ଜୟପୁର: କୋଟାର ଜେକେଲୋନ ହସ୍ପିଟାଲରେ 100ରୁ ଊର୍ଦ୍ଧ୍ବ ଶିଶୁଙ୍କର ଜୀବନ ଯାଇସାରିଲାଣି । ଏତେ ଦିନ ଧରି ନିରବ ଥିବା ରାଜ୍ୟ ସରକାର ହଠାତ ନିଦରୁ ଉଠିଛନ୍ତି । ରାଜସ୍ଥାନର ସ୍ବାସ୍ଥ୍ୟମନ୍ତ୍ରୀ ରଘୁ ଶର୍ମା ଜେକେଲୋନ ହସ୍ପିଟାଲ ଗସ୍ତ କରି ସ୍ଥିତି ପରଖିଛନ୍ତି । ହସ୍ପିଟାଲର NICU ଓ୍ବାର୍ଡରେ ଅକ୍ସିଜେନ ଯୋଗାଣ ପାଇଁ ଆବଶ୍ୟକ ନିର୍ମାଣ କାର୍ଯ୍ୟକୁ 15 ଦିନ ମଧ୍ୟରେ ପୁରା କରିବାକୁ ନିର୍ଦ୍ଦେଶ ଦେଇଛନ୍ତି ।
ଚିକିତ୍ସାର ସୁବିଧା ପାଇଁ ଜେକେଲୋନ ହସ୍ପିଟାଲରେ ଅର୍ଥର ଅଭାବ ନଥିବା ନିଜ ମୁହଁରେ ମାନିଛନ୍ତି ସ୍ବାସ୍ଥ୍ୟ ମନ୍ତ୍ରୀ । ଏହାସହ ଏହି ଅର୍ଥର ଉପଯୋଗ କରି ସମୟ ପୂର୍ବରୁ ଉପକରଣର ମରାମତିର ଆବଶ୍ୟକ ଥିବା ସେ ବୁଝିଛନ୍ତି । ମନ୍ତ୍ରୀ ରଘୁ ଶର୍ମା 8ଟି ଭେଣ୍ଟିଲେଟର, 28ଟି ରେଗୁଲାଇଜର, 10ଟି ଅକ୍ସିମିଟର କିଣିବାକୁ ହସ୍ପିଟାଲକୁ ଅନୁମତି ଦେଇଛନ୍ତି । ଅନ୍ୟପକ୍ଷେ ହସ୍ପିଟାଲରେ ବାୟୋମେଡିକାଲ ଇଞ୍ଜିନିୟର, ଖାଲି ପଡିଥିବା ପଦରେ ସହାୟକ ପ୍ରଫେସରର ପ୍ରସ୍ତାବକୁ ମନ୍ତ୍ରୀ ସ୍ବୀକୃତି ପ୍ରଦାନ କରିଛନ୍ତି ।
