ଜୟପୁର: ଝିଣ୍ଟିକାଙ୍କ କବଜାରେ ରାଜସ୍ଥାନର ଶ୍ରୀଗଙ୍ଗାନଗର ଜିଲ୍ଲା। ଏହି ଜିଲ୍ଲାର ପାଖାପାଖି 100ରୁ ଊର୍ଦ୍ଧ୍ୱ ଗାଁ ସହ 6ଟି ତହସିଲରେ ଝିଣ୍ଟିକା ଫସଲ ନଷ୍ଟ କରିସାରିଲେଣି। ସେହିପରି ଶୁକ୍ରବାର ଶ୍ରୀକାପୁର, କେଶରୀ, ସିଂପୁର ଓ ପଦ୍ମପୁର ଅଞ୍ଚଳରେ ଝିଣ୍ଟିକା ପ୍ରବେଶ କରିବା ସହ ଚାଷୀଙ୍କ ଚିନ୍ତା ବଢାଇଦେଇଛି।
ବର୍ତ୍ତମାନ ପରିସ୍ଥିତିରେ ଜିଲ୍ଲାର 6ଟି ତହସିଲ ଅନୁପାଗର, ରାଇଜିଙ୍ଗନଗର, ଶ୍ରୀକରଣପୁର, ପଦ୍ମପୁର କ୍ଷତିଗ୍ରସ୍ତ ହୋଇଛି। ଝିଣ୍ଟିକାଙ୍କୁ ନିୟନ୍ତ୍ରଣ କରିବାକୁ ସରକାର ବି ନାକେଦମ ହୋଇଗଲେଣି। ଏହି ଝିଣ୍ଟିକା ବଡବଡ ଗଛ,ବଣ ବୁଦା,କେନାଲ ସହ କ୍ଷେତରେ ଫସଲ ନଷ୍ଟ କରୁଛନ୍ତି। ଏପରିକି ଝିଣ୍ଟିକା ଗୋଟିଏ ସ୍ଥାନରୁ ଅନ୍ୟସ୍ଥାନକୁ ଯିବାବେଳେ କ୍ଷେତରେ ଅଣ୍ଡା ଛାଡି ଚାଲିଯାଉଛନ୍ତି। ଯାହାଫଳରେ କିଛିଦିନ ଭିତରେ ଛୁଆ ଫୁଟିବାର ଆଶଙ୍କା ଦେଖାଦେଉଛି।
ଚାଷୀଙ୍କ ସ୍ଥିତିର ତଦନ୍ତପାଇଁ କୃଷିବିଭାଗର ମୁଖ୍ୟ ଶ୍ରୀଗଙ୍ଗାନଗରର ସମସ୍ତ ଗାଁ ପରିଦର୍ଶନରେ ପହଞ୍ଚିଥିଲେ। କୃଷକ ଝିଣ୍ଟିକା ମାରିବା ପାଇଁ ବିଭିନ୍ନ ରାସାୟନିକ ପଦାର୍ଥର ପ୍ରୟୋଗ ଟ୍ରାକ୍ଟର ଦ୍ବାରା କ୍ଷେତରେ କରୁଛନ୍ତି। ଏପରିକି ହେଲିକ୍ୟାପ୍ଟର ମାଧ୍ୟମରେ କରାଯାଉଥିବା ଚାଷୀ କହିଛନ୍ତି।
ଚାଷୀଙ୍କ ଅଭିଯୋଗ ଅନୁସାରେ ସରକାର ଚେତିଲେ ଚାଷକ୍ଷେତକୁ ଝିଣ୍ଟିକା କବଳରୁ ରକ୍ଷା କରାଯାଇପାରନ୍ତା। ଆଗାମୀ ଦିନରେ ଯଦି ଝିଣ୍ଟିକାର ପ୍ରତିହତ ପାଇଁ ସରକାର କୌଣସି ପଦକ୍ଷେପ ନନିଅନ୍ତି କଳାପଟି ବାନ୍ଧି ବିକ୍ଷୋଭ ପ୍ରଦର୍ଶନ କରିବେ ବୋଲି କହିଛନ୍ତି ଚାଷୀ।
