ନୂଆଦିଲ୍ଲୀ: ମହାମାରୀ କୋରୋନା ଆତଙ୍କରେ ଆତଙ୍କିତ ସାରା ବିଶ୍ବ । ସ୍ବଚ୍ଛତା, ସାମାଜିକ ଦୂରତ୍ବ ଏବଂ ଲକଡାଉନ ହିଁ କେବଳ ଏହାର ମୁକାବିଲା ପାଇଁ ଏକମାତ୍ର ଉପାୟ । ଏଥିପାଇଁ ପ୍ରଧାନମନ୍ତ୍ରୀ ମୋଦି ସାରା ଦେଶକୁ 21 ଦିନ ପର୍ଯ୍ୟନ୍ତ ଲକଡାଉନ ଘୋଷଣା କରିଛନ୍ତି । ଏହାସହ ସମସ୍ତଙ୍କୁ ଏହି ତାଲା ବନ୍ଦ ସମୟରେ ନିଜ ନିଜ ଘରେ ରହିବାକୁ ଅନୁରୋଧ କରିଛନ୍ତି ।
ସେପଟେ କୋରୋନା ଭୂତାଣୁରୁ ବର୍ତ୍ତିବା ପାଇଁ ଲୋକେ ବହୁଳ ମାତ୍ରାରେ ମାସ୍କ ଓ ସାନିଟାଇଜରର ବ୍ୟବହାର କରୁଛନ୍ତି । ଯଦ୍ବାରା ବଜାରରେ ମଧ୍ୟ ଏହା ଖୁବ କମ ପରିମାଣରେ ମିଳୁଛି । ଏମିତି ସ୍ଥିତିରେ ଭାରତୀୟ ରେଳ ବିଭାଗ ମାସ୍କ ଓ ସାନିଟାଇଜର ଉତ୍ପାଦନ କରିଛି । 1 ଏପ୍ରିଲ 2020 ସୁଦ୍ଧା ରେଳ ବିଭାଗ ପକ୍ଷରୁ 2,87,704 ମାସ୍କ ଏବଂ 25,806 ଲିଟର ସାନିଟାଇଜର ଉତ୍ପାଦନ କରାଯାଇଛି ।
ଉତ୍ପାଦିତ ଏହି ମାସ୍କ ଓ ସାନିଟାଇଜରକୁ ଡ୍ୟୁଟିରେ ଆସୁଥିବା ସମସ୍ତ କର୍ମଚାରୀଙ୍କୁ ଦିଆଯାଉଛି । ସେହିପରି ଉକ୍ତ ମାସ୍କ ଓ ସାନିଟାଇଜର ଗୁଡିକୁ ଚୁକ୍ତିଭିତ୍ତିକ ଶ୍ରମିକମାନଙ୍କୁ ଦିଆଯିବା ନେଇ ରେଳ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି ।
@ANI
