ନୂଆଦିଲ୍ଲୀ: ନ୍ୟୁୟର୍କର ୟୁଏନରେ ମିଳିତ ଜାତିସଙ୍ଘ ମହାସଭାରେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ମିଥ୍ୟା ଆରୋପର ପ୍ରତି ଜବାବ ଦେଇଛି ଭାରତ । ଭାରତର ବୈଦେଶିକ ମନ୍ତ୍ରାଳୟର ପ୍ରଥମ ସଚିବ ବିଦିଶା ମୈତ୍ରା କହିଛନ୍ତି ଯେ, "ଇମରାନ ଦେଇଥିବା ଭାଷଣ ସମ୍ପୂର୍ଣ୍ଣ ମିଛରେ ଭର୍ତ୍ତି । ବିଶ୍ବବାସୀଙ୍କୁ ମିଛ କହିବା ସହ ଇମ୍ରାନ ୟୁଏନ ମଞ୍ଚର ଦୂରୁପଯୋଗ କରିଛନ୍ତି" ।
ବିଦିଶା କହିଛନ୍ତି, ପାକିସ୍ତାନ ନିଜେ ସ୍ବୀକାର କରିବ ଯେ, ସେ ବିଶ୍ୱର ଏକ ମାତ୍ର ଦେଶ ଯିଏ କି ଆତଙ୍କବାଦୀଙ୍କୁ ପେନସନ ଦେଉଛି । ମୈତ୍ରାଙ୍କ କହିବାନୁଯାୟୀ, ପାକିସ୍ତାନ ଖୁଲମଖୁଲା ଭାବେ ଆତଙ୍କବାଦୀ ଓସାମା ବିନ ଲାଦେନକୁ ଆଶ୍ରୟ ଦେଇଥିଲା । ଏଭଳିକି ୟୁଏନ ଆତଙ୍କବାଦୀ ଘୋଷଣା କରିଥିବା 130 ଆତଙ୍କବାଦୀ ପାକିସ୍ତାନରେ ରହୁଥିବା ସେ କହିଛନ୍ତି ।
ସୂଚନାଯୋଗ୍ୟ, ଶୁକ୍ରବାର ପିଏମ ମୋଦି ଓ ପାକ୍ ପିଏମ ଇମ୍ରାନ ଖାନ ୟୁଏନ ମହାସଭାରେ ଭାଷଣ ଦେଇଥିଲେ । ସେଠାରେ ବିଶ୍ୱସ୍ତରୀୟ ନେତାଙ୍କୁ କହିବା ପାଇଁ ମାତ୍ର ୧୫ ରୁ ୨୦ ମିନିଟ୍ ସମୟ ଦିଆଯାଉଥିବା ବେଳେ ଇମ୍ରାନ କିନ୍ତୁ ୪୭ ମିନିଟ ଭାଷଣ ଦେଇଥିଲେ । ତାଙ୍କୁ ଭାଷଣ ଶେଷ କରିବାକୁ ବାରମ୍ବାର ଚେତାବନୀ ଦିଆଯାଇଥିଲେ, ସୁଦ୍ଧା ସେ ଲଗାତାର ଭାରତ ବିରୋଧରେ ମିଛ ପରେ ମିଛ କହି ଚାଲିଥିଲେ ।
