ହାଇଦ୍ରାବାଦ: ଆମେରିକାରେ ଦିନକୁ ଦିନ କୋରୋନା ଭାଇରସ୍ ସଂକ୍ରମିତ ବ୍ୟକ୍ତିଙ୍କ ସଂଖ୍ୟା ବଢୁଥିବା ବେଳେ ସେମାନଙ୍କ ଚିକିତ୍ସା ଲାଗି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଭାରତରୁ ହାଇଡ୍ରୋକ୍ସିକ୍ଲୋରୋକୁଇନ୍ ନାମକ ଯେଉଁ ମ୍ୟାଲେରିଆ ନିରୋଧୀ ଔଷଧ କିଣିବାକୁ ଚାହୁଁଛନ୍ତି, ସେଥିରେ, ହୃତ୍ପିଣ୍ଡର ଗତିରେ ସମସ୍ୟା, ଗୁରୁତର ନିମ୍ନ ରକ୍ତଚାପ, ମାସଂପେଶୀ ଓ ସ୍ନାୟୁ ନଷ୍ଟ ଏବଂ ଦୃଷ୍ଟିଶକ୍ତି ନଷ୍ଟ ହେବା ଭଳି ଅନେକ ସମ୍ଭାବିତ ପାର୍ଶ୍ବ ପ୍ରତିକ୍ରିୟାର ଆଶଙ୍କା ରହିଛି ।
କିନ୍ତୁ, ହାଇଡ୍ରୋକ୍ସିକ୍ଲୋରୋକୁଇନ୍ ବା HCQ ସହ ସଂପର୍କିତ ଯେଉଁ ବିପଦ ସମ୍ଭାବନା ସବୁଠାରୁ ଗୁରୁତ୍ବପୂର୍ଣ୍ଣ ତାହା ହେଲା ଚକ୍ଷୁପଟଳରେ ବା ରେଟିନାରେ ବିଷାକ୍ତତା ସଂଚାରଣ । ଯଦିଓ ସ୍ବୟଂକ୍ରିୟାଶୀଳ ରୋଗ ପ୍ରତିରୋଧକ ପ୍ରଣାଳୀ ସଂପର୍କିତ ରୋଗର ଚିକିତ୍ସା ନିମନ୍ତେ HCQ ଅନ୍ୟତମ ନିରାପଦ ଔଷଧ ରୂପେ ପରିଗଣିତ, ତଥାପି ଏହାର ପ୍ରୟୋଗ ମାତ୍ରା ସଂପର୍କରେ ସର୍ବସମ୍ମତିର ଅଭାବ ହିଁ ଏହି ସମସ୍ୟାବଳୀର କାରଣ । ସାଧାରଣତଃ ପ୍ରଦାହ ଜନିତ ଯନ୍ତ୍ରଣାଦାୟକ ରୋଗ କ୍ଷେତ୍ରରେ ଏହାକୁ 200 ମିଲିଗ୍ରାମ ହିସାବରେ ଦିନକୁ ଦୁଇ ଥର ଦିଆଯାଏ । କିନ୍ତୁ ଏ କ୍ଷେତ୍ରରେ ରୋଗୀଙ୍କ ଓଜନ ଅନ୍ୟୂନ 176 ପାଉଣ୍ଡ ହୋଇଥିବ ଏବଂ ଡାକ୍ତରଙ୍କ ସୁପାରିସ ଅନୁସାରେ ସର୍ବାଧିକ ସୀମା ଅତିକ୍ରମ କରାଯାଉ ନଥିବ ।
ପ୍ରାଥମିକ ସୂଚନା ଅନୁସାରେ, କୋଭିଡ୍-19 ରୋଗୀମାନଙ୍କ କ୍ଷେତ୍ରରେ ଔଷଧର ମାତ୍ରା ଦିନକୁ 600/800 ମିଲିଗ୍ରାମ ହିସାବରେ ଦେବାକୁ କୁହାଯାଉଛି । ଯାହାକି ସାଧାରଣ ମାତ୍ରା ତୁଳନାରେ 3-4 ଗୁଣ ଅଧିକ ଏବଂ ଏହା ଦ୍ବାରା ରେଟିନୋପାଥି ବା ଚକ୍ଷୁପଟଳ ରୋଗ ହୋଇପାରେ । ଏହା ବ୍ୟତୀତ, ଗବେଷଣାରୁ ଜଣାପଡ଼ିଛି ଯେ, ପୂର୍ବରୁ ରୋଗଗ୍ରସ୍ତ ବ୍ୟକ୍ତି କୋଭିଡ୍-19 ସଂକ୍ରମିତ ହୋଇଥିଲେ ସେମାନଙ୍କ କ୍ଷେତ୍ରରେ ଅଧିକ ବିପଦ ଆଶଙ୍କା ରହିଛି ଏବଂ ରୋଗୀଙ୍କ କିଡ୍ନୀ ଅକାମୀ ହୋଇଥିଲେ ସେମାନଙ୍କୁ ଦିଆଯାଉଥିବା HCQ ମଳଦ୍ବାର ଦେଇ ନିର୍ଗତ ହୋଇଯିବାର ଆଶଙ୍କା ରହିଛି ।
ବୟସାଧିକ୍ୟ କାରଣରୁ ରୋଗୀଙ୍କ ଚକ୍ଷୁପଟଳରେ ଦାଗ ପଡ଼ିବା ସହିତ କୋଷଗୁଡ଼ିକ ପ୍ରଭାବିତ ହୋଇଥିଲେ ଅଧିକ ମାତ୍ରାରେ ପ୍ରତିଦିନ HCQ ସେବନ ଦ୍ବାରା ସେମାନଙ୍କ ଜୀବନ ପ୍ରତି ବିପଦ ଆଶଙ୍କା ଦେଖାଦେଇପାରେ । ଗତ ସପ୍ତାହରେ ନେଚର୍ ମେଡିସିନ୍ ନାମକ ପତ୍ରିକାରେ ଗବେଷକମାନେ ପ୍ରକାଶ କରିଛନ୍ତି ଯେ, ଶରୀରର କୋଷ ଭିତରକୁ କୋରୋନା ଭାଇରସ୍ର ପ୍ରବେଶ କ୍ଷମତାକୁ ହାଇଡ୍ରୋକ୍ସିକ୍ଲୋରୋକୁଇନ୍ ହ୍ରାସ କରିଥାଏ ବୋଲି ବିଜ୍ଞାନାଗାରରେ ପରୀକ୍ଷଣରୁ ଜଣାପଡ଼ିଛି । କିନ୍ତୁ ଏହାର ଅର୍ଥ ନୁହେଁ ଯେ ମଣିଷ ଶରୀରରେ ବି ଏହା ସେଇ ଏକାଭଳି କାମ କରିବ ଏବଂ ବିଜ୍ଞାନାଗାର ପରୀକ୍ଷାରେ ବ୍ୟବହୃତ ଔଷଧର ମାତ୍ରାକୁ ରୋଗୀଙ୍କ ଶରୀର ସହିପାରିବ ।
