ନାଇରୋବି: ଆଫ୍ରିକୀୟ ରାଷ୍ଟ୍ର କେନିଆରେ ହୋଇଥିବା ଭୂସ୍ଖଳନରେ ମୃତ୍ୟୁ ସଂଖ୍ୟା 60କୁ ବୃଦ୍ଧି ପାଇଛି । ପ୍ରବଳ ବର୍ଷା କାରଣରୁ କେନିଆର ଉତ୍ତରପଶ୍ଚିମ ଭାଗରେ ଭୂସ୍ଖଳନ ହୋଇଥିଲା । ଏ ଘଟଣାରେ 7 ଜଣ ନିଖୋଜ ଥିବା ଜଣାପଡିଛି ।
ଭୂସ୍ଖଳନ ସମୟରେ ଗୋଟିଏ କାର ଯାତ୍ରା କରୁଥିବା ସମୟରେ ପାଣିରେ ଭାସିଯାଇଥିଲା । ଯାହା ଫଳରେ କାରରେ ଥିବା 5ଜଣ ଲୋକଙ୍କ ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା । ଆଉ 55 ଜଣ ମୃତକଙ୍କ ମଧ୍ୟରେ 7 ଜଣ ଶିଶୁ ଅଛନ୍ତି ।
ଏପରି ପ୍ରାକୃତିକ ବିପର୍ଯ୍ୟୟ ଆମେ କେବେ ଦେଖିନଥିଲୁ ବୋଲି କହିଛନ୍ତି ୱେଷ୍ଟ ପୋକଟର ରାଜ୍ୟପାଳ ଜନ କ୍ରପ ଲୋନୟାଙ୍ଗଅପୁଓ । ଗତ ଶନିବାର କେନିଆ-ଉଗାଣ୍ଡା ସୀମାନ୍ତବର୍ତ୍ତୀ ଅଞ୍ଚଳରେ ଦିନ ସାଢେ 2ଟା ସମୟରେ ପ୍ରଳୟଙ୍କାରୀ ଭୂସ୍ଖଳନ ହେବାରୁ ସେଠାରେ ଥିବା ପୋଲ, ରାସ୍ତା ଏବଂ ଘରଦ୍ବାର କ୍ଷତିଗ୍ରସ୍ତ ହୋଇଥିଲା ।
ଏହା ଯୋଗୁଁ କାଦୁଅରେ ଫସିଥିବା ଲୋକଙ୍କୁ ଉଦ୍ଧାର କରିଥିଲା କେନିଆ ପୋଲିସ ଏବଂ ସାମରିକ ବାହିନୀ । ଏହି ବିପର୍ଯ୍ୟୟ ପରେ ସ୍ଥାନୀୟ ପ୍ରଶାସନ ପକ୍ଷରୁ ଘଟଣାସ୍ଥଳରେ ଫସି ଥିବା ଲୋକଙ୍କୁ ଉଦ୍ଧାର କରାଯାଇ ସୁରକ୍ଷିତ ସ୍ଥାନରେ ରଖାଯାଇଛି।
