ଭୋପାଳ: ଦେଶରେ ଏବେ ବିପଦପୂର୍ଣ୍ଣ ହୋଇପଡିଛି ସାମ୍ବାଦିକଙ୍କ ଜୀବନ । ଗାଜିଆବାଦ ପରେ ଏବେ ମଧ୍ୟପ୍ରଦେଶରେ ଜଣେ ସାମ୍ବାଦିକଙ୍କୁ ଗୁଳି କରି ହତ୍ୟା କରାଯାଛି । 35 ବର୍ଷୀୟ ମୃତ ସାମ୍ବାଦିକଙ୍କ ନାଁ ସୁନୀଲ ତିଓ୍ବାରୀ ହୋଇଥିବା ବେଳେ ସେ ଗ୍ବାଲିୟର ଏକ ଦୈନିକ ଖବର କାଗଜରେ କାମ କରୁଥିବା ଜଣାପଡିଛି । ତେବେ ପୂର୍ବ ଶତ୍ରୃତା କାରଣରୁ କିଛି ଅସାମାଜିକ ବ୍ୟକ୍ତି ନିଓ୍ବାରୀ ଜିଲ୍ଲାରେ ତାଙ୍କର ହତ୍ୟା କରିଛନ୍ତି ।
ସାମ୍ବାଦିକ ସୁନୀଲ ଓ ତାଙ୍କ ଭାଇ ମୋଟର ସାଇକେଲ ଯୋଗେଁ ତାଙ୍କ ଗାଁକୁ ଯାଉଥିବା ସମୟରେ ସେନ୍ଦରି ଥାନା ଅନ୍ତର୍ଗତ ପୁଟରି ଖେରା ଗାଁ ନିକଟରେ କିଛି ଅସାମାଜିକ ବ୍ୟକ୍ତି ତାଙ୍କୁ ଲୁହା ରଡ୍ରେ ଆକ୍ରମଣ କରିବା ସହ ଗୁଳି ଚଳାଇଥିଲେ । ତେବେ ସାମ୍ବାଦିକଙ୍କ ଭାଇ କୌଣସି ମତେ ସେଠାରୁ ଖସି ପଳାଇବାରେ ସକ୍ଷମ ହୋଇଥିଲେ । ସେ ଗାଁରେ ପହଞ୍ଚି ଘଟଣା ସମ୍ପର୍କରେ ଖବର ଦେବା ପରେ ତାଙ୍କ ପରିବାର ଲେକେ ପହଞ୍ଚି ସୁନୀଲଙ୍କୁ ହସ୍ପିଟାଲ ନେଇଯାଇଥିଲେ । ତେବେ ସେଠାରେ ତାଙ୍କର ମୃତ୍ୟୁ ହୋଇଯାଇଛି ।
ପୂର୍ବ ଶତ୍ରୃତା କାରଣରୁ ଏହି ହତ୍ୟାକାଣ୍ଡ ଘଟିଥିବା ଜଣାପଡିଛି । ଅଭିଯୁକ୍ତ ମାନଙ୍କ ମଧ୍ୟରୁ 3 ଜଣଙ୍କ ସନ୍ଧାନ ମିଳିଥିବା ପୋଲିସ ସୂତ୍ରରୁ ସୂଚନା ଦିଆଯାଇଛି । ଘଟଣାରେ ପୋଲିସ ହତ୍ୟା ମାମଲା ରୁଜୁ କରି ତଦନ୍ତ ଜାରି ରଖିଛି ।
2 ଦିନ ପୂର୍ବରୁ ଉତ୍ତରପ୍ରଦେଶର ଗାଜିୟାବାଦରେ ଜଣେ ସାମ୍ବାଦିକଙ୍କୁ ଗୁଳିକରି ହତ୍ୟା କରାଯାଇଥିଲା । ସାମ୍ବାଦିକ ଜଣଙ୍କ ନିଜ ଝିଅ ସହ ଘରକୁ ଫେରୁଥିବା ସମୟରେ କିଛି ଦୁର୍ବୃତ୍ତ ତାଙ୍କୁ ପିଟିବା ସହ ମୁଣ୍ଡକୁ ଗୁଳି କରିଦେଇଥିଲେ । ଫଳରେ ହସ୍ପିଟାଲରେ ଚିକିତ୍ସାଧିନ ଅବସ୍ଥାରେ ସାମ୍ବାଦିକ ଜଣଙ୍କର ମୃତ୍ୟ ହୋଇଯାଇଥିଲା ।
@PTI_News
