ଶ୍ରୀନଗର: ଜମ୍ମୁ-କାଶ୍ମୀରରେ ସୁରକ୍ଷାକର୍ମୀଙ୍କୁ ବଡ ସଫଳତା । ଶୁକ୍ରବାର ହିଜବ୍ବୁଲ ମୁଜାହିଦ୍ଦିନର 3 ଆତଙ୍କବାଦୀଙ୍କୁ ସଫା କରିଛନ୍ତି ସୁରକ୍ଷାକର୍ମୀ । ସେମାନେ ହେଲେ ଲତିଫ ଅହମଦ ଦର , ତାରିଖ ଶେଖ ଏବଂ ଶାରିକ ନେନଗୁର ବୋଲି ପୋଲିସ ପକ୍ଷରୁ ସୂଚନା ମିଳିଛି ।
ସେପଟେ ଆତଙ୍କବାଦୀଙ୍କ ଏନକାଉଣ୍ଟର ପରେ ସ୍ଥାନୀୟ ଲୋକ ସୁରକ୍ଷାକର୍ମୀଙ୍କ ଉପରକୁ ପଥରମାଡ କରିଥିଲେ । ସୁରକ୍ଷାକୁ ଦୃଷ୍ଟିରେ ରଖି ସେଠାକାର ଇଣ୍ଟରନେଟ ସେବା ବନ୍ଦ କରିବା ସହ ଆକ୍ରମଣକାରୀଙ୍କୁ ରୋକିବା ପାଇଁ ପେଲେଟ ଗନର ବ୍ୟବହାର କରିଥିଲେ ସୁରକ୍ଷାକର୍ମୀ ।
ସୂଚନା ଯୋଗ୍ୟ ଯେ, ସୋପିଆନ ଜିଲ୍ଲାର ଇମାମ ସାହେବ ଅଞ୍ଚଳରେ ଶୁକ୍ରବାର ସକାଳୁ ଆତଙ୍କବାଦୀମାନେ ଲୁଚି ରହିଥବାର ଖବର ପାଇବା ପରେ ସୁରକ୍ଷାକର୍ମୀଙ୍କ ପକ୍ଷରୁ ଅପରେସନ୍ ଆରମ୍ଭ ହୋଇଥିଲା । ଏହି ଅପରେସନରେ ଉଭୟ ପଟୁ ଗୁଳି ବିନିମୟ ହୋଇଥିଲା । ସୁରକ୍ଷାକର୍ମୀଙ୍କ ଗୁଳିରେ ନିପାତ ହୋଇଥିଲେ 3 ଆତଙ୍କବାଦୀ ।
