ଓସାକା: ଜାପାନରେ ଅନୁଷ୍ଠିତ ଜି-20 ସମ୍ମିଳନୀ ଅବସରରେ ଭାରତ-ଆମେରିକା-ଜାପାନ ମଧ୍ୟରେ ତ୍ରିପାକ୍ଷିକ ଆଲୋଚନା ହୋଇଛି । ଏଥିରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ଜାପାନ ପ୍ରଧାନମନ୍ତ୍ରୀ ସିଞ୍ଜୋ ଆବେ ଓ ଆମେରିକା ରାଷ୍ଟ୍ରପତି ଭାଗ ନେଇଛନ୍ତି । ଏଥିରେ ତିନି ଦେଶ ଶାନ୍ତି ମୈତ୍ରୀ ସ୍ଥାପନ ଦିଗରେ କାର୍ଯ୍ୟକରିବେ ବୋଲି ପ୍ରତିଶ୍ରୁତିବଦ୍ଧ ହୋଇଛନ୍ତି ।
ଆମେରିକା ରାଷ୍ଟ୍ରପତି ଆଲୋଚନା ଅବସରରେ ପୁନଃ ପ୍ରଧାନମନ୍ତ୍ରୀ ହେବା ପାଇଁ ମୋଦି ଓ ସିଞ୍ଜୋଙ୍କୁ ଅଭିନନ୍ଦନ ଜଣାଇଛନ୍ତି । ଉଭୟ ନିଜ ନିଜ ଦେଶରେ ଭଲ କାମ କରୁଥିବା କଥା ମଧ୍ୟ ଟ୍ରମ୍ପ ପ୍ରକାଶ କରିଛନ୍ତି ।
ଆର୍ଜେଣ୍ଟିନାରେ ହୋଇଥିବା ପ୍ରଥମ ତ୍ରିପାକ୍ଷିକ ଆଲୋଚନାରେ ଜେଏଆଇ (ଜାପାନ-ଆମେରିକା-ଭାରତ) ବା ଜୟ ଶବ୍ଦ ପ୍ରଚଳନ କରାଯାଇଥିଲା । ଯାହା ତିନି ଦେଶ ମଧ୍ୟରେ ଶାନ୍ତି, ମୈତ୍ରୀ, ସ୍ଥିରତା ବଜାୟ ରଖିବା ଲକ୍ଷ୍ୟ ରଖାଯାଇଥିଲା ବୋଲି ମୋଦି କହିଛନ୍ତି । ଏହାପରେ ଜାପାନରେ ଦ୍ବିତୀୟ ଥର ପାଇଁ ଏହି ତ୍ରିପାକ୍ଷିକ ଆଲୋଚନା ହୋଇଛି । ଆମେ ସକରାତ୍ମକ ଆଲୋଚନା କରିଛୁ । ଯାହା ଆମ ତିନି ଦେଶର ସମାନ ଅଭିରୁଚି ରହିଛି । ଏହି ଆଲୋଚନା ବିଭିନ୍ନ ପ୍ରସଙ୍ଗ ଉପରେ ହୋଇଥିବା ମୋଦି ସୂଚନା ଦେଇଛନ୍ତି ।
ଜାପାନରେ ଅନୁଷ୍ଠିତ 14ତମ ଜି-20 ସମ୍ମିଳନୀରେ ଭାରତ ସମେତ ଆୟୋଜକ ଜାପାନ, ବ୍ରିଟେନ, ୟୁରୋପିଆନ ୟୁନିୟନ, ଆର୍ଜେଣ୍ଟିନା, ଅଷ୍ଟ୍ରେଲିଆ ଭଳି 20ଟି ଦେଶ ଭାଗ ନେଇଛନ୍ତି ।
