ଶ୍ରୀନଗର: ଜମ୍ମୁ-କାଶ୍ମୀରର ସୋପୋରରେ ସୁରକ୍ଷାକର୍ମୀଙ୍କୁ ବଡ ସଫଳତା ମିଳିଛି । ଶନିବାର ବାରମୂଳା ଜିଲ୍ଲାର ସୋପୋର ଅଞ୍ଚଳରୁ 5 ସନ୍ଦିଗ୍ଧ ଆତଙ୍କବାଦୀଙ୍କୁ ଗିରଫ କରାଯାଇଛି । ଜମ୍ମୁ-କଶ୍ମୀର ପୋଲିସ ଓ ସୁରକ୍ଷାକର୍ମୀଙ୍କ ମିଳିତ ସହଯୋଗରେ ଏହି ସନ୍ଦିଗ୍ଧଙ୍କୁ ଗିରଫ କରାଯାଇଥିବା ସୂଚନା ମିଳିଛି।
କାଶ୍ମୀର ଜୋନ ପୋଲିସ ଏନେଇ ସୂଚନା ଦେଇ କହିଛି, ଏହି ସନ୍ଦିଗ୍ଧଙ୍କ ମଧ୍ୟରୁ 3 ଜଣ ସନ୍ଦିଗ୍ଧ ସୋପୋର ଅଞ୍ଚଳର ସାଧାରଣ ଲୋକଙ୍କୁ ଧମକ ଦେଉଥିବା ଅଭିଯୋଗରେ ଗିରଫ କରାଯାଇଛି । ଏମାନଙ୍କ ନିକଟରୁ ଲସ୍କର-ଇ-ତୋଏବା ଆତଙ୍କବାଦୀ ସଂଗଠନର ଧମକ ଭରା ପୋଷ୍ଟର ଜବତ ହୋଇଥିବା ପୋଲିସ ପକ୍ଷରୁ ସୂଚନା ମିଳିଛି ।
ସେହିପରି ଅନ୍ୟ 2 ଜଣ ସନ୍ଦିଗ୍ଧ ଉଲଫତ ବଶୀର ମୀର ଏବଂ ଏଜାଜ ଅହମଦ ଭଟ୍ଟକୁ କୁପୱାଡାର ବାଇପାସ ରୋଡ ନିକଟରେ ଗିରଫ କରାଯାଇଛି । ଏମାନଙ୍କ ନିକଟରୁ ମଧ୍ୟ ଅପରାଧିକ ସାମଗ୍ରୀ ଏବଂ ଗୋଳାବାରୁଦ ଜବତ କରିଛି ପୋଲିସ । ତେବେ ଏହି ସମସ୍ତ ସନ୍ଦିଗ୍ଧ ଆତଙ୍କବାଦୀ ଲସ୍କର-ଇ-ତୋଏବା ପାଇଁ କାର୍ଯ୍ୟ କରୁଥିବା ପ୍ରାରମ୍ଭିକ ତଦନ୍ତରୁ ଜାଣିବାକୁ ମିଳିଛି ।
