ବେଙ୍ଗାଲୁରୁ: କଂଗ୍ରେସ ପ୍ରତି ମଲ୍ଲିକାର୍ଜୁନ ଖଡଗେଙ୍କ ଅବଦାନ ଅପୂରଣୀୟ । ଦଳ ପାଇଁ ଖଡଗେ ଯେତିକି ନିଷ୍ଠା ଓ ପରାକାଷ୍ଠା ଦେଖାଇଛନ୍ତି, ହୁଏତ କଂଗ୍ରେସ ତାଙ୍କୁ ସେତିକି ସମ୍ମାନ ଦେଇପାରିନି । ତାଙ୍କ ପ୍ରତି ଦଳ ଅନ୍ୟାୟ କରିଥିବା ମୋର ମନେ ହେଉଛି । ଶେଷ ପର୍ଯ୍ୟାୟ ନିର୍ବାଚନ ପୂର୍ବରୁ ଏଭଳି ଚମକାଇ ଦେଲା ଭଳି ବୟାନ ଦେଇଛନ୍ତି କର୍ଣ୍ଣାଟକ ମୁଖ୍ୟମନ୍ତ୍ରୀ ଏଚ.ଡି. କୁମାରସ୍ବାମୀ ।
ମଙ୍ଗଳବାର ଏକ ନିର୍ବାଚନ ରାଲିରେ ବରିଷ୍ଠ କଂଗ୍ରେସ ନେତା ମଲ୍ଲିକାର୍ଜୁନ ଖଡଗେଙ୍କ ଉପରେ ଏଭଳି ମନ୍ତବ୍ୟ ଦେଇଥିଲେ କୁମାରସ୍ବାମୀ । ସେ କହିଥିଲେ, ‘ଦଳ ପାଇଁ ଖଡଗେ ଯେତିକି କାମ କରିଛନ୍ତି, ଦଳ ତାଙ୍କୁ ସେତିକି ମୂଲ୍ୟ ଦେଇପାରିନାହିଁ । ନହେଲେ ବହୁ ପୂର୍ବରୁ ଖଡଗେ ମୁଖ୍ୟମନ୍ତ୍ରୀ ହୋଇଥାନ୍ତେ ।’
ସୂଚନାଯୋଗ୍ୟ, ଲୋକସଭାରେ କଂଗ୍ରେସର ମଙ୍ଗ ଧରି କର୍ଣ୍ଣାଟକ ଗୁଲବର୍ଗା ଲୋକସଭା ଆସନରୁ 2 ଥର ହେଲା ନିର୍ବାଚିତ ହୋଇଆସୁଛନ୍ତି ଖଡଗେ ।
