ସାରା ବିଶ୍ବକୁ ବର୍ତ୍ତମାନ କଲବଲ କରିବାରେ ଲାଗିଛି କୋରୋନା ମହାମାରୀ । ଏହାର ପ୍ରଭାବରେ ବିଶ୍ବବ୍ୟାପୀ ସମସ୍ତ ଦେଶର ଅର୍ଥନୀତି ଓ ସାମାଜିକ ବିକାଶରେ ଲାଗିଛି ପ୍ରତିବନ୍ଧକ । ଗୋଟିଏ ପଟେ ଦେଶରେ ବ୍ୟାପକ କ୍ଷୟକ୍ଷତି ହେଉଥିବା ବେଳେ ଦେଶର ନାଗରିକଙ୍କ ସୁରକ୍ଷା ପାଇଁ ଲାଗୁ ହୋଇଥିଲା ଲକଡାଉନ ଓ ସଟଡାଉନ କଟକଣା । ଏହା ଦ୍ବାରା ଲୋକେ ଭୂତାଣୁ ସଂକ୍ରମଣରୁ ଅନେକାଂଶରେ ରକ୍ଷା ପାଇଲେ ସତ, ହେଲେ ବିଗିଡିଗଲା ଅର୍ଥବ୍ୟବସ୍ଥା । ଯାହାକୁ ନଜରରେ ରଖି ଧିରେ ଧିରେ କୋହଳ ହୋଇଛି ଅନେକ କଟକଣା ।
ତେବେ ଅନେକ ଲୋକେ ଏହି ଲକଡାଉନ ଓ ସଟଡାଉନ ଶବ୍ଦ ପ୍ରଥମ ଥର ଶୁଣୁଥିବା ବେଳେ ଭାରତରେ ଏହାର ଇତିହାସ ବହୁତ ପୁରୁଣା । ସମାନ ଭାବେ ଦେଶରେ ମହାମାରୀର ଇତିହାସ ମଧ୍ୟ ଢେର ପୁରୁଣା । ତାହେଲେ ଆସନ୍ତୁ ଜାଣିବା ଭାରତରେ ମହାମାରୀ ଓ ଲକଡାଉନକୁ ନେଇ କ’ଣ ରହିଛି ଇତିହାସ...
ପୂର୍ବରୁ ଉନବିଂଶ ଓ ବିଂଶ ଶତାବ୍ଦୀରେ ଦେଶକୁ କବଳିତ କରିଥିଲା ହଇଜା ଓ ପ୍ଲେଗ ପରି ମହାମାରୀ । ଏହାର ଦେଶ ଉପରେ ଅତି ଭୟଙ୍କର ପ୍ରଭାବ ପଡିଥିଲା । ଇଂରେଜ ଶାସନ ସମୟରେ କେବଳ ଥରେ ନୁହେଁ ଅନେକ ଥର ହଇଜା ମହାମାରୀର ପ୍ରାଦୁର୍ଭାବ ଦେଖିବାକୁ ମିଳିଥିଲା । ଯାହାକୁ ନିୟନ୍ତ୍ରଣ କରିବା ପାଇଁ ଗୋରା ସରକାର ପ୍ରଭାବିତ ଅଞ୍ଚଳରେ ଲକଡାଉନ ନିର୍ଦ୍ଦେଶ ଦେଇଥିଲେ । ହେଲେ ସେତେବେଳେ ଲକଡାଉନ ନୁହେଁ ବରଂ ହଲି ଡେ’ ଶବ୍ଦର ପ୍ରଚଳନ ଥିଲା । ତେବେ ସେ ସମୟରେ ମଧ୍ୟ କଣ୍ଟେନମେଣ୍ଟ ଜୋନ, ଆଇସୋଲେସନ ଓ ପ୍ରବାସୀଙ୍କଠାରୁ ସଂକ୍ରମଣର ଭୟ ଆଦି ରହିଥିଲା । ବର୍ତ୍ତମାନର କୋଭିଡ-19 ସମୟରେ ମଧ୍ୟ ଏହି ସମାନ ଶବ୍ଦର ପ୍ରୟୋଗ ଓ କଟକଣାର ପ୍ରଚଳନ ରହିଛି ।
ଇତିହାସରେ ଏହିପରି ଲକଡାଉନ ପ୍ରଚଳନର ପ୍ରମାଣ ସ୍ବରୂପ ଗୋରା ସରକାର ସମୟର ଦସ୍ତାବିଜ ମହଜୁଦ ରହିଛି । ସେ ସମୟରେ ସରକାରୀ ଭାବେ କେଉଁମାନେ କ୍ବାରେଣ୍ଟାଇନରେ ଥିଲେ ଓ କେତେ ଦିନ ରହିଥିଲେ ତାହା ଦସ୍ତାବିଜରେ ସ୍ପଷ୍ଟ ଉଲ୍ଲେଖ ରହିଛି । ଏନେଇ ବ୍ରିଟିଶ ଇଣ୍ଡିଆର ସରକାରୀ ରେକର୍ଡ ନ୍ୟାସନାଲ ଆର୍କାଇଭ୍ସ ଅଫ ଇଣ୍ଡିଆ(ଏନଏଆଇ)ରେ ସମସ୍ତ ଦସ୍ତାବିଜ ଦେଖାଯାଇପାରେ । ଏଥିରେ ଦେଖାଯାଇଛି କି ଇତିହାସରେ ଯେବେ କେବେ ବି ଏହି ପରି ମହାମାରୀ ପରିସ୍ଥିତି ସୃଷ୍ଟି ହୋଇଛି, ସେ ସମୟରେ ପ୍ରଭାବିତ ଅଞ୍ଚଳରୁ ଅନ୍ୟ ସୁରକ୍ଷିତ ଅଞ୍ଚଳ ମଧ୍ୟରେ ଯାତାୟତ ଓ ବାଣିଜ୍ୟ ବେପାର ସୀମାକୁ ବନ୍ଦ କରିଦିଆଯାଇଛି ।
ବର୍ତ୍ତମାନ ସମୟରେ ଯେପରେ ମହାମାରୀରେ କଲବଲ ହୋଇ ପ୍ରବାସୀମାନେ ନିଜ ଘରକୁ ବାହୁଡିଥିଲେ, ପୂର୍ବରୁ ପ୍ଲେଗ ଓ ହଇଜା ମହାମାରୀ ସମୟରେ ମଧ୍ୟ ସମାନ ସ୍ଥିତି ଦେଖିବାକୁ ମିଳିଥିଲା । ତେବେ ସେ ସମୟରେ ଡର ଥିଲା କି ସହରରେ କାମ କରୁଥିବା ପ୍ରବାସୀ ଯଦି ମାତ୍ରାଧିକ ସଂଖ୍ୟାରେ ଘରକୁ ଫେରନ୍ତି ତାହେଲେ ସେମାନଙ୍କଠାରୁ ସଂକ୍ରମଣର ଭୟ ରହୁଥିଲା । ତେଣୁ ସେମାନଙ୍କୁ ଘରଠାରୁ 3 କିଲୋମିଟର ମଧ୍ୟରେ ହିଁ ଚାକିରୀ ଯୋଗାଇ ଦେବାର ବ୍ୟବସ୍ଥା କରାଯାଉଥିଲା । ଏହାଦ୍ବାରା ସେମାନଙ୍କୁ ବାରମ୍ବାର ରୋଜଗାର ପାଇଁ ବାହାରକୁ ଯିବାକୁ ପଡୁନଥିଲା । ଏଥିସହ ସେମାନଙ୍କୁ ସାହାଯ୍ୟ ପାଇଁ 32 ଦିନର ଦରମା ଅଗ୍ରୀମ ଭାବେ ମଧ୍ୟ ଦେବାର ବ୍ୟବସ୍ଥା ରଖିଥିଲେ ଗୋରା ସରକାର ।
ବ୍ରିଟିଶ ଶାସନ କାଳରେ ଦେଖା ଦେଇଥିବା ମହାମାରୀର ମୁକାବିଲା ପାଇଁ କେତେକ ସ୍ବତନ୍ତ୍ର ରଣନୀତି ପ୍ରସ୍ତୁତ ହୋଇଥିଲା । ଏଥିପାଇଁ ଲୋକଙ୍କ ମାସେ ଯାଏଁ ଘରେ ରହିବାକୁ ନିର୍ଦ୍ଦେଶ ଦିଆଯାଉଥିଲା । ସହଯୋଗ ପାଇଁ ସେମାନଙ୍କୁ ମାସକର ଦରମା ମଧ୍ୟ ଅଗ୍ରୀମ ଭାବେ ଦିଆଯାଉଥିଲା । ସେପଟେ ବାହାରୁ ଆସିଥିବା ପ୍ରବାସୀମାନଙ୍କୁ ଛୋଟ ଛୋଟ ଦଳ ଆକାରରେ ଗାଁରେ ପ୍ରବେଶ କରିବାକୁ ଅନୁମତି ମିଳୁଥିଲା ।
