ଚେନ୍ନାଇ: ଇଣ୍ଡିଆନ ଇନଷ୍ଟିଚ୍ୟୁଟ ଅଫ ଟେକ୍ନୋଲୋଜି ମାଡ୍ରାସର ଗବେଷକମାନେ ଖୋଜି ବାହାର କରିଛନ୍ତି ହଳଦୀର ଏକ ମୁଖ୍ୟ ଭୂମିକା । ସେମାନଙ୍କ କହିବା ଅନୁଯାୟୀ କର୍କଟ ପରି ମାରାତ୍ମକ ରୋଗର ଚିକିତ୍ସାରେ ଅନେକ ସାଇଡଇଫେକ୍ଟ ରହିଥିବା ବେଳେ ଏହାର ମୁକାବିଲା କରିବାରେ ହଳଦୀ ସକ୍ଷମ । ହଳଦୀରେ ଥିବା ‘ଟ୍ରେଲ’ ପ୍ରୋଟିନ ଏହି ମାରାତ୍ମକ ପ୍ରଭାବରୁ ମୁକ୍ତି ଦେଇଥାଏ ବୋଲି ଗବେଷକମାନେ ମତ ଦେଇଛନ୍ତି ।
ଗବେଷକମାନେ ଦୀର୍ଘ ଦିନ ଧରି କର୍କଟ ରୋଗ ପାଇଁ ଦାୟୀ ବୋଲାଉଥିବା ଆପୋପ୍ଟିକ ସେଲକୁ ନଷ୍ଟ କରିବା ପାଇଁ ଉପାୟର ସନ୍ଧାନରେ ଲାଗିଥିଲେ । ଏହାକୁ ମୁକାବିଲା କରିବା ପାଇଁ ଟିଏନଏଫ ସମ୍ବନ୍ଧୀୟ ଆପୋପ୍ଟିସ-ଇଣ୍ଡ୍ୟୁସିଂ ଲିଗାଣ୍ଡ’ ବା ଟ୍ରେଲ ସକ୍ଷମ ବୋଲି ଗବେଷକମାନେ ମତ ଦେଇଥିଲେ । ଏହା ସେଲ ଦ୍ବାରା କର୍କଟର ମାରାତ୍ମକ ସେଲ ନଷ୍ଟ କରିବାର ସମସ୍ତ କ୍ଷମତା ରହିଛି । ଏନେଇ ଅନେକ ଅଧ୍ୟୟନରୁ ପ୍ରମାଣ ମିଳିସାରିଛି ।
କର୍କଟ ରୋଗରେ ମୁଖ୍ୟତଃ ଏହାର ମାରାତ୍ମକ ସେଲକୁ ନଷ୍ଟ କରିବାର ଲକ୍ଷ୍ୟ ରହିଥାଏ । ଶରୀରରେ କୌଣସି ବିଶେଷ କ୍ଷତି ନପହାଞ୍ଚାଇ କର୍କଟ ରୋଗକୁ କିପରି ସମୂଳେ ନାଶ କରାଯାଇପାରିବ ତା ଉପରେ ଗବେଷକମାନେ ଧ୍ୟାନ ଦେଇଛନ୍ତି । ପୂର୍ବରୁ ନେକ୍ରୋସିସ ପ୍ରକ୍ରିୟାର ବ୍ୟବହାର କରି କର୍କଟ ରୋଗର ଚିକିତ୍ସା କରାଯାଉଥିବା ବେଳେ ଏହାର ସାଇଡ ଇଫେକ୍ଟ ଶରୀରରେ ଅନେକ କ୍ଷତି ପହଞ୍ଚାଇଥାଏ । ଏପରି ସ୍ଥଳରେ ଗବେଷକମାନେ ହଳଦୀର ଗୁଣବତ୍ତା ଦ୍ବାରା ଏହି କ୍ଷତିକାରଣ ପରିଣାମରେ ରୋକ ଲଗାଇପାରିବାର ଯୁକ୍ତି ବାଢିଛନ୍ତି ।
ପ୍ରୋଫେସର ରମା ଶଙ୍କର ବର୍ମାଙ୍କ ନେତୃତ୍ବରେ ଏହି ଅଧ୍ୟୟନ ହୋଇଥିଲା । ଯାହାର ଉପଲବ୍ଧି ପ୍ରସିଦ୍ଧ ଜର୍ଣ୍ଣାଲ ଫାର୍ମାକୋଲୋଜିକାଲରେ ପ୍ରକାଶ ପାଇଥିଲା । ଏଥିରେ ଶ୍ରୀଦେବୀ ସୁରାପଲ୍ଲୀ ଓ ମଧମତୀ ଜୟପ୍ରକାଶମ ମଧ୍ୟ ପ୍ରୋଫେସର ବର୍ମାଙ୍କୁ ସାହାଯ୍ୟ କରିଥିଲେ । ଏହି ରିପୋର୍ଟ ଅନୁଯାୟୀ ପ୍ରିକ୍ଲିନିକାଲ ଅଧ୍ୟୟନରେ ଟ୍ରେଲର ଆଣ୍ଟିଟ୍ୟୁମର ପ୍ରଭାବ ଦେଖାଯାଇଥିଲା । ଯାହାକୁ ସମୟକ୍ରମେ କର୍କଟ ସେଲ ସହିବାର କ୍ଷମତା ରଖିପାରିବା ମଧ୍ୟ ଦେଖାଯାଇଥିଲା । ହେଲେ ପରବର୍ତ୍ତୀ ପର୍ଯ୍ୟାୟ ଅଧ୍ୟୟନରେ ସ୍ପଷ୍ଟ ହୋଇଥିଲା କି ଟ୍ରେଲରେ ଥିବା ରସାୟନ ପଦାର୍ଥ କର୍କଟ ସେଲକୁ ଧିରେ ଧିରେ ନିଷ୍କ୍ରିୟ କରିବା ସହ ସମୟକ୍ରମେ ନଷ୍ଟ କରିବାରେ ସାହାଯ୍ୟ କରିଥାଏ ।
ତେବେ ଟ୍ରେଲର ଗୁଣବତ୍ତା ବୃଦ୍ଧି କରିବା ପାଇଁ ଅନେକ ପ୍ରାକୃତିକ ପଦାର୍ଥର ବ୍ୟବହାରକୁ ପରୀକ୍ଷା କରାଯାଇଥିଲା । ଏଥିରେ ଖାଦ୍ୟରେ ବ୍ୟବହୃତ ହଳଦୀର ବ୍ୟବହାର ମଧ୍ୟ ହୋଇଥିଲା । ଦେଖାଯାଇଥିବା କି ଟ୍ରେଲ ପାଇଁ ଏହା ଏକ ସାନିଟାଇଜର ପରି କାମ କରୁଛି । ସେପଟେ ହଳଦୀରେ କର୍କୁମିନ ପୂର୍ବରୁ ଆଣ୍ଟି-କ୍ୟାନ୍ସର ଏଜେଣ୍ଟ ଭାବେ ଜଣା ଯାଉଥିବା ବେଳେ ଟ୍ରେଲ ଉପରେ ମଧ୍ୟ ଏହାର ପ୍ରଭାବ ଗବେଷକଙ୍କୁ ଆଶ୍ଚର୍ଯ କରିଥିଲା । ଦେଖାଯାଇଥିଲା କି ଲ୍ୟୁକୋମିଆର ଚିକିତ୍ସା ପାଇଁ ହଳଦୀର ବ୍ୟବହାର କରିବା ଦ୍ବାରା ଏହା ଟ୍ରେଲର କ୍ଷମତା ବୃଦ୍ଧା କରିଥାଏ ଓ କର୍କଟ ସେଲକୁ ନଷ୍ଟ କରିବାରେ ମଧ୍ୟ ସାହାଯ୍ୟ କରିଥାଏ ।
ଏସମ୍ପର୍କରେ ଅଧିକ ଅଧ୍ୟୟନ ଜାରି ରହିଥିବା ବେଳେ, ଖୁବଶୀଘ୍ର ଏନେଇ ଅଧିକ ସକାରାତ୍ମକ ତଥ୍ୟ ସାମ୍ନାକୁ ଆସିବ ବୋଲି ଗବେଷକମାନେ ମତ ଦେଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
