ଶ୍ରୀନଗର: କାଶ୍ମୀରରେ ଆତଙ୍କବାଦୀଙ୍କ ସହ ଧରା ପଡିଥିବା ଡିଏସପି ଦେବେନ୍ଦ୍ର ସିଂହଙ୍କ ଉପରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଦେବେନ୍ଦ୍ର ସିଂହଙ୍କୁ ଜାମ୍ମୁ ଓ କାଶ୍ମୀର ପୋଲିସ ବହିଷ୍କାର କରିଛି । ଡିଏସପିଙ୍କୁ ବହିଷ୍କାର କରାଯିବା ନେଇ ଏକ ଆଦେଶନାମା ଜାରି କରାଯାଇଛି ।
ଡିଏସପି ଦେବେନ୍ଦ୍ର ସିଂହଙ୍କୁ ବହିଷ୍କାର କରାଯିବା ନେଇ ଜାମ୍ମୁ ଓ କାଶ୍ମୀର ଡିଜିପି ଦିଲବାଗ ସିଂହ ସୂଚନା ଦେଇଛନ୍ତି । ଡିଏସପି ଦେବେନ୍ଦ୍ରଙ୍କୁ ଶନିବାର 2 ଜଣ ଆତଙ୍କବାଦୀଙ୍କ ସହ ଧରିଥିଲା ପୋଲିସ । ସେ କିଛି ଦିନରୁ ଛୁଟିରେ ଥିଲେ । ସଂସଦ ଉପରେ ଆକ୍ରମଣ କରିଥିବା ଆତଙ୍କବାଦୀଙ୍କୁ ସାହାଯ୍ୟ କରିବା ଘଟଣାରେ ଦେବେନ୍ଦ୍ର ଯାଞ୍ଚ ଏଜେନ୍ସିଙ୍କ ଟାର୍ଗେଟରେ ଥିଲେ ।
ଜାମ୍ମୁ ଓ କାଶ୍ମୀରର କୁଲଗାମରୁ ଗିରଫ ହୋଇଥିବା ଡିଏସପି ଦେବେନ୍ଦ୍ର ସିଂହଙ୍କୁ ନେଇ ସୁରକ୍ଷା ଏଜେନ୍ସି ଅନେକ ଥର ଆଲର୍ଟ କରିସାରିଥିଲେ । ହେଲେ କେତେବେଳେ ଭାଗ୍ୟ ତ ଆଉ କେତେବେଳେ ବ୍ୟବସ୍ଥାର ଅବହେଳା କାରଣରୁ ବଞ୍ଚିଯାଉଥିଲେ ଡିଏସପି । କିନ୍ତୁ 11 ଜାନୁଆରୀରେ ତାଙ୍କୁ ଶ୍ରୀନଗରରୁ ପିଛା କରିଥିଲା ସୁରକ୍ଷା ଟିମ୍ । ଜବାହର ଟନେଲ ପୂର୍ବରୁ ପୋଲିସ ଦେବେନ୍ଦ୍ରଙ୍କୁ 2 ଟପ ଆତଙ୍କବାଦୀଙ୍କ ସହ ଗିରଫ କରିଥିଲା । ହିଜବୁଲର 2 ଆତଙ୍କବାଦୀ ଡିଏସପିଙ୍କ ଘରେ 2 ଦିନ ରହିଥିବା ସୂତ୍ରରୁ ସୂଚନା ମିଳିଛି । ବର୍ତ୍ତମାନ ରାଷ୍ଟ୍ରୀୟ ଯାଞ୍ଚ ଏଜେନ୍ସି ଏନଆଇଏ ଦେବେନ୍ଦ୍ରଙ୍କୁ ପଚରାଉଚରା ଜାରି ରଖିଛି ।
