ହାଇଦ୍ରାବାଦ: 16 ବର୍ଷ ତଳେ ଭାରତରେ ହାଇଦ୍ରାବାଦରେ ନିଜର ପ୍ରଥମ ସେଣ୍ଟର ଖୋଲିଥିଲା ଗୁଗୁଲ । ଲକ୍ଷ୍ୟ ଥିଲା ଭାରତୀୟମାନଙ୍କୁ ଇଣ୍ଟରନେଟ ସର୍ଚ୍ଚରେ ସାହାଯ୍ୟ କରିବା ସହ ନୂଆ ଭାରତୀୟମାନଙ୍କ ପସନ୍ଦର ସର୍ଚ୍ଚ ପାଇଁ ଟୁଲ ପ୍ରସ୍ତୁତ କରିବା । ଭାରତୀୟମାନଙ୍କୁ 2 ପ୍ରମୁଖ ପସନ୍ଦ ବଲିଉଡ ଓ କ୍ରିକେଟ ରହିଥିବାରୁ ପ୍ରାଥମିକ ସ୍ତରରେ ଏହି ଦୁଇଟି ବିଷୟରେ ସର୍ଚ୍ଚ କରିବାରେ ସାହାଯ୍ୟ ପାଇଁ ଗୁଗୁଲ ଯୋଜନା ପ୍ରସ୍ତୁତ କରିଥିଲା । ହେଲେ ଚାହୁଁ ଚାହୁଁ ଭାରତରେ ଗୁଗଲର ଯାତ୍ରାରେ ଘଟିଛି ଅନେକ ପରିବର୍ତ୍ତନ । ଏହା ନା ଯେ କେବଳ ଭାରତରେ ନିଜ କଳେବର ବୃଦ୍ଧ କିଛି ବରଂ ଇଣ୍ଟରନେଟ ପ୍ରତି ଭାରତୀୟଙ୍କ ବ୍ୟବହାରରେ ମଧ୍ୟ ପରିବର୍ତ୍ତନ ଆଣିବାରେ ସଫଳ ହୋଇଛି ।
ଆଜିକା ସମୟରେ ପ୍ରାୟ ସବୁ ସ୍ଥାନରେ ଗୁଗୁଲର ଆବଶ୍ୟକତା ରହିଛଇ । ଏହା ବର୍ତ୍ତମାନ ସମୟରେ 86 ପ୍ରତିଶତ ସର୍ଚ୍ଚ ମାର୍କେଟରେ ରାଜୁତି କରିବା ସହ ୟାହୁ, ଅଲ୍ଟା ଭିସ୍ତା ଓ ଅନ୍ୟ ସର୍ଚ୍ଚ ଇଞ୍ଜିନକୁ ଢେର ପଛରେ ପକାଇଛି । ଗୁଗୁଲର ମ୍ୟାପ ସର୍ଭିସ ‘ଗୁଗୁଲ ମ୍ୟାପ’ ବର୍ତ୍ତମାନ ଭାରତୀୟଙ୍କ ଜୀବନର ଗୁରୁତ୍ବପୂର୍ଣ୍ଣ ଅଙ୍ଗ ପାଲଟିଛି । ମେଲ ସର୍ଭିସ ଜିମେଲ ମଧ୍ୟ ଅନ୍ୟ ଟପ୍ ମେଲ ସର୍ଭିସ ୟାହୁ, ହଟମେଲ ଆଦିକୁ ପ୍ରତିଯୋଗିତାରେ ଢେର ପଛରେ ପକାଇ ଦେଇଛି । ସେହିପରି ଗୁଗୁଲ ଅଧିକୃତ ୟୁଟ୍ୟୁବ୍ ବର୍ତ୍ତମାନ ବିଶ୍ବର ସର୍ବବୃହତ ଭିଡିଓ ସାଇଟ ଭାବେ ପରିଣତ ହୋଇଚି । ଅନ୍ୟପଟେ ଗୁଗୁଲର ମୋବାଇଲ ଅପରେଟିଂ ସିଷ୍ଟମ ଆଣ୍ଡ୍ରଏଡ ବର୍ତ୍ତମାନର ସ୍ମାର୍ଟଫୋନ ବଜାରରେ ତିନି ଚତୁର୍ଥାଂଶ ଭାଗ ଉପରେ ଅଧିକାର ଜମାଇଛି ।
1998 ମସିହାରେ ଆମେରିକାରେ ଲ୍ୟାରି ପେଜ ଓ ସର୍ଗି ବ୍ରିନଙ୍କ ଦ୍ବାରା ପ୍ରତିଷ୍ଠିତ ହୋଇଥିବା ଗୁଗୁଲ ମାତ୍ର 6 ବର୍ଷ ମଧ୍ୟରେ ଭାରତୀୟ ବଜାରରେ ପ୍ରବେଶ କରିଥିଲା। ଭାରତରେ ପ୍ରଥମେ ଏହା ମୁଭି ଓ କ୍ରିକେଟ ଉପରେ ସର୍ଚ୍ଚ ପାଇଁ ସୁବିଧା ଯୋଗାଉଥିବା ବେଳେ ଧିରେ ଧିରେ ଦେଶରେ ବିକାଶର ଏକ ନୂଆ ପରିଭାଷା ସୃଷ୍ଟି କରିବାରେ ସକ୍ଷମ ହୋଇଛି । ଭାରତରେ ଏହାର ବିକାଶ ସାରା ବିଶ୍ବରେ ନୂଆ ଦୃଷ୍ଟାନ୍ତ ।
ଭାରତୀୟ-ଆମେରିକୀୟ ସୁନ୍ଦର ପିଚାଇ, ଯିଏ ଗୁଗୁଲର ପ୍ୟାରେଣ୍ଟିଂ କମ୍ପାନୀ ଆଲଫାବେଟ ଇଙ୍କ ସହ ଗୁଗୁଲର ମଧ୍ୟ ସିଇଓ ରହିଛନ୍ତି, ସେ ସୋମବାର ଏକ ଗୁରୁତ୍ବପୂର୍ଣ୍ଣ ଘୋଷଣା କରିଛନ୍ତି । ଘୋଷଣା ଅନୁଯାୟୀ କମ୍ପାନୀ ଆଗାମୀ 5ରୁ 7 ବର୍ଷ ମଧ୍ୟରେ ଭାରତରେ 75,000 କୋଟି ଟଙ୍କା ଇନଭେଷ୍ଟ କରିବାକୁ ଯାଉଛି । ଏହି ସମୟ ମଧ୍ୟରେ କମ୍ପାନୀ ଭାରତରେ କିଛି ଏପରି ଟେକ୍ନୋଲୋଜିର ବିକାଶ କରିବା ଯାହା ପରବର୍ତ୍ତୀ ସମୟରେ ସାରା ବିଶ୍ବରେ ବ୍ୟବହୃତ ହେବ ।
ବିଶ୍ବରେ ଡିଜିଟାଲ ପେମେଣ୍ଟ ବ୍ୟବାହର ପାଇଁ ଉଦାହରଣ ପାଲଟିଛି ଭାରତ:
2018 ମସିହାରେ ଭାରତୀୟ ୟୁଜର୍ସଙ୍କୁ ଧ୍ୟାନରେ ରଖି ଗୁଗୁଲ ଲଞ୍ଚ କରିଥିଲା ପେମେଣ୍ଟ ୱାଲେଟ ‘ଗୁଗୁଲ ତେଜ’ । ଯାହା ପରେ ‘ଗୁଗୁଲ ପେ’ ଭାବେ ପରିଚିତ ହେଲା । ସୁନ୍ଦର ପିଚାଇଙ୍କ କହିବା ଅନୁଯାୟୀ ଡିଜିଟାଲ ପେମେଣ୍ଟର ବ୍ୟବହାର କ୍ଷେତ୍ରରେ ଭାରତ ନୂଆ ରେକର୍ଡ ସୃଷ୍ଟି କରିଥିବା ବେଳେ ସାରା ବିଶ୍ବରେ ଭାରତ ଡିଜିଟାଲ ପେମେଣ୍ଟ ବ୍ୟବହାର ପାଇଁ ଏକ ସଫଳ ଉଦାହରଣ ପାଲଟିଛି ।
ଭାରତୀୟ କ୍ଷୁଦ୍ର ବ୍ୟବସାୟୀ ନୂଆ ଟେକ୍ନୋଲୋଜିକୁ ଶୀଘ୍ର ଗ୍ରହଣ କରିପାରନ୍ତି:
ଭାରତସ୍ଥିତ କ୍ଷୁଦ୍ର ବ୍ୟବସାୟୀମାନେ ଗୁଗୁଲର ପ୍ରତ୍ୟେକ ନୂଆ ଟେକ୍ନୋଲୋଜିକୁ ଅତି ସହଜରେ ଓ ସଫଳ ଭାବେ ଗ୍ରହଣ ପାରୁଥିବା କଥା ଗୁଗୁଲକୁ ଅତି ଆଶ୍ଚର୍ଯ କରିଛି । ଏହାର ଉଦାହରଣ ଦେଇ ସୁନ୍ଦର କହିଛନ୍ତି କି ମାତ୍ର 4 ବର୍ଷ ତଳେ ଭାରତୀୟ କ୍ଷୁଦ୍ର ବ୍ୟବସାୟୀଙ୍କ ମଧ୍ୟରୁ ମାତ୍ର ଏକ ତୃତୀୟାଂଶ ଅନଲାଇନ ପ୍ଲାଟଫର୍ମରେ ନିଜ ଉପସ୍ଥିତି ଜାହିର କରୁଥିଲେ । ହେଲେ ବର୍ତ୍ତମାନ 2.6 କୋଟି ବା(26 ମିଲିୟନ) ଯୁଦ୍ର ବ୍ୟବସାୟୀଙ୍କୁ ଗୁଗୁଲ ମ୍ୟାପରେ ଖୋଜି ହେଉଥିବା ବେଳେ ଦୈନିକ ପ୍ରାୟ 15 କୋଟି ବ୍ୟବସାୟୀ ନିଜକୁ ଗୁଗୁଲ ସହ ଲିଙ୍କ କରାଉଥିବା ଦେଖାଯାଉଛି ।
ନିଜ ସବୁଠାରୁ କୌତୁହଳ ସଫଳତା କାହାଣୀ ମଧ୍ୟରେ ସୁନ୍ଦର ପିଚାଇ ଭାରତର ଏହି ଉଦାହରଣ ଦିଅନ୍ତି । ତାଙ୍କ କହିବା ଅନୁଯାୟୀ କ୍ଷୁଦ୍ର ବ୍ୟବସାୟୀମାନେ ଡିଜିଟାଲ ପେମେଣ୍ଟ ଗ୍ରହଣ କରିବା ତାଙ୍କ ପାଇଁ ସବୁଠାରୁ ବଡ ସଫଳତା ।
ସାରା ବିଶ୍ବ ପାଇଁ ଭାରତରେ ବିକଶିତ ବୋଲୋ ଆପ୍:
ଇଣ୍ଟରନେଟ ଜାଏଣ୍ଟ ଗୁଗୁଲ ପାଇଁ ବିଶ୍ବରେ ସର୍ବବୃହତ ଭଏସ ସର୍ଚ୍ଚ ମାର୍କେଟ ହେଉଛି ଭାରତ । ଗୁଗୁଲ ବର୍ତ୍ତମାନ ଆର୍ଟିଫିସିଆଲ ଇଣ୍ଟେଲିଜେନ୍ସର ବ୍ୟବହାର ଓ ବିକାଶ କ୍ଷେତ୍ରରେ ସର୍ବାଗ୍ରେ ରହିଛି । ଏହା ନିର୍ଦ୍ଦିଷ୍ଟ ଭାବେ ଭାରତ ପାଇଁ ପ୍ରସ୍ତୁତ ହୋଇଥିବା ପ୍ରଡକ୍ଟରେ ପରିବର୍ତ୍ତନ କରି ସାରା ବିଶ୍ବକୁ ପରସିବାରେ ସାହାଯ୍ୟ କରୁଛି ।
ଏମିତିରେ ଗୁଗୁଲର ଏଆଇ ପାୱାରରେ ପରିଚାଳିତ ରିଡିଂ ଟ୍ୟୁଟର ଆପ୍ ବୋଲୋ(କହିବା) ବର୍ତ୍ତମାନ ଏପରି ଏକ ଉଦାହରଣ ଯାହା ନିର୍ଦ୍ଦିଷ୍ଟ ଭାବେ କେବଳ ଭାରତୀୟ ୟୁଜର୍ସଙ୍କ ପାଇଁ ପ୍ରସ୍ତୁତ ହୋଇଥିଲା । ପରବର୍ତ୍ତୀ ସମୟରେ ଏଥିରେ କିଛି ପରିବର୍ତ୍ତନ କରାଯାଇ ସାରା ବିଶ୍ବରେ ରୋଲ ଆଉଟ କରାଯାଇଥିଲା । ଭାରତରେ ଏହାର ସକାରାତ୍ମକ ପ୍ରଭାବ ଦେଖି ଏହାକୁ ଅନ୍ୟ 180ଟି ଦେଶରେ ଲଞ୍ଚ କରାଯାଇଥିବା ନେପଇ ସୁନ୍ଦର ସୂଚନା ଦେଇଛନ୍ତି ।
ନୂଆ ବଜେଟ ସହ ଭାରତରେ କ’ଣ କରିବ ଗୁଗୁଲ:
ଆଗାମୀ 5ରୁ7 ବର୍ଷ ମଧ୍ୟରେ ଗୁଗୁଲ ଭାରତରେ ପ୍ରାୟ 75,000 କୋଟି ଟଙ୍କା ଖରଚ୍ଚ୍ କରିବାକୁ ଯାଉଛି । ଏହି ଅର୍ଥରେ କମ୍ପାନୀ ଭାରତରେ ବିଭିନ୍ନ ବିକାଶ ସହ ଟେକ୍ନୋଲୋଜିର ଅଧିକ ଓ ସରଳ ବ୍ୟବହାର ଉପରେ ଫୋକସ କରିବ । ଏଥିସହ ଭାରତର ଡିଜିଟାଲ ଇକୋନୋମି ପ୍ରସ୍ତୁତ ଉପରେ ମଧ୍ୟ ଏହା କାମ କରିବା ନେଇ ସୁନ୍ଦର କହିଛନ୍ତି ।
ମୁଖ୍ୟତଃ 4ଟି ବିଭାଗର ବିକାଶରେ ଏହି ଅର୍ଥ ବିନିମୟ ହେବ:
- ପ୍ରତ୍ୟେକ ଭାରତୀୟଙ୍କୁ ସେମାନଙ୍କ ନିଜ ମାତୃଭାଷାରେ ସୂଚନା ଯୋଗାଇ ଦେବା ।
- ଭାରତୀୟଙ୍କ ଭିନ୍ନ ଚାହିଦା ପୂରଣ କରିବା ପାଇଁ ନୂଆ ପ୍ରଡକ୍ଟ ଓ ସର୍ଭିସର ବିକାଶ କରିବା ।
- ଭାରତୀୟ ବ୍ୟବସାୟକୁ ଡିଜିଟାଲ ବିକାଶ କରିବାରେ ସାହାଯ୍ୟ କରିବା ।
- ସାମାଜିକ ବିକାଶ ପାଇଁ ଶିକ୍ଷା, ସ୍ବାସ୍ଥ୍ୟ ଓ କୃଷି କ୍ଷେତ୍ରରେ ଆର୍ଟିଫିସିଆଲ ଇଣ୍ଟେଲିଜେନ୍ସର ବ୍ୟବହାର କରିବା ।
ବ୍ୟୁରୋ ରିପୋର୍ଟ, ଇଟିଭି ଭାରତ
