ଥିରୁଅନନ୍ତପୁରମ: ମହାରାଷ୍ଟ୍ର ପରେ କେରଳର ସ୍ଥିତି ବହୁତ ଖରାପ । କୋରୋନା ଭାଇରସରେ ରାଜ୍ୟର ଶତାଧିକ ଲୋକ ଆକ୍ରାନ୍ତ ହୋଇଛନ୍ତି । ଶୁକ୍ରବାର ନୂଆ 39 ଜଣଙ୍କ ମାମଲା ସାମନାକୁ ଆସିଛି । ଯେଉଁମାନଙ୍କ ରିପୋର୍ଟ ପଜିଟିଭି ଆସିଛି । ଫଳରେ ଏପର୍ଯ୍ୟନ୍ତ କେରଳରେ ମୋଟ 164 ଲୋକ ଏହି ରୋଗରେ ଆକ୍ରାନ୍ତ ହୋଇସାରିଛନ୍ତି ।
ତେବେ ପରିସ୍ଥିତି ଏତେ ଖରାପ ହେବା ପରେ ବି କେରଳରେ ଲୋକେ ସୁଧୁରୁନାହାନ୍ତି । ଏବେ ମଧ୍ୟ ଲୋକେ ଘରେ ନରହି ବାହାରେ ବୁଲୁଥିବାର ଦେଖାଯାଉଛି । ଏପରିକି ଅନେକ ଲୋକ ଲକଡାଉନ ନିୟମ ଭାଙ୍ଗି ଗାଡିମୋଟରରେ ସାମଗ୍ରୀ କିଣାକିଣି କରି ନେଉଛନ୍ତି । ସରକାରଙ୍କ ତାଗିଦ ସତ୍ତ୍ବେ ଲୋକେ ଘରେ ରହୁନାହାନ୍ତି । ଫଳରେ ପୋଲିସ କଡା କାର୍ଯ୍ୟାନୁଷ୍ଠାନ ନେବାକୁ ବାଧ୍ୟ ହୋଇଛି ।
ଖବର ଅନୁସାରେ କେରଳରେ ଏପର୍ଯ୍ୟନ୍ତ ଲକଡାଉନ ନିୟମ ଭାଙ୍ଗି 1383 ଜଣ ଗିରଫ ହୋଇଛନ୍ତି । ଏହାସହ 923ଟି ଗାଡି ଜବତ ହୋଇଛି । ସେହିପରି ଲକଡାଉନ ଭାଙ୍ଗିବା ଅଭିଯୋଗରେ ସାରା ରାଜ୍ୟରେ 7091ଟି ମାମଲା ରୁଜୁ ହୋଇଥିବା ପୋଲିସ ସୂଚନା ଦେଇଛି । ଲୋକଙ୍କୁ ପ୍ରଶାସନ ପକ୍ଷରୁ ବାରମ୍ବାର ତାଗିଦ ଓ ସଚେତନ ପରେ ବି ଲୋକେ ଶୁଣୁନଥିବା ଦେଖାଯାଇଛି ।
