ନୂଆଦିଲ୍ଲୀ: ଗତ ଜାନୁୟାରୀ 5 ତାରିଖରେ ହୋଇଥିବା ଜେଏନୟୁ ହିଂସାକାଣ୍ଡକୁ ନେଇ କଠୋର ହୋଇଛନ୍ତି ଦିଲ୍ଲୀ ହାଇକୋର୍ଟ। ଏ ଘଟଣାରେ ତଦନ୍ତରେ ତତ୍ପରତା ପାଇଁ ଦିଲ୍ଲୀ ପୋଲିସକୁ ତାଗିଦ କରିଛନ୍ତି। ଏହାସହ ଜେଏନୟୁ କତ୍ତୃପକ୍ଷଙ୍କୁ ଖୁବଶୀଘ୍ର ହିସାଂକାଣ୍ଡର ସିସିଟିଭି ଫୁଟେଜ ଓ ପ୍ରମାଣପତ୍ରକୁ ଦିଲ୍ଲୀ ପୋଲିସ ପାଖରେ ଜମା କରିବାକୁ ନିର୍ଦ୍ଦେଶ ଦେଇଛନ୍ତି କୋର୍ଟ।
ଏପଟେ କିଛି ସମୟ ଭିତରେ 2ଟି ହ୍ବାଟସାପ୍ ଗ୍ରୁପ ସଦସ୍ୟଙ୍କ ମୋବାଇଲ ଜବତ ପାଇଁ କୋର୍ଟ ଦିଲ୍ଲୀ ପୋଲିସକୁ ନିର୍ଦ୍ଦେଶ ଦେଇଛନ୍ତି। ଏନେଇ କୋର୍ଟଙ୍କ ପକ୍ଷରୁ ଏକ ନୋଟିସ ସୋସିଆଲ ମିଡିଆ ସାଇଟ ଉଦ୍ଦେଶ୍ୟରେ ଜାନୁୟାରୀ 13 ତାରିଖରେ ଜାରି ହୋଇଥିଲେ। ଯେଉଁଥିରେ ଫେସବୁକ୍,ଗୁଗଲ,ହ୍ବାଟସାପ୍ ସମସ୍ତ ସୋସିଆଲ ନେଟୱାର୍କିଂ ସାଇଟ ରହିଥିଲା।
ଏ ହିଂସାକାଣ୍ଡ ଘଟଣାର ଶୁଣାଣି ସମୟରେ ଜେଏନୟୁ କର୍ତ୍ତୃପକ୍ଷ ସିସିଟିଭି ଫୁଟେଜ ଓ ସମସ୍ତ ତଥ୍ୟ ପ୍ରମାଣ ସହ ଉପସ୍ଥିତ ରହିବାକୁ ଦିଲ୍ଲୀ ପୋଲିସ ଜଣାଇଛନ୍ତି। ହେଲେ ଏବେ ସୁଦ୍ଧା ରିପୋର୍ଟର କୌଣସି ଉତ୍ତର ରଖିନାହାଁନ୍ତି ଜେଏନୟୁ କର୍ତ୍ତୃପକ୍ଷ।
ଏପଟେ ବିଶ୍ବବିଦ୍ୟାଳୟର ତିନି ଜଣ ପ୍ରଫେସରଙ୍କ ଦ୍ବାରା ଏକ ପିଟିସନ ଫାଇଲ ହୋଇଛି। ଯେଉଁଥିରେ ହିଂସାକାଣ୍ଡର ସିସିଟିଭି ଫୁଟେଜ ଓ ବିଭିନ୍ନ ପ୍ରମାଣପତ୍ରକୁ ସଂରକ୍ଷିତ ରଖିବାକୁ କୁହାଯାଇଛି। ଜେଏନୟୁ ହିଂସାକାଣ୍ଡ ପୂର୍ବ ଯୋଜନା ମୁତାବକ କରାଯାଇଛି। ସମସ୍ତ ପ୍ରମାଣକୁ ଜେଏନୟୁ କର୍ତ୍ତୃପକ୍ଷ ନଷ୍ଟ କରିଦେବାର ସମ୍ଭାବନା ରହିଥିବା ଦାଖଲ ହୋଇଥିବା ପିଟିସନରେ ଦର୍ଶାଯାଇଛି।
ସେହିପରି କୂଳପତି ଜଗଦୀଶ କୁମାରଙ୍କୁ ବହିଷ୍କାର ଦାବିରେ ଅଡି ବସିଛନ୍ତି ଶିକ୍ଷକ ସଙ୍ଘ। ସେପଟେ କ୍ଲାସ ନଯାଇ ଫି ବୃଦ୍ଧି ବିରୁଦ୍ଧରେ ଛାତ୍ରଛାତ୍ରୀଙ୍କ ଆନ୍ଦୋଳନ ଜାରି ରହିଛି।
