ବେଙ୍ଗାଲୁରୁ: ଇଣ୍ଡିଆନ ସ୍ପେଶ ରିସର୍ଚ୍ଚ ଅର୍ଗାନାଇଜେସନର ମୁଖ୍ୟ କେ. ଶିଭନ ଜଣେ ଦକ୍ଷ ବୈଜ୍ଞାନିକ ଭାବେ ଢେର ସୁନାମ ଅର୍ଜନ କରିସାରିଛନ୍ତି । ମହାକାଶ ବିଜ୍ଞାନରେ ସେ ଗୋଟିଏ ପରେ ଗୋଟିଏ ଇତିହାସ ରଚି ଚାଲିଥିବା ବେଳେ 2020 ଭୋନ କର୍ମନ ପୁରସ୍କାର ପାଇଁ ତାଙ୍କ ନାମ ଚୟନ କରାଯାଇଛି । ଅନ୍ତର୍ଜାତୀୟ ଏକାଡେମୀ ଅଫ ଏରୋନଟିକ୍ସ ପକ୍ଷରୁ କେ. ଶିଭନଙ୍କୁ ଏହି ପୁରସ୍କାର ପ୍ରଦାନ କରାଯିବା ନେଇ ଘୋଷଣା ହୋଇଛି ।
ସମ୍ପୃକ୍ତ ଏକାଡେମୀର ଏହା ସର୍ବୋଚ୍ଚ ସମ୍ମାନ ହୋଇଥିବା ବେଳେ ମାର୍ଚ୍ଚ 2021ରେ ପ୍ୟାରିସରେ ଏହି ସମ୍ମାନ ପ୍ରଦାନ କରାଯିବାର କାର୍ଯ୍ୟକ୍ରମ ରହିଛି । ଗତବର୍ଷ ଏହି ସମ୍ମାନ ଚାର୍ଲସ ଏଲାଚିଙ୍କୁ ପ୍ରଦାନ କରାଯାଇଥିଲା । ତେବେ ଏରୋଡାଇନାମିକ୍ସରେ ଉଲ୍ଲେଖନୀୟ ଅବଦାନ ପାଇଁ ଏରୋସ୍ପେଶ ଇଞ୍ଜିନିୟର ଥିଓଡର ଭୋନ କର୍ମନଙ୍କ ନାମରେ ଏହି ସମ୍ମାନ ପ୍ରତିବର୍ଷ ପ୍ରଦାନ କରାଯାଏ ।
ଆଇଏଏ ଦ୍ବାରା ଭୋନ କର୍ମନ ଆୱାର୍ଡ:
ଭୋନ କର୍ମନଙ୍କ ଦ୍ବାରା ପ୍ରତିଷ୍ଠିତ ଇଣ୍ଟରନ୍ୟାସନାଲ ଏକାଡେମୀ ଅଫ ଆଷ୍ଟ୍ରୋନୋଟିକ୍ସ(ଆଇଏଏ)ରେ ସେ ପ୍ରଥମ ଅଧ୍ୟକ୍ଷ ଭାବେ କାର୍ଯ୍ୟ କରିଥିଲେ । ଏହାର ମହାକାଶ ବିଜ୍ଞାନ କ୍ଷେତ୍ରରେ ଅନେକ ଉଲ୍ଲେଖନୀୟ ଅବଦାନ ରହିଛି । ତେବେ ମହାକାଶ ବିଜ୍ଞାନରେ ଏହିପରି ଗୁରୁତ୍ବପୂର୍ଣ୍ଣ ଅବଦାନ ପାଇଁ 1882 ମସିହାରୁ ଭୋନ କର୍ମନ ପୁରସ୍କାର ପ୍ରଦାନ କରାଯାଉଛି । ଜୀବନବ୍ୟାପୀ ମହାକାଶ କ୍ଷେତ୍ରରେ ଅବଦାନ ପାଇଁ ଏହି ପୁରସ୍କାର ପ୍ରତିବର୍ଷ ଦିଆଯାଇଆସୁଛି ।
ତେବେ କେ. ଶିଭନଙ୍କ ପୂର୍ବରୁ ଅନ୍ୟ ଦୁଇ ଭାରତୀୟ କ୍ରିଷ୍ଣସ୍ବାମୀ କସ୍ତୁରିରଙ୍ଗାନ ଓ ୟୁ.ଆର୍. ରାଓଙ୍କ ମଧ୍ୟ ଏହି ସମ୍ମାନ ପ୍ରଦାନ କରାଯାଇଛି ।
