍ସଙ୍କୁ ମୁକ୍ତ କରିବା ପାଇଁ ରବିବାର ହ୍ବାଟ୍ସଆପ୍ ଘୋଷଣା କରିଛି ନିଜର ନୂଆ ଫିଚର । ଏହି ଫିଚର ମୁତାବକ ଏବେ 4ଟି ଡିଭାଇସରୁ ଗୋଟିଏ ହ୍ବାଟ୍ସଆପ୍ ଆକାଉଣ୍ଟକୁ ପରିଚାଳିତ କରିପାରିବେ ୟୁଜର୍ସ ।
ନିକଟରେ WABetaInfo କରିଥିବା ଟ୍ବିଟରେ ସ୍ପଷ୍ଟ ହୋଇଛି କି ଏକକାଳୀନ 4ଟି ଡିଭାଇସରୁ ଗୋଟିଏ ହ୍ବାଟ୍ସଆପ୍ ଆକାଉଣ୍ଟ ପରିଚାଳନା ପାଇଁ ଫିଚରଟି ବିକଶିତ କରାଯାଉଛି । ଏହାର କାର୍ଯ୍ୟ ବର୍ତ୍ତମାନ ଶେଷ ହୋଇନଥିଲେ ମଧ୍ୟ ଏହା ୟୁଜର୍ସଙ୍କୁ ନିଶ୍ଚୟ ପସନ୍ଦ ଆସିବା ବୋଲି କମ୍ପାନୀ ଆଶାବାଦୀ ରହିଛି । ଏହି ଫିଚର ଉଭୟ ଆଣ୍ଡ୍ରଏଡ ଓ ଆଇଓଏସ ପାଇଁ ରୋଲ ଆଉଟ ହେବ ବୋଲି କମ୍ପାନୀ ସ୍ପଷ୍ଟ କରିଛି । ହେଲେ ଏହି ଫିଚରକୁ ନେଇ ଏବେଠାରୁ ଅନେକ ପ୍ରଶ୍ନ ମଧ୍ୟ ସୃଷ୍ଟି ହୋଇଛି । ଯେମିତିକି ଏହି ଫିଚର ଦ୍ବାରା ପ୍ରାଇଭେସିକୁ ନେଇ କୌଣସି ଅସୁବିଧା ସୃଷ୍ଟି ହେବ କି ?
ଏହାର ଉତ୍ତର ଏଯାଏଁ କମ୍ପାନୀ ଦେଇନଥିବା ବେଳେ ଏହି ଫିଚରର ଟେଷ୍ଟିଂ ଜାରି ରହିଥିବା ଜଣା ପଡିଛି । ଏଥିସହ ଆଗକୁ ୟୁଜର୍ସ ଚାହିଁଲେ ଚାରିଖ ଅନୁସାରେ ଚାଟ୍କୁ ସର୍ଚ୍ଚ କରିପାରିବେ ବୋଲି କମ୍ପାନୀ ସୂଚନା ଦେଇଛି । ଏହି ଫିଚରର ଟେଷ୍ଟିଂ ମଧ୍ୟ ଜାରି ରହିଛି । ଖୁବଶୀଘ୍ର ଉଭୟ ଫିଚର ହ୍ବାଟ୍ସଆପ୍ର ନୂଆ ଅପଡେଟ ସହ ଉପଲବ୍ଧ ହେବ ବୋଲି କମ୍ପାନୀ ସ୍ପଷ୍ଟ କରିଛି ।
@IANS
