ଗୁରୁଗ୍ରାମ: ଦୀର୍ଘ 5 ମାସର ବ୍ୟବଧାନ ପରେ ପୁଣି ଟ୍ରାକକୁ ଫେରିଛି ସାଇବର ସିଟି ଗୁରୁଗ୍ରାମରେ ମେଟ୍ରୋ ସେବା । ହେଲେ ଏହି ସେବା କେବଳ ୟେଲୋ ଲାଇନ ଅର୍ଥାତ ଦିଲ୍ଲୀର ସମୟପୁର ବାଦଲୀ ଷ୍ଟେସନରୁ ହୁଡା ସିଟି ସେଣ୍ଟର ପର୍ଯ୍ୟନ୍ତ ଉପଲବ୍ଧ ରହିବ । ସେପଟେ ମେଟ୍ରୋ ସେବା ଆରମ୍ଭ ହେବା ଦିଲ୍ଲୀବାସୀଙ୍କୁ ଯାତାୟତରେ ଆଶ୍ବସ୍ତି ମିଳିଛି । କାରଣ ସେମାନଙ୍କ ପାଇଁ ଗୁରୁଗ୍ରାମରୁ ଦିଲ୍ଲୀକୁ ଯାତ୍ରା ସୁଗମ ହେବ ।
ପ୍ରକାଶ ଥାଉ କି, ବର୍ତ୍ତମାନ କୋଭିଡ ସଙ୍କଟ ସମୟରେ ଆରମ୍ଭ ହୋଇଥିବା ମେଟ୍ରୋ ସେବାରେ ଅନେକ ଗୁଡିଏ ପରିବର୍ତ୍ତନ କରାଯାଇଛି । ଏଣିକି ମେଟ୍ରୋରେ ଯାତ୍ରା କରୁଥିବା ଯାତ୍ରୀଙ୍କୁ ନୂଆ ନିୟମ ଗୁଡିକୁ ମାନିବାକୁ ପଡିବ ।
ମେଟ୍ରୋରେ ପ୍ରବେଶ କରିବା ମାତ୍ରେ ଯାତ୍ରୀଙ୍କୁ ସୋସିଆଲ ଡିଷ୍ଟାନ୍ସିଂ ଏବଂ ମାସ୍କ ପିନ୍ଧିବାକୁ ପଡିବ । ବିନା ମାସ୍କରେ କୌଣସି ବ୍ୟକ୍ତି ଷ୍ଟେସନ ଭିତରକୁ ପ୍ରବେଶ କରିପାରିବେ ନାହିଁ । ସେହିପରି ମେଟ୍ରୋରେ ପ୍ରବେଶ ଏବଂ ପ୍ରସ୍ଥାନ ନେଇ ଭିନ୍ନ ଭିନ୍ନ ରାସ୍ତା ପ୍ରସ୍ତୁତ ହୋଇଛି । ଏହାରି ଭିତରେ ଯାତାୟତ କଲେ ଯାତ୍ରୀଙ୍କୁ ଆବଶ୍ୟକ ମୁତାବକ ଦୂରତା ରକ୍ଷା କରିବାକୁ ପଡିବ ।
ସକାଳ ସମୟରେ ମେଟ୍ରୋ ଚଳାଚଳ ଆରମ୍ଭ ହେବା ପୂର୍ବରୁ କେନ୍ଦ୍ର ଉଦ୍ୟୋଗିକ ସୁରକ୍ଷା ବଳ ଅର୍ଥାତ୍ ସିଆଇଏସଏଫ ଟିମ ମେଟ୍ରୋ ଷ୍ଟେସନ ଯାଞ୍ଚ କରିବେ । ଏହି ସୁରକ୍ଷା ଯାଞ୍ଚରେ ଗୁରୁଗ୍ରାମ ପୋଲିସ ମଧ୍ୟ ସେମାନଙ୍କୁ ସହଯୋଗ କରିବ । ସବୁ ଷ୍ଟେସନରେ ଯାତ୍ରୀଙ୍କୁ ଗୋଟିଏ ଗେଟରେ ହିଁ ପ୍ରବେଶ ଓ ପ୍ରସ୍ଥାନର ସୁବିଧା ମିଳିବ ।
ତେବେ ମେଟ୍ରୋ ଷ୍ଟେସନରେ କୋଭିଡ ନିୟମ ପାଳନ କରିବାକୁ ଯାତ୍ରୀଙ୍କ ଉପରେ ସିସିଟିଭି ଜରିଆରେ ନଜର ରଖାଯିବ । ଯଦ୍ବାରା ନିଶ୍ଚିତ କରାଯାଇପାରିବ କି ଯାତ୍ରୀ ମାସ୍କ ପିନ୍ଧିଛନ୍ତି କି ନାହିଁ । ଏଥିସହ ଯାତ୍ରୀ ସାଙ୍ଗରେ ଆଣିଥିବା ସାମଗ୍ରୀ ଗୁଡିକୁ ଭଲ ଭାବେ ସାନିଟାଇଜ କରାଯିବ । ସୂଚନାଯୋଗ୍ୟ, ମେଟ୍ରୋରେ ଯାତ୍ରା କରୁଥିବା ଯାତ୍ରୀଙ୍କ ପାଖରେ ସ୍ମାର୍ଟ କାର୍ଡ ଥିବା ଜରୁରୀ । କାରଣ ଏବେ ଷ୍ଟେସନରେ କ୍ୟାସ ସିଷ୍ଟମ ହଟାଇ ଦିଆଯିବା ସହ ଟୋକନ ବ୍ୟବସ୍ଥା ହଟାଇ ଦିଆଯାଇଛି । ପ୍ରଶାସନ ପକ୍ଷରୁ ଯାତ୍ରୀଙ୍କୁ କମ ସାମଗ୍ରୀ ଧରି ଯାତ୍ରା କରିବାକୁ ପରାମର୍ଶ ଦିଆଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
