ମୁମ୍ବାଇ: କୋରୋନା ସଂକ୍ରମଣର ଭୟ ଏତେ ଅଧିକ ମାତ୍ରାରେ ସମସ୍ତଙ୍କୁ ଗ୍ରାସ କରିଛି କି ସଂକ୍ରମଣ ନାଁ ଶୁଣିଲେ ଠିକ୍ ଭୁଲ ବିଚାର କରିବାର କ୍ଷମତା ହରାଉଛି ମଣିଷ । ଏମିତିରେ କୋରୋନା ମହାମାରୀ ପରି ଘଡିସନ୍ଧି ମୁହୂର୍ତ୍ତର ସୁଯୋଗ ନେଇ ଲାଭ ଉଠାଉଛନ୍ତି କିଛି ଯୌନ ପୀପାଷୁ । ଏହାର ଏକ ଉଦାହରଣ ଦେଖିବାକୁ ମିଳିଛି ମହାରାଷ୍ଟ୍ରର ଅମରାବତୀରେ ଥିବା ବେଡନରା ଅଞ୍ଚଳରେ । ଯେଉଁଠାରେ ଜଣେ 24 ବର୍ଷୀ ଯୁବତୀଙ୍କର ଯୌନାଙ୍ଗରୁ ସ୍ବାବ ନମୂନା ସଂଗ୍ରହ କରାଯାଇଥିବା ଦେଖାଯାଇଛି ।
ଘଟଣା ଅନୁଯାୟୀ ସମ୍ପୃକ୍ତ ଯୁବତୀ ଏକ ମଲରେ କାମ କରୁଥିବା ବେଳେ ସେ ଜଣେ କୋରୋନା ସଂକ୍ରମିତଙ୍କ ସଂସ୍ପର୍ଷରେ ଆସିଥିଲେ । ଏହାପରେ କଣ୍ଟାକ୍ଟ ଟ୍ରେସିଂ ଦ୍ବାରା ଯୁବତୀଙ୍କ ସମେତ ମଲର 20 ଜଣଙ୍କର କୋରୋନା ଟେଷ୍ଟ କରାଯାଇଥିଲା । ସମସ୍ତଙ୍କ ରିପୋର୍ଟ ନେଗେଟିଭ ଆସିଥିବା ବେଳେ ଯୁବତୀଙ୍କ ରିପୋର୍ଟ ପଜିଟିଭ ଥାଇ ତାଙ୍କର ୟୁରିନ ଟେଷ୍ଟ କରିବା ପାଇଁ କୁହାଯାଇଥିଲା । ତେବେ ସମସ୍ତଙ୍କ ଟେଷ୍ଟିଂ ବଡନେରାସ୍ଥିତ ଟ୍ରୋମା କେୟାର କୋରୋନା ଟେଷ୍ଟିଂ ଏକ୍ସପେରିମେଣ୍ଟ ସ୍କୁଲରେ ହେଉଥିବା ବେଳେ ଯୁବତୀଙ୍କ ରିପୋର୍ଟ ପଜିଟିଭ ଆସିଥିବା ଖବର ଦେଇଥିଲେ ସେଠାରେ କାର୍ଯ୍ୟରତ ଟେକ୍ନିସିଆଲ ଅଳ୍ପେଶ ଅଶୋକ ଦେଶମୁଖ(30) ।
ତେବେ ଯୁବତୀ ଜଣଙ୍କୁ ଟେଷ୍ଟିଂ ପାଇଁ ଲ୍ୟାବରେ କୌଣସି ମହିଳା କର୍ମଚାରୀ ନଥିବା ମଧ୍ୟ ଅଳ୍ପେଶ ସୂଚନା ଦେଇଥିଲା । ଏମିତିରେ ଟେଷ୍ଟିଂ ପାଇଁ ପୁଣି ଲ୍ୟାବରେ ଥିବା ସମୟରେ ତାଙ୍କ ଏକ କୋଠରୀକୁ ନେଇ ତାଙ୍କର ଯୌନାଙ୍ଗରୁ ସ୍ବାବ ନେବା ପାଇଁ ଅଳ୍ପେଶ ଚେଷ୍ଟା କରିଥିଲା । ଆଉ ଏହାର କିଛି ସମୟ ମଧ୍ୟରେ ସେ ରିପୋର୍ଟ ନେଗେଟିଭ ଆସିଥିବା ସୂଚନା ଦେଇଥିଲା । ସହରରେ ନିଜର ଭାଇ ସହିତ ରହୁଥିବା ଯୁବତୀ ଜଣଙ୍କ ଏଥିରେ ସନ୍ଦେହ ପ୍ରକାଶ କରି ନିଜ ଭାଇଙ୍କୁ ସବୁ ଜଣାଇଥିଲେ ।
ସବୁକିଛି ଜାଣି ଉଭୟେ ବଡନେରା ଥାନାରେ ଏକ ମାମଲା ରୁଜୁ କରିଥିଲେ । ସେପଟେ ଏ ସମ୍ପର୍କରେ ଖବର ପାଇ ପୋଲିସ ଅଭିଯୁକ୍ତକୁ ଗିରଫ କରିଥିବା ଜଣା ପଡିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
