ମୁମ୍ବାଇ: ମହାରାଷ୍ଟ୍ର ଚନ୍ଦ୍ରପୁରରେ ଆଶ୍ଚର୍ଯ୍ୟଜନକ ଘଟଣା । ପତ୍ନୀଙ୍କ ମୃତ୍ୟୁ ପରେ ସଂସ୍କାର ବେଳେ ଜୁଇକୁ ଡେଇଁ ପତିର ଆତ୍ମହତ୍ୟା ଉଦ୍ୟମ । ଚଳିତ ବର୍ଷ 19 ମାର୍ଚ୍ଚରେ ବିବାହ କରିଥିଲେ ମୃତା ରୁଚିତା ଏବଂ କିଶୋର । ପତ୍ନୀଙ୍କ ଅକାଳ ମୃତ୍ୟୁରେ ଭାଙ୍ଗି ପଡିଥିବା କିଶୋର ପରିବାର ସହ ଅନ୍ତିମ ସଂସ୍କାର ପାଇଁ ଶଶ୍ମାନକୁ ଯାଇଥିଲେ । କିନ୍ତୁ ପତ୍ନୀଙ୍କ ବିନା ଆଗକୁ ବଞ୍ଚିବା କଷ୍ଟକର ଭାବି ସେ ଜୁଇ ନିଆଁକୁ ଡେଇଁ ପଡିଥିଲେ ।
ଫଳରେ ଘଟଣାସ୍ଥଳରେ ଉପସ୍ଥିତ ଥିବା ଗ୍ରାମବାସୀ ତାଙ୍କୁ ଉଦ୍ଧାର କରିଥିଲେ । ପତ୍ନୀଙ୍କ ଅନୁପସ୍ଥିତି ସହ୍ୟ କରିପାରୁନଥିବା କିଶୋର ଆତ୍ମହତ୍ୟା ଉଦ୍ୟମ କରି ବର୍ତ୍ତି ଯାଇଥିଲେ । କିନ୍ତୁ ଘରକୁ ଆସିବା ପରେ ପତ୍ନୀଙ୍କ ମୃତଦେହ ମିଳିଥିବା କୂଅକୁ ଡେଇଁ ସେ ପୁଣି ଆତ୍ମହତ୍ୟା କରିଥିଲେ ।
ସୂଚନା ଅନୁସାରେ, ମୃତ୍ୟୁ ବେଳକୁ ତିନି ମାସର ଗର୍ଭବତୀ ଥିଲେ ରୁଚିତା । ଘଟଣା ପୂର୍ବ ରାତିରେ ଘର ପଛ ପଟେ ଥିବା ବାଡିକୁ ଯାଇଥିଲେ । ହେଲେ ଅନେକ ସମୟ ଯାଏଁ ଘରକୁ ନଫେରିବାରୁ ପରିବାର ଖୋଜାଖୋଜି ଆରମ୍ଭ କରିଥିଲେ । ଶେଷରେ କୂଅ ନିକଟରେ ତାଙ୍କ ଚପଲ ମିଳିବା ପରେ ପୋଲିସକୁ ଖବର ଦେଇଥିଲେ ପରିବାର । ବହୁ ଖୋଜାଖୋଜି ପରେ ରୁଚିତାଙ୍କ ମୃତଦେହ କୂଅରୁ ମିଳିଥିଲା।
