ନୂଆଦିଲ୍ଲୀ: ରାଜ୍ୟସଭାରେ ବୁଧବାର ଆଗତ ହୋଇଥିବା ନାଗରିକତା ସଂଶୋଧନ ବିଲ ଉପରେ ଜୋରଦାର ବିତର୍କ ଚାଲିଥିଲା। ପାଖାପାଖି 230 ଜଣ ସାଂସଦ ବିତର୍କରେ ଭାଗ ନେଇଥିଲେ। ଆଲୋଚନା ବେଳେ କଂଗ୍ରେସର ପୁରୁଖା ସାଂସଦ ଗୃହମନ୍ତ୍ରୀଙ୍କୁ ଘେରିବାକୁ କୌଣସି ସୁଯୋଗ ହାତ ଛଡା କରିନଥିଲେ । ପ୍ରଶ୍ନପରେ ପ୍ରଶ୍ନ ଛିଡାକରି ସରକାରଙ୍କୁ ବ୍ୟାକଫୁଟକୁ ଆଣିବାକୁ ଉଦ୍ୟମ କରିଥିଲେ। ବରିଷ୍ଠ କଂଗ୍ରେସ ନେତା ତଥା ସାଂସଦ କପିଲ ଶିବଲ କହିଥିଲେ ଗୃହମନ୍ତ୍ରୀଙ୍କୁ ଦେଶର ମୁସଲମାନ ଡରୁନାହାଁନ୍ତି।
କପିଲ ଶିବଲଙ୍କୁ ଗୃହମନ୍ତ୍ରୀଙ୍କ କଡା ଜବାବ
କପିଲ ଶିବଲଙ୍କୁ ଅମିତ ଶାହା ଏହାର କଡା ଜବାବ ଦେଇଥିଲେ । ତାଙ୍କୁ କୌଣସି ବି ମୁସଲମାନ ଡରିବା ଦରକାର ନାହିଁ । ଦେଶର ଗୃହମନ୍ତ୍ରୀଙ୍କୁ କେହି ବି ଡରିବାର ପ୍ରଶ୍ନ ଉଠୁନାହିଁ । ଦେଶର ଗୃହମନ୍ତ୍ରୀଙ୍କ ଉପରେ ସମସ୍ତେ ଭରଷା ରଖିବା ଆବଶ୍ୟକ ବୋଲି ଅମିତ ଶାହା କହିଥିଲେ। ଏହାସହ ମୁସଲମାନଙ୍କୁ ଆଶ୍ବାସନା ଦେଇ କହିଥିଲେ ସେମାନେ ତିଳେମାତ୍ର ଡରିବାର ଆବଶ୍ୟକତା ନାହିଁ।
